২০২২ বৰ্ষৰ অস্কাৰৰ মঞ্চত সংঘটিত হোৱা এটি অতি আচহুৱা ঘটনাই সমগ্ৰ বিশ্বতেই তোলপাৰ লগাইছিল ৷ অস্কাৰৰ মঞ্চত অভিনেতা উইল স্মিথে কৌতুক অভিনেতা তথা ঘোষক ক্ৰিছ ৰকক এটা চৰ মৰাৰ পিছতেই সমগ্ৰ বিশ্বত এই খবৰে সৃষ্টি কৰিছিল তীব্ৰ চাঞ্চল্যৰ ৷ অৱশ্যে কিছুদিনৰ পিছতেই ই শাম কাটে ৷
কিন্তু শেহতীয়াকৈ কৌতুক অভিনেতা ক্ৰিছ ৰকে ২০২৩ বৰ্ষৰ অস্কাৰ প্ৰদান অনুষ্ঠানৰ ঘোষক হিচাপে তেওঁলৈ অহা প্ৰস্তাৱ প্ৰত্যাখ্যান কৰাৰ খবৰে পুনৰ ভবাই তুলিছে সকলোকে যে ক্ৰিছ ৰকে এতিয়াও সেই ঘটনা পাহৰিব পৰা নাই নেকি বা এতিয়াও সেই ঘটনাৰ বাবে ভয়াৰ্ত হৈ আছে নেকি অভিনেতা গৰাকী !
২৮ আগষ্টত, ক্ৰিছে অস্কাৰৰ সেই দিনটোৰ কথা উল্লেখ কৰি জনাইছিল যে ঘটনাটোৰ পিছত তেওঁ আনকি ‘চুপাৰ বাউল’ বিজ্ঞাপনত অংশগ্ৰহণ কৰাৰ সুযোগো অস্বীকাৰ কৰিছিল।
কৌতুক অভিনেতাজনে ‘অস্কাৰ ২০২৩’ৰ ঘোষকৰ প্ৰস্তাৱটো অস্বীকাৰ কৰিছে। জানিবপৰা মতে ফিনিক্সৰ এৰিজোনা ফাইনেন্সিয়েল থিয়েটাৰত অনু্ষ্ঠান প্ৰদৰ্শন কৰাৰ সময়তে তেওঁ এই কথা স্পষ্টভাৱে জনায়।
ক্ৰিছে মন্তব্য কৰিছিল যে স্মিথৰ এই কাণ্ডত তেওঁ প্ৰকৃততে আঘাত পাইছিল। অস্কাৰ ২০২২ত, কৌতুক অভিনেতাজনে ‘শ্ৰেষ্ঠ ডকুমেণ্টৰী ছবি’ৰ পুৰস্কাৰ প্ৰদান কৰাৰ সময়তে স্মিথৰ পত্নী জাডা পিঙ্কেট স্মিথৰ মূৰত চুলি নথকাৰ বাবে কৌতুক কৰিছিল আৰু এলোপেচিয়া এৰেটা ৰোগত ভুগি থকা পিঙ্কেট স্মিথৰ “জি.আই. জেন ২”ৰ ভূমিকাক লৈ উত্তেজনা প্ৰকাশ কৰিছিল , যাৰ বাবে পত্নীৰ অপমান সহ্য কৰিব নোৱাৰি স্মিথে মঞ্চত প্ৰৱেশ কৰিয়েই ক্ৰিছক সকলোৰে সন্মূখত এটা চৰ মাৰিছিল।
এতিয়া প্ৰশ্ন হ’ল এই ঘটনাৰ পিছত দহবছৰলৈ স্মিথক অস্কাৰৰ পৰা বয়কট কৰাৰ পিছতো অস্কাৰ ২০২৩ত কিয় ঘোষক হিচাপে দায়িত্ব ল’বলৈ অস্বীকাৰ কৰিছে ক্ৰীছে ? নে ইয়াৰ আঁৰতো আছে কিবা গোপন ৰহস্য?
