অৱশেষত নৱজাতকসহ হাস্পতালৰ পৰা ঘৰলৈ আহিল বলিউডৰ জনপ্ৰিয় অভিনেত্ৰী আলিয়া ভাট ৷ দেওবাৰে কন্যা সন্তান জন্ম দিয়া আলিয়া ভাট আৰু তেওঁৰ স্বামী ৰণবীৰ কাপুৰে বৃহস্পতিবাৰে পুৱা নিজৰ কেঁচুৱা ঘৰলৈ লৈ আহে ৷ বৃহস্পতিবাৰে পুৱা চিকিৎসালয়ৰ পৰা ঘৰলৈ ওভতাৰ পথত ৰণবীৰৰ মাতৃ নীতু কাপুৰকো চিকিৎসালয়ৰ পৰা ওলাই যোৱা দেখা গৈছিল ৷ দেওবাৰে আলিয়া ভাটে ইনষ্টাগ্ৰামৰ জৰিয়তে তেওঁ আৰু ৰণবীৰ কাপুৰৰ কন্যা সন্তানৰ আগমনৰ কথা ঘোষণা কৰে।
চলিত বৰ্ষৰ জুন মাহত এটা ইনষ্টাগ্ৰাম পোষ্টৰ জৰিয়তে আলিয়া ভাটে গৰ্ভধাৰণৰ কথা প্ৰকাশ কৰিছিল। চলিত বৰ্ষৰ এপ্ৰিল মাহত ৰণবীৰ কাপুৰৰ সৈতে আলিয়া বিবাহপাশত আবদ্ধ হয়। তাৰকা দম্পতীয়ে বিয়াৰ পূৰ্বে ৫ বছৰতকৈও অধিক সময় ধৰি প্ৰেমৰ সম্পর্কত আছিল ৷ অয়ন মুখার্জীৰ ব্ৰহ্মাস্ত্ৰৰ চেটত লগ পোৱাৰ পাছত দুয়োৰে সম্পর্ক ঘনিষ্ঠ হৈছিল ৷ এই ছবিখনেই তেওঁলোকে একেলগে অভিনয় কৰা প্ৰথমখন ছবি।
শীঘ্ৰেই হলিউডত অভিষেক ঘটিব আলিয়া ভাটৰ ৷ গাল গাডোটৰ সহ অভিনীত হাৰ্ট অফ ষ্টোনৰ জৰিয়তে। ইয়াৰ বাহিৰেও অভিনেত্ৰীগৰাকীৰ আন কেইবাখনো ছবি শীঘ্ৰে মুক্তি লাভ কৰিব ৷ চলিত বর্ষতআলিয়া ভাটৰ ছবি – আৰ আৰ আৰ, গংগুবাই কাঠিয়াৱাড়ী আৰু ব্ৰহ্মাস্ত্ৰ মুক্তি লাভ কৰিছিল ৷আটাইকেইখনেই বক্স অফিচত সফলতা লাভ কৰিছিল।
