২১ বছৰৰ মুৰত ভাৰতীয় সুন্দৰীয়ে মিছ ইউনিভার্ছৰ খিতাপ দখল কৰাৰ বাতৰিয়ে দেশবাসীক আনন্দিত কৰি তুলিছিল ৷ বিশ্বৰ শীর্ষ সৌন্দর্য প্ৰতিযোগিতাৰ অন্যতম মিছ ইউনিভার্ছৰ খিতাপ দখল কৰাতো মুখৰ কথা নহয় ৷ সৌন্দর্যৰ লগতে মেধাৰ পৰিচয় দিব পাৰিলেহে এই অভিজাত সৌন্দর্য প্ৰতিযোগিতাৰ মঞ্চত প্ৰৱেশ কৰা সম্ভৱ ৷ বিশ্বৰ বিভিন্ন প্ৰান্তৰ সুন্দৰীৰ বাবে সপোনৰ এই প্ৰতিযোগিতাত বিজয়ী হ’লে লাভ কৰে বহু বিলাসী পুৰষ্কাৰ ৷ এইবাৰ ভাৰতীয় সুন্দৰী হাৰনাজেও লাভ কৰিছে কেইবাটাও আকর্ষণীয় পুৰষ্কাৰ ৷ ইয়াৰ ভিতৰত অন্যতম হিচাপে খিতাপ দখল কৰাৰ পিছত হাৰনাজৰ শিৰত পিন্ধাই দিয়া মুকুট ৷মিছ ইউনিভার্ছৰ এই মুকুটটোৰ মূল্য হৈছে ৩৭ কোটি টকা ৷ তদুপৰি খিতাপ দখল কৰাৰ পাছত হাৰনাজক প্ৰাইজমানি হিচাপে প্ৰদান কৰা হৈছে ১.৮৯ কোটি টকা ৷
ইয়াৰ লগতে হাৰনাজে নিউয়র্কত থকা মিছ ইউনিভার্ছৰ এপার্টমেণ্টত এবছৰৰ বাবে থাকিব পাৰিব ৷ বর্তমানৰ মিছ ইউ এছ এৰ লগত ভাৰতীয় সুন্দৰীগৰাকী একেলগে এই এপার্টমেন্টত থাকিব পাৰিব ৷ এই এপার্টমেণ্টত খোৱা -লোৱাৰ পৰা আৰম্ভ কৰি পিন্ধা-ওৰালৈকে সকলো খৰচ বহন কৰিব মিছ ইউনিভার্ছ প্ৰতিযোগিতাৰ আয়োজক মণ্ডলীয়ে ৷ আনহাতে,এবছৰৰ বাবে হাৰনাজক আৱৰি থাকিব বিভিন্ন ক্ষেত্ৰৰ বিশেষজ্ঞই ৷ ফটোগ্ৰাফাৰ, দন্ত চিকিৎসক,ষ্টাইলিষ্ট, চর্মৰোগ বিশেষজ্ঞ, নিউ্ট্ৰিচিয়ানক ধৰি এটা বৃহৎ গ্ৰুপে যত্ন ল’ব হাৰনাজৰ ৷ ইয়াৰ সমস্ত ব্যয় বহন কৰিব মিছ ইউনিভার্ছৰ আয়োজকসকলে ৷ তদুপৰি বিশ্বৰ বিখ্যাত কার্যসূচী, পার্টী, প্ৰিমিয়াৰ আৰু ছবি প্ৰদর্শনীত ভি আই পি অতিথি হিচাপে উপস্থিত থাকিব পাৰিব হাৰনাজ ৷ ইয়াৰ বাবে বিশ্বৰ যিকোনো প্ৰান্তলৈ কৰা ভ্ৰমণ আৰু থকা-খোৱাৰ সমস্ত ব্যয় বহন কৰিব সৌন্দর্য প্ৰতিযোগিতাখনিৰ আয়োজকে ৷
