হলিউডৰ অন্যতম জনপ্ৰিয় পপ তাৰকা চেলিনা গোমেজ । ডিজনীৰ সহায়ত চেলিনা গোমেজে শিশু শিল্পী আৰু অভিনেত্ৰী হিচাপে নিজৰ কেৰিয়াৰ আৰম্ভ কৰিছিল। ইয়াৰ পিছত চেলিনা ডাঙৰ হৈ গায়িকা হিচাপে নিজকে প্ৰতিষ্ঠা কৰে। পপ ষ্টাৰৰ খিতাপ অৰ্জন কৰে। অৱশ্যে চেলিনাৰ পেছাদাৰী জীৱনতকৈ ব্যক্তিগত জীৱনক লৈ অনুৰাগীসকল অধিক উৎসাহিত। দীৰ্ঘদিন ধৰি পপ তাৰকা জাষ্টিন বিবাৰৰ সৈতে চেলিনাৰ সম্পৰ্ক আছিল। কিন্তু এতিয়া সেই সকলোবোৰ অতীত। জাষ্টিনে মডেল হেলি বিবাৰৰ সৈতে বিবাহপাশত আবদ্ধ হৈছে আৰু এতিয়া তেওঁ বহুত সুখী। কেইবামাহো পূৰ্বে চেলিনাই ‘ৱান ডাইৰেকচন’ বেণ্ডৰ প্ৰাক্তন সদস্য জেন মালিকৰ সৈতে জড়িত হৈ পৰিছিল। তেওঁ জেনৰ প্ৰেমত পৰা বুলি চর্চিত হৈছিল । এই বছৰৰ মাৰ্চ মাহৰ পৰা জেন আৰু চেলিনাৰ মাজত সম্পর্ক গঢ়ি উঠিছিল ৷ নিউয়ৰ্কৰ এখন ৰেষ্টুৰেণ্টৰ বাহিৰত হাতে হাত ধৰি খোজ কাঢ়ি থকা দেখা গৈছিল তেওঁলোকক । দম্পতীহালক চুম্বন কৰাও দেখা গৈছিল ৷ সেই ছবিখন ছ’চিয়েল মিডিয়াৰ পেজত বিয়পি পৰিল। দুয়োগৰাকী তাৰকাৰ প্ৰেমৰ খবৰে তেওঁলোকৰ অনুৰাগীসকলক উত্তেজিত কৰি তুলিছিল।
কিন্তু সেই প্ৰেম মাত্ৰ তিনিমাহতে অন্ত পৰিল । শেহতীয়াকৈ দেখা গৈছে যে চেলিনাই নিজৰ ইনষ্টাগ্ৰাম পেজত জেনক ‘আনফ’ল’ কৰিছে। অৱশ্যে আগতে গায়কজনক অনুসৰণ কৰিছিল। কিছুদিন পূৰ্বে চেলিনাইও এটা ভিডিঅ’ত নিজকে ‘চিংগল’ বুলি দাবী কৰিছিল। চেলিনাৰ পূৰ্বে জেন দীৰ্ঘদিন ধৰি ছুপাৰ মডেল গিগি হাদিদৰ সৈতে সম্পৰ্কত আছিল। এগৰাকী কন্যা সন্তানৰ পিতৃ। ২০২১ চনৰ শেষৰ ফালে প্ৰায় ছবছৰীয়া সম্পৰ্কৰ অন্ত পেলায় গিগি আৰু জেনে ।
