অসমৰ ৰাজ্যিক জন্তু
অসমৰ ৰাজ্যিক জন্তু হ’ল—এটা খড়্গৰ গঁড়। অসম আৰু পশ্চিমবংগত এনে গঁড় পোৱা যায়। গঁড়ৰ বয়স প্ৰায় ৩০/৪০ বছৰ। সমগ্ৰ বিশ্বতে দুস্প্ৰাপ্য অসমৰ এশিঙীয়া গঁড়। এশিঙীয়া গঁড়ৰ বাবে বিখ্যাত অসম। কাজিৰঙা , পবিতৰা আৰু মানস অভয়াৰণ্যত এটা খড়্গৰ গঁড় আছে । এশিঙীয়া গঁড়ৰ বাবে কাজিৰঙা ৰাষ্ট্ৰীয় উদ্যান বিশ্ব বিখ্যাত আৰু দেশ-বিদেশৰ পৰ্যটকৰ আকৰ্ষণীয় পৰ্যাটনস্থলী । ২০০৩ চনৰ ৪ এপ্ৰিলত অসম চৰকাৰে গঁড়ক অসমৰ ৰাজ্যিক পশু হিচাপে ঘোষণা কৰে।
অসমৰ ৰাজ্যিক ফুল
অসমৰ ৰাজ্যিক ফুল হ’ল —–কপৌ ফুল। ভাৰতীয় অৰ্কিডৰ এক সাধাৰণ প্ৰজাতি হ’ল কপৌ। কপৌফুলৰ গছ আন গছত গজে। ইয়াৰ চুটি কাণ্ডৰ দুয়োফালে ছয়ৰ পৰা আঠ যোৰ ফুল থাকে। এই ফুল এপ্ৰিল মে’ত ফুলে । কপৌ ফুলক অসমৰ সংস্কৃতিৰ প্ৰতীক হিচাপে ধৰা হয়। অসমীয়াৰ জাতীয় উৎসৱ বিহুত নাচনীয়ে খোপাত কপৌ ফুল গুজাৰ পৰম্পৰা চলি আহিছে । ২০০৩ চনৰ ৪ এপ্ৰিলত অসম চৰকাৰে কপৌ ফুলক ৰাজ্যিক ফুলৰ স্বীকৃতি দিয়ে।
অসমৰ ৰাজ্যিক বৃক্ষ
অসমৰ ৰাজ্যিক বৃক্ষ হ’ল ——–হোলোং গছ। দক্ষিণ -পূব এছিয়াৰ প্ৰায় সকলো দেশতে হোলোং গছ পোৱা যায়। এই গছ অসমৰ আটাইতকৈ ওখ গছ। অসমৰ প্ৰায়বোৰ অৰণ্যতে হোলোং গছ দেখিবলৈ পোৱা যায়।হোলোং গছ কাঠ, প্লাইউড , কাগজৰ মণ্ড আৰু এঙাৰ তৈয়াৰ কৰাত ব্যৱহাৰ হয়। হোলোং গছৰ পৰা পোৱা তেল জাতীয় পদাৰ্থ কাঠৰ আচবাব , দুৱাৰ আদি বাৰ্নিছ কৰাত ব্যৱহাৰ কৰা হয়। অসম চৰকাৰে ২০০৩ চনত হোলোং গছক ৰাজ্যিক বৃক্ষ হিচাপে স্বীকৃতি দিছে।
অসমৰ ৰাজ্যিক জলজ জীৱ
অসমৰ ৰাজ্যিক জলজ জীৱ হ’ল ——-শিহু। শিহুক ৰিভাৰ ডলফিন নামেৰেও জনা যায়। শিহুৰ গাৰ বৰণ মুগা। চকুত লেন্স নাথাকে বাবে শিহুক অন্ধ বুলি কব পাৰি। শিহু স্তন্যপায়ী প্ৰাণী হোৱা বাবে পানীৰ তলত উশাহ ল’ব নোৱাৰে। উশাহ ল’বৰ বাবে মাজে মাজে ওপৰলৈ উঠি আহিব লাগে। শিহুৱে মাছ , মিছামাছ ,কেটফিছ আদি খায়। অসম চৰকাৰে ২০০৮ চনৰ ৫ এপ্ৰিলত শিহুক ৰাজ্যিক জলজ পশু হিচাপে স্বীকৃতি প্ৰদান কৰে।
অসমৰ ৰাজ্যিক পক্ষী
অসমৰ ৰাজ্যিক পক্ষী হ’ল—–দেওহাঁহ। বগা ডেউকাযুক্ত দেও হাঁহ হ’ল হাঁহৰ আটাইতকৈ ডাঙৰ প্ৰজাতিবোৰৰ ভিতৰত এটা । ইয়াৰ গা টো ক’লা , ঠোঁটটো বগা আৰু তাত ক’লা ফোট থাকে। দেওহাঁহৰ মাতটো বৰ ভয় লগা ধৰণৰ হয়। বহুতে দেও ভূতৰ মাত বুলি ভয় কৰে। সেইবাবে ইয়াক দেওহাঁহ নামেৰে জনা যায়। দেওহাঁহে শস্যৰ গুটি , পাচলি , মাছ , পানীত থকা পতঙ্গ , কুমজেলেকুৱা , মকৰা আদি খায়। অসমৰ ডিব্ৰু-চৈখোৱা ৰাষ্ট্ৰীয় উদ্যান , দিহিং পাটকাই বন্যপ্ৰাণী অভয়াৰণ্য আৰু নামেৰী ৰাষ্ট্ৰীয় উদ্যানত দেওহাঁহ পোৱা যায়। ২০০৩ চনৰ ৪ এপ্ৰিলত অসম চৰকাৰে দেওহাঁহক ৰাজ্যিক পক্ষী হিচাপে ঘোষণা কৰে।
অসমৰ ৰাজ্যিক পানীয়
অসমৰ ৰাজ্যিক পানীয় হ’ল—চাহ। ভাৰতৰ ভিতৰত সকলোতকৈ অধিক চাহ অসমত উৎপাদন হয় । অসমৰ অন্যতম প্ৰধান উদ্যোগ হিচাপে পৰিগণিত চাহ উদ্যোগ ৰাজ্যখনৰ বাবে গৌৰৱস্বৰূপ । পৃথিৱীৰ ভিতৰত উৎকৃষ্টতম চাহ উৎপাদনৰ অঞ্চল হিচাপে ব্ৰহ্মপুত্ৰ উপত্যকা বিখ্যাত ।চাহ উদ্যোগে অসমৰ অৰ্থনীতি আৰু সমাজত গুৰুত্বপূৰ্ণ প্ৰভাব পেলাইছে। ২০১১ চনত অসম চৰকাৰে চাহক ৰাজ্যিক পানীয় হিচাপে স্বীকৃতি প্ৰদান কৰিছে।
