কেতিয়া ছবিগৃহত মুক্তি পাব চলিত বৰ্ষৰ আটাইতকৈ প্ৰত্যাশিত ছবি ‘কল্কী ২৮৯৮ এডি’ ? হিন্দু পৌৰাণিক কাহিনীৰ পটভূমিত নিৰ্মিত এই ছবিখনত কেইবাজনো তাৰকা অভিনেতাক দেখা যাব। দক্ষিণ অভিনেতা প্ৰভাস, কমল হাছান, ‘শ্বেহেনশ্বাহ’ অমিতাভ বচ্চন আৰু দীপিকা পাডুকনক দেখা যাব ছবিখনত। পৰিচালক নাগ অশ্বিন। প্ৰভাসে ভগৱান শ্ৰীকৃষ্ণৰ অন্তিম অৱতাৰ ‘কল্কী’ৰ চৰিত্ৰত অভিনয় কৰিছিল। ছবিখনৰ শ্বুটিং হৈছে হিন্দী আৰু তেলেগু ভাষাত।
৯ মে’ত মুক্তি পোৱাৰ কথা আছিল ছবিখন। পিছত নিৰ্ধাৰিত তাৰিখটো ছবি নিৰ্মাতাসকলে সলনি কৰে। ইয়াৰ পৰিৱর্তে ৩০ মে’ত মুক্তি পাব ‘কল্কী ২৮৯৮ এডি’ । কিন্তু ইমান ডাঙৰ বাজেটৰ ছবি মুক্তিৰ বাবে ইমান বিভ্ৰান্তি কিয়? ইয়াৰ অন্তৰ্নিহিত কাৰণ হিচাপে উত্থাপিত হৈছে লোকসভা নিৰ্বাচন। নিৰ্বাচনী যুদ্ধ পূৰ্ণগতিত চলি আছে। নিৰ্বাচনী বতৰত জনসাধাৰণ ওলাই আহিব নে বক্স অফিচত কিমান প্ৰভাৱ পৰিব, তাক লৈ সন্দেহৰ সৃষ্টি হৈছে ৷
শেহতীয়াকৈ সম্পূৰ্ণ হৈছে শ্বুটিং। জানিব পৰা মতে অহা ১৭ এপ্ৰিলত ছবিখনৰ মুক্তিৰ তাৰিখ ঘোষণা কৰা হ’ব।ছবিখনৰ মুক্তিৰ পূৰ্বে নিৰ্মাতাসকলে অ’টিটিত এখন চুটি দৈৰ্ঘ্যৰ ‘এনিমেটেড প্ৰিলুড’ মুকলি কৰিব। দৰ্শকক ছবিখনৰ পটভূমিৰ বিষয়ে স্পষ্ট ধাৰণা দিয়াৰ বাবে এই বিশেষ পদক্ষেপ। অৱশ্যে এই ‘এনিমেটেড প্ৰিলুড’ কেতিয়া মুক্তি পাব সেয়া এতিয়াও স্পষ্ট হোৱা নাই।
