অৱশেষত প্ৰতীক্ষাৰ অন্ত পৰিল ৷ অহা ১৩ মে’ত বাগদান সম্পন্ন হ’ব আপ নেতা ৰাঘৱ চাদ্দা আৰু অভিনেত্ৰী পৰিনীতি চোপ্ৰাৰ । দিল্লীত অনুষ্ঠিত হ’ব এই অনুষ্ঠান। প্ৰায় ১৫০ জন ঘনিষ্ঠ বন্ধু আৰু পৰিয়ালৰ সদস্যৰ উপস্থিতিত বাগদান অনুষ্ঠান সম্প্ন্ন হ’ব । অৱশ্যে বিয়াৰ তাৰিখ এতিয়াও চূড়ান্ত হোৱা নাই যদিও চলিত বৰ্ষৰ শেষৰ ফালে বিবাহ অনুষ্ঠান অনুষ্ঠিত হ’ব বুলি আশা কৰা হৈছে। অভিনেত্ৰীগৰাকী আৰু ৰাজ্যসভাৰ সাংসদগৰাকীক বহুবাৰ একেলগে দেখা গৈছে ৷ শেহতীয়াকৈ ইণ্ডিয়ান প্ৰিমিয়াৰ লীগ (আই পি এল)ৰ এখন খেল তেওঁলোকে একেলগে উপভোগ কৰিছিল ।
দেওবাৰে সন্ধিয়া মুম্বাইৰ বান্দ্ৰাৰ এখন ৰেষ্টুৰেণ্টত দুয়োকে একেলগে দেখা গৈছিল ৷ এই দম্পতীহালৰ সৈতে পৰিনীতিৰ কনিষ্ঠ ভাতৃ শিৱাং চোপ্ৰাকো দেখা গৈছিল।ৰাঘৱ আৰু পৰিণীতিয়ে লণ্ডন স্কুল অৱ ইকনমিক্সত একেলগে অধ্যয়ন কৰিছিল। পূৰ্বেও মুম্বাই বিমানবন্দৰ আৰু মহানগৰীৰ এখন ৰেষ্টুৰেণ্টত একেলগে দেখা পোৱা গৈছিল দয়োকে ।
আপৰ সাংসদ সঞ্জীৱ অৰোৰাই যোৱা মাহত দুয়োৰে বিবাহ সন্দর্ভত টুইটযোগে শুভেচ্ছা জ্ঞাপন কৰিছিল ৷ তেওঁ লিখিছিল “মই ৰাঘৱ আৰু পৰিণীতিক লৈ মোৰ আন্তৰিক অভিনন্দন জনাইছো। তেওঁলোকৰ মিলন প্ৰচুৰ মৰম, আনন্দ, আৰু সংগীৰ সৈতে ধন্য হওক। মোৰ শুভেচ্ছা।”
২০১১ চনত লেডিজ বনাম ৰিকি বাহলৰ ছবিৰে অভিষেক ঘটা পৰিনীতি চোপ্ৰাক শেষবাৰৰ বাবে উচাই নামৰ ছবিত অমিতাভ বচ্চন, অনুপম খেৰ, বোমন ইৰানী, ডেনি ডেনজংপা, নীনা গুপ্তা, আৰু সাৰিকাৰ সৈতে দেখা গৈছিল। ইয়াৰ পিছত চমকিলা আৰু কেপচুল গিল ছবিত দেখা যাব অভিনেত্ৰীগৰাকীক ৷
