জনপ্ৰিয় তথা প্ৰবীণ ভাৰতীয় অভিনেত্ৰী আশা পাৰেখলৈ আগবঢ়োৱা হৈছে ভাৰতৰ সৰ্বোচ্চ চলচ্চিত্ৰ সন্মান দাদাচাহেব ফালকে বঁটা ৷ আজি এই ঘোষণা কৰে কেন্দ্ৰীয় মন্ত্ৰী অনুৰাগ ঠাকুৰে। ভাৰতীয় চলচ্চিত্ৰলৈ তেওঁ আগবঢ়োৱা জীৱনজোৰা দৃষ্টান্তমূলক অৱদানৰ বাবে লাভ কৰিব এই বঁটা। জানিবপৰা মতে ৩০ ছেপ্টেম্বৰত অনুষ্ঠিত হ’ব এই ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠান ৷ বিজ্ঞান ভৱনত অনুষ্ঠিত হ’বলগীয়া এই বঁটা বিতৰণ অনুষ্ঠানত বঁটা প্ৰদান কৰিব ভাৰতৰ ৰাষ্ট্ৰপতিয়ে ।উল্লেখযোগ্য যে ২০২১ চনত, চুপাৰষ্টাৰ ৰজনীকান্তক এই দাদাচাহেব ফালকে বঁটা প্ৰদান কৰা হৈছিল ।
এই বৰ্ষৰ ৫২ সংখ্যক দাদাচাহেব ফালকে বঁটা বাছনিৰ জুৰীত আছিল আশা ভোচলে, হেমা মালিনী, পুনম ধিলন, টি এছ নাগভৰানা আৰু উদিত নাৰায়ণকে ধৰি চলচ্চিত্ৰ উদ্যোগৰ পাঁচগৰাকী সদস্য। গুৰুত্বপূৰ্ণ যে এইবাৰ এই বঁটা লাভ কৰিবলৈ সক্ষম হোৱা প্ৰবীণ তথা এসময়ৰ জনপ্ৰিয় বলীউড অভিনেত্ৰী পাৰেখ ভাৰতৰ কেন্দ্ৰীয় চলচ্চিত্ৰ প্ৰমাণপত্ৰ পৰিষদ (চেঞ্চৰ বোৰ্ড)ৰ প্ৰথম মহিলা অধ্যক্ষ আছিল। তেওঁ ১৯৯৮ চনৰ পৰা ২০০১ চনলৈ এই পদত অধিষ্ঠিত আছিল। পৰৱৰ্তী সময়ত তেওঁ চিনে এণ্ড টেলিভিছন আৰ্টিষ্ট এছ’চিয়েচন (চিআইএনটিএ)ৰ কোষাধ্যক্ষ হয়।
১৯৪২ চনৰ ২ অক্টোবৰত জন্মগ্ৰহণ কৰিছিল এইগৰাকী অভিনেত্ৰী আশা পাৰেখে ৷ শিশু অভিনেতা হিচাপে কৰ্মজীৱন আৰম্ভ কৰা অভিনেত্ৰী গৰাকীক ‘বেবী আশা পাৰেখ’ বুলিও জনা যায়। ১৯৫২ চনত মুক্তি লাভ কৰা ‘মা’ আছিল তেওঁৰ প্ৰথম চলচ্চিত্ৰ । পিছত তেওঁক ‘বাপ-বেটি’ (১৯৫৪)ত দেখা পোৱা গৈছিল ৷ কিন্তু ছবিখনে দৰ্শকক প্ৰভাৱিত কৰাত ব্যৰ্থ হৈছিল৷ অৱশ্যে কেইটামান শিশুৰ চৰিত্ৰ কৰাৰ পিছত, অভিনেত্ৰী গৰাকীয়ে স্কুলীয়া শিক্ষা অব্যাহত ৰখাৰ সিদ্ধান্ত লয় আৰু চলচ্চিত্ৰৰ পৰা বিৰতি লয়।
কিন্তু পুনৰ ১৯৫৯ চনত, তেওঁ শাম্মী কাপুৰৰ সৈতে ‘দিল দেকে দেখ’ত মুখ্য অভিনেত্ৰী হিচাপে অভিনয় কৰে।অভিনেত্ৰী গৰাকীৰ কেইখনমান জনপ্ৰিয় চলচ্চিত্ৰৰ ভিতৰত আছে ‘জব প্যাৰ কিচি চে হোতা হে’ (১৯৬১), ‘মেৰী চুৰট তেৰী আঁখে’ (১৯৬৩), লাভ ইন টকিঅ'(১৯৬৬), ‘আয়া চাৱন ঝুমকে’ (১৯৬৯)কে আদি কৰি বহুকেইখন জনপ্ৰিয় ছবি । ১৯৯৯ চনত তেওঁ অভিনয় কৰা অন্তিমখন চলচ্চিত্ৰ আছিল ‘সৰ আঁখ’ পৰ’।গুৰুত্বপূৰ্ণ যে ১৯৯২ চনত ভাৰত চৰকাৰে তেওঁক পদ্মশ্ৰী সন্মানেৰেও সন্মানিত কৰিছিল।
