কানাড়া অভিনেতা য়শৰ জন্মদিন আজি অলপ বেছি বিশেষ হৈ পৰে ৷ তেওঁৰ জন্মদিনৰ দিনটোতে মুকলি কৰা হৈছে বলিউডৰ আন এখন ব্লকবাষ্টাৰ ছবি কে জি এফৰ চিকুৱেলৰ পোষ্টাৰ ৷ আজি মুকলি কৰা পোষ্টাৰত অভিনেতাজনৰ নতুন ৰূপে একপ্ৰকাৰ অবাক কৰি তুলিছে অনুৰাগীসকলক ৷ কে জি এফত য়শে কৰা অভিনয়ে সকোলোকে মন্ত্ৰমুগ্ধ কৰিছিল ৷ কে জি এফঃচেপ্টাৰ ২ ৰ পো্ষ্টাৰত অভিনেতাজনক ক’লা শ্বার্ট আৰু পেণ্টৰ লগত এটা মুগা ৰঙৰ জেকেট পৰিধান কৰা পৰিলক্ষিত হৈছে ৷ পোষ্টাৰখনত “ৰকিং ষ্টাৰ” আৰু “শুভ জন্মদিন” বুলিও উল্লেখ কৰা হৈছে ৷ নতুন পোষ্টাৰখন মুকলি কৰি নিৰ্মাতাসকলে লগতে নিশ্চিত কৰিছে যে ছবিখন পূৰ্ব নির্ধাৰিত অনুসৰি অহা ১৪ এপ্ৰিলত মুক্তি দিয়া হ’ব ৷
কেজিএফৰ চিকুৱেল প্ৰযোজনা কৰা হোমবলে ফিল্মছে পোষ্টাৰখন মুকলি কৰাৰ পাছতে অনুৰাগীসকলে অভিনেতা য়শক জন্মদিনৰ শুভেচ্ছা জ্ঞাপন কৰে ৷ কেজিএফ: অধ্যায় ২ পৰিচালনা কৰিছে প্ৰশান্ত নীলে। ছবিখনত য়শ, সঞ্জয় দত্ত, ৰবীনা টেণ্ডন আৰু শ্ৰীনিধি চেট্টীয়ে মুখ্য চৰিত্ৰত অভিনয় কৰিছে। আমিৰ খানৰ লাল সিং চাড্ডা নামৰ ছবিখন কেজিএফৰ সৈতে একেলগে বক্স অফিচত মুক্তি লাভ কৰিব ৷
