অভিনেতা সুশান্ত সিং ৰাজপুতৰ মৃত্যুৰ চাৰিটা বছৰ সম্পূৰ্ণ কৰিবলৈ বাকী আছে মাত্ৰ কেইটামান দিন। এই দিনটো ওচৰ চাপি অহাৰ লগে লগে অভিনেতাজনৰ পৰিয়ালৰ সদস্যসকল শোকাহত হৈ পৰে। সময় পালে কেদাৰনাথলৈ গৈছিল সুশান্ত । তাৰ পৰাই তেওঁ নেটিজেনৰ লগত ছবি শ্বেয়াৰ কৰিছিল। সেয়েহে অলপতে সুশান্তৰ ভগ্নী শ্বেতা সিং কীৰ্তি কেদাৰনাথলৈ গৈ ভাতৃক স্মৰণ কৰে।
শ্বেতাই কেদাৰনাথ ভ্ৰমণৰ কেইবাখনো ছবি ছ’চিয়েল মিডিয়াত শ্বেয়াৰ কৰে। শ্বেতাই কেদাৰনাথৰ এজন সন্ন্যাসীৰ সৈতে সুশান্তই তোলা ছবিখন শ্বেয়াৰ কৰি ভাতৃক স্মৰণ কৰে। তেওঁ লিখিছে, “ চাৰি বছৰ আগতে চলিত মাহৰ ১৪ তাৰিখে আমি আমাৰ মৰমৰ সুশান্তক হেৰুৱালোঁ। আমি এতিয়াও সেইদিনা সঠিকভাৱে কি হৈছিল তাৰ উত্তৰ বিচাৰি আছো।”
শ্বেতাই আৰু লিখিছে, “মই প্ৰাৰ্থনা কৰিবলৈ কেদাৰনাথলৈ গৈছিলো। ভাইটিৰ স্মৃতি ভালকৈ অনুভৱ কৰিব পাৰিম বুলি ভাবিলোঁ। মই বৰ আৱেগিক হৈ পৰিলোঁ। কেদাৰনাথ পোৱাৰ লগে লগে আমাৰ চকুলো ওলাই আহিল। অলপ সময় খোজকাঢ়ি বহি মই কান্দিবলৈ ধৰিলোঁ। মোৰ চাৰিওফালে তেওঁৰ উপস্থিতি অনুভৱ কৰিলোঁ। তাক সাৱটি ধৰিবলৈ মন গ’ল। মই তেওঁ বহি থকা ঠাইত ধ্যান কৰি আছিলো ৷ তেতিয়া এনে লাগিল যেন সি সঁচাকৈয়ে মোৰ লগত, মোৰ কাষত আছে । আগতে কেতিয়াও তেনেকুৱা অনুভৱ কৰা নাছিলোঁ।”
উল্লেখ্য যে‘কেদাৰনাথ’ ছবিত সাৰা আলী খানৰ বিপৰীতে অভিনয় কৰিছিল সুশান্তই। সেই ছবিখনৰ শ্বুটিংৰ পৰা কেদাৰনাথৰ বহু ছবি শ্বেয়াৰ কৰিছিল প্ৰয়াত অভিনেতাজনে। সুশান্তৰ জ্যেষ্ঠ ভগ্নীয়ে তাত এজন সন্ন্যাসীৰ সৈতে প্ৰয়াত অভিনেতাগৰাকীৰ ছবিখনৰ বিষয়ে লিখিছিল। তেওঁ কয়-, “কালি ফাটা গাঁৱত ইণ্টাৰনেট সংযোগ নাছিল। গাড়ীত বহি আছিলো। ইনষ্টাগ্ৰাম খুলি সন্ন্যাসীজনৰ ভাইটিৰ সৈতে ছবিখন দেখিলোঁ। এই সন্ন্যাসীজনক লগ পোৱাৰ সিদ্ধান্ত লৈছিলো। ভগৱানৰ কৃপাত মই তেওঁক লগ পালোঁ।“
