অসম সন্তান ৰিয়ান পৰাগৰ ক্ৰমাগত চমকপ্রদ খেল আৰু ৰাজস্থান ৰয়েলছৰ দলীয় প্রদর্শনে উত্তৰ-পূবৰ দৰ্শকলৈ আশাৰ সঞ্চাৰ কৰিছে। ৰাজস্থান ৰয়েলছে অহা ১৫ মে’ত পঞ্জাব কিংছ আৰু ১৯ মে’ত কে কে আৰৰ বিৰুদ্ধে গুৱাহাটীৰ বর্ষাপাৰা স্টেডিয়ামত খেলিব ৷ আই পি এল খেল দুখনৰ টিকট বিশেষকৈ ছাত্র-ছাত্রী আৰু সাধাৰণ দর্শকলৈ বৃহস্পতিবাৰৰ বিয়লি ৪ বজাৰে পৰা বিক্ৰী আৰম্ভ কৰিছে। এখন সংবাদমেলত এই বিষয়ে জানিবলৈ দিয়ে আৰ আৰ দলৰ মুখ্য কার্যবাহী বিষয়া (চি ই অ’) জেক লুছ মেকক্রামে।
ৰাজস্থানৰ লগতে অসমকো ৰাজস্থান ৰয়েলছে হোমটা্উন হিচাপে ঘোষণা কৰিছে । শিক্ষার্থীৰ বাবে ৫০০ টকা আৰু সাধাৰণ দর্শকৰ বাবে এহেজাৰ টকা টিকটৰ মূল্য নির্ধাৰণ কৰা হৈছে ৷ আগতীয়াকৈ যিসকলে ইতিমধ্যে প্রকাশিত আহ্বান অনুসৰি টিকটৰ বাবে পঞ্জীয়ন কৰিছে, তেওঁলোকেই এই সুবিধা লাভ কৰিছে। টিকট বুক মাই শ্ব’যোগে বিতৰণ কৰা হ’ব। একে সময়তে সর্বোচ্চ টিকটৰ মূল্য ৯ হেজাৰ টকা হ’ব। লগতে থাকিব কর্প’ৰেট আৰু বক্সৰ টিকটো।
