ইণ্ডিয়ান প্ৰিমিয়াৰ লীগ (আই পি এল)ৰ চলি থকা ছিজনৰ মাজতে ভাৰতৰ অধিনায়ক ৰোহিত শৰ্মাই চলিত সপ্তাহৰ শেষৰ ফালে বি চি চি আইৰ নিৰ্বাচকসকলৰ সৈতে সাক্ষাৎ কৰি আগন্তুক টি-২০ বিশ্বকাপৰ দলৰ বিষয়ে আলোচনা কৰাৰ সম্ভাৱনা আছে। আইচিচিয়ে অংশগ্ৰহণকাৰী দলসমূহৰ বাবে দল জমা দিয়াৰ সময়সীমা হিচাপে ১ মে’ নিৰ্ধাৰণ কৰিছে। ভাৰতৰ টি-২০ বিশ্বকাপ ২০২৪ দল নিৰ্বাচনৰ সময়সীমা ওচৰ চাপি অহাৰ লগে লগে একেটা বিষয়তে কেইবাজনো বিশেষজ্ঞই নিজৰ মতামত ব্যক্ত কৰিছে। ভাৰত আৰু চেন্নাই ছুপাৰ কিংছৰ প্ৰাক্তন বেটছমেন অম্বতি ৰায়ুডুৱেও বিশ্বকাপৰ বাবে নিজৰ ১৫ জনীয়া সাম্ভাৱ্য দল প্ৰকাশ কৰিছে ৷
চলি থকা আই পি এলৰ ছিজনতশোচনীয় প্ৰদৰ্শনৰ বাবে বিতর্কত সোমাই পৰা তাৰকা অল ৰাউণ্ডাৰ হাৰ্দিক পাণ্ডিয়া ৰায়ডুৰ ১৫ জনীয়া দলৰ তালিকাত নাই ৷ এই ছিজনত প্ৰথমবাৰৰ বাবে এম আইৰ নেতৃত্ব দি আছে হাৰ্দিকে ৷ ৰোহিত শৰ্মাৰ ঠাইত অধিনায়ক হিচাপে নিযুক্তি দিছে যদিও তেওঁৰ অধিনায়কত্ব আৰু প্ৰদৰ্শন অত্যন্ত দূর্বল বুলিয়েই বিবেচিত হৈছে ৷
বিচিচিআইয়ে আইপিএলৰ কোনো নতুন প্ৰদৰ্শনকাৰী বাছি লোৱাৰ সম্ভাৱনা নাই বুলি খবৰ ওলাইছে যদিও ৰায়ুডুৱে তেওঁৰ ভৱিষ্যদ্বাণী কৰা দলত এল এছ জিৰ পেচাৰ মায়াংক যাদৱ আৰু ৰাজস্থান ৰয়েলছৰ অল ৰাউণ্ডাৰ তথা অসম সন্তান ৰিয়ান পৰাগৰ দৰে খেলুৱৈক অন্তৰ্ভুক্ত কৰিছে । আই পি এল কেৰিয়াৰৰ উল্লেখযোগ্য আৰম্ভণিৰ পিছত মায়াংকে ২ জুনত আৰম্ভ হ’বলগীয়া আমেৰিকাত অনুষ্ঠিত হ’বলগীয়া টি-২০ বিশ্বকাপত অংশগ্ৰহণ কৰাৰ সম্ভাৱনা সকলোৱে ব্যক্ত কৰিছে ৷
ৰোহিত শৰ্মা, যশস্বী জয়ছোৱাল, বিৰাট কোহলী আৰু সূৰ্যকুমাৰে শীৰ্ষ চাৰিটা স্থানত স্থান দিছে যদিও ৰায়ুডুৱে ৰক্ষকৰ ভূমিকাত ঋষভ পন্ত, কে এল ৰাহুল আৰু সঞ্জু চেমছনৰ দৰে খেলুৱৈক বাদ দিছে। তাৰ পৰিৱৰ্তে তেওঁ প্ৰবীণ দীনেশ কাৰ্তিকক উইকেট ৰক্ষক হিচাপে বাছি লৈছিল।
টি-২০ বিশ্বকাপ ২০২৪ৰ বাবে অম্বাতি ৰায়ুডুৰ ভাৰতীয় দল:
ৰোহিত শৰ্মা (অধিনায়ক), যশস্বী জয়ছোৱাল, বিৰাট কোহলী, সূৰ্যকুমাৰ যাদৱ, দীনেশ কাৰ্তিক, ৰিংকু সিং, শিৱম ডুবে, ৰিয়ান পৰাগ, ৰবীন্দ্ৰ জাদেজা, যুজবেন্দ্ৰ চাহাল, কুলদীপ যাদৱ, যশপ্ৰীত বুমৰাহ, মায়ংক যাদৱ, আৰ্শদীপ সিং আৰু মহম্মদ চিৰাজ।
