আজি বিগ-বি অমিতাভ বচ্চনৰ ওপজা দিন ৷ মেগাষ্টাৰ গৰাকীয়ে আজি উদযাপন কৰে ৮১ সংখ্যক ওপজা দিন ৷ জন্মদিনত অসংখ্য অনুৰাগী আৰু তাৰকাসকলে তেওঁক জন্মদিনৰ ওলগ জনাইছে ৷ মঙলবাৰে মাজনিশা অমিতাভ বচ্চনে ৮১ সংখ্যক জন্মদিন উদযাপন কৰিবলৈ নিজৰ মুম্বাই বাসগৃহৰ বাহিৰত সমবেত হোৱা শ শ অনুৰাগীক সম্ভাষণ জনাবলৈ ওলাই আহে। ছুপাৰষ্টাৰগৰাকীয়ে তেওঁৰ বাসগৃহৰ গেটৰ ওচৰলৈ আহি হাত জোকাৰি অনুৰাগীসকলক অভিবাদন জ্ঞাপন কৰে ৷ অনুৰাগীসকলেও উল্লাসেৰে তেওঁক আদৰণি জনোৱাপৰিলক্ষিত হয় ৷
১১ অক্টোবৰত অমিতাভ বচ্চনে ৮১ বছৰ সম্পূৰ্ণ কৰিছিল।মুম্বাইৰ বাসগৃহ জলছাৰ বাহিৰত অভিনেতাগৰাকীৰ আচৰিত ধৰণৰ উপস্থিতিয়ে অনুৰাগীসকলক উল্লাসিত কৰি তোলে ৷
উল্লেখ্য যে ৮১ বছৰ বয়সত বচ্চন আগৰ দৰেই সক্ৰিয় হৈ আছে ৷ যিয়ে প্ৰমাণ কৰিছে যে বয়স তেওঁৰ বাবে মাত্ৰ এটা সংখ্যা। শেষবাৰৰ বাবে তেওঁক অনুপম খেৰ, পৰিনীতি চোপ্ৰা আৰু বোমন ইৰাণীৰ সৈতে সুৰজ বৰজাত্যৰ উচাই ছবিত দেখা গৈছিল। কেইবাখনো ছবি মুক্তিৰ অপেক্ষাত আছে ৷ তদুপৰি কেইবাখনো ছবিৰ শ্বুটিঙত তেওঁ ব্যস্ত হৈ আছে ৷ ইয়াৰ ভিতৰত উল্লেখযোগ্য ছবি হৈছে প্ৰজেক্ট-কে ৷
