বৈদেশিক মুদ্ৰা আইন উলংঘা কৰাৰ অভিযোগত ব্ৰিটিছ ব্ৰডকাষ্টিং কৰ্প’ৰেশ্যন (বিবিচি)ৰ বিৰুদ্ধে এনফর্চমেণ্ট সঞ্চালকালয়ে গোচৰ ৰুজু কৰিছে। ‘দ্য ইণ্ডিয়ান এক্সপ্ৰেছ’ কাকতত প্ৰকাশিত প্ৰতিবেদন অনুসৰি দুসপ্তাহ পূৰ্বে ইডিয়ে এই গোচৰ ৰুজু কৰিছিল। ইফালে, সংবাদ প্ৰতিষ্ঠানটোৰ ভাৰতীয় শাখাৰ এজন সঞ্চালককে ধৰি ছয়জন কর্মচাৰীকো জেৰা কৰিছে ইডিয়ে।
যোৱা ১৭ জানুৱাৰীত বিবিচিয়ে মুখ্যমন্ত্ৰী হিচাপে কার্যনিবাহ কৰি থকাৰ সময়ত গুজৰাটৰ হিংসাত্মক ঘটনাত নৰেন্দ্ৰ মোদীৰ ভূমিকাক লৈ দুটা খণ্ডৰ তথ্যচিত্ৰ ‘ভাৰতঃ মোদী কুৱেশ্বন’ প্ৰচাৰ কৰিছিল। ইয়াৰ বিৰুদ্ধে আপত্তি জনাই মোদী চৰকাৰে ২০ জানুৱাৰীত তথ্যচিত্ৰখনৰ প্ৰথম খণ্ডটো দেশত নিষিদ্ধ কৰিছিল। বৈদেশিক পৰিক্ৰমা মন্ত্ৰালয়ে এক বিবৃতিত দাবী কৰিছে যে এই তথ্যচিত্ৰখন ইচ্ছাকৃতভাৱে মোদীৰ চৰিত্ৰক বদনাম কৰিবলৈ নিৰ্মাণ কৰা হৈছে। প্ৰসংগক্ৰমে ফেব্ৰুৱাৰী মাহত আয়কৰ বিভাগে দিল্লী আৰু মুম্বাইত থকা বিবিচিৰ কাৰ্যালয়ত মাৰাথন অভিযান চলাইছিল। কোৱা হয় যে তেওঁলোকে আয়কৰ সম্পৰ্কীয় বিভিন্ন অনিয়ম বিচাৰি পাইছে। আয়কৰ বিভাগে অৱশ্যে ইয়াক অভিযান বুলি অভিহিত কৰা নাছিল। আয়কৰ বিষয়াসকলে দাবী কৰে যে তেওঁলোকে ‘তদন্ত’ কৰিবলৈ বিবিচিৰ কাৰ্যালয়লৈ গৈছিল। এইবাৰ বৈদেশিক মুদ্ৰাৰ সৈতে জড়িত আইন উলংঘা কৰাৰ অভিযোগত ইডিয়ে বিবিচিৰ বিৰুদ্ধে গোচৰ তৰিছে বুলি জানিব পৰা গৈছে।
সূত্ৰ অনুসৰি বিবিচি ইণ্ডিয়াই বৈদেশিক মুদ্ৰা ব্যৱস্থাপনা আইন (ফেমা) উলংঘা কৰাৰ অভিযোগ উত্থাপন কৰিছে ইডিয়ে। ইডিৰ তদন্তকাৰীয়ে বিশ্বাস কৰে যে বিবিচিত প্ৰত্যক্ষ বিদেশী বিনিয়োগ অনিয়মিত। ইয়াৰ সন্দৰ্ভত নথি-পত্ৰ প্ৰেৰণ কৰা হৈছে। কেন্দ্ৰীয় সংস্থাটোৱে কোম্পানীটোৰ বিষয়াসকলৰ বক্তব্যও লিপিবদ্ধ কৰিব বিচাৰিছে।
গুজৰাটৰ হিংসাৰ ওপৰত বিবিচিৰ তথ্যচিত্ৰত তদানীন্তন মুখ্যমন্ত্ৰী মোদীক যিদৰে চিত্ৰিত কৰা হৈছে, তাৰ লগত বিজেপি আৰু কেন্দ্ৰীয় চৰকাৰ একমত নহয়। এই তথ্যচিত্ৰখনৰ প্ৰথম খণ্ডটো দেশত নিষিদ্ধ কৰাৰ উপৰিও কেন্দ্ৰীয় চৰকাৰে টুইটাৰ, ইউটিউবক এই তথ্যচিত্ৰখন প্ৰত্যাহাৰ কৰিবলৈ নিৰ্দেশ দিয়ে ৷বিবিচিৰ তথ্যচিত্ৰখন দেশৰ বিভিন্ন প্ৰান্তত প্ৰদৰ্শিত হয়। কাকতলীয়াকৈ ক’বলৈ গ’লে ইয়াৰ পিছতেই আয়কৰ বিষয়াসকলে বিবিচিৰ কাৰ্যালয়ত অভিযান চলায়।
