অতি শীঘ্ৰেই মুক্তিলাভ কৰিবলগীয়া ছবি ‘বিক্ৰম বেধা’ৰ নিৰ্মাতাসকলে অৱশেষত উন্মোচন কৰে ছবিখনৰ বহু প্ৰত্যাশিত ট্ৰেইলৰ ভিডিঅ’ য’ত মুখ্য চৰিত্ৰত অভিনয় কৰিছে বলীউডৰ দুই জনপ্ৰিয় অভিনেতা ঋত্বিক ৰৌছন আৰু ছেইফ আলী খানে।
পুষ্কৰ আৰু গায়ত্ৰীয়ে পৰিচালনা কৰা ছবিখনৰ ট্ৰেইলৰ ভিডিঅ’টোৰ আৰম্ভণিতে বেধাৰ চৰিত্ৰত অভিনয় কৰা ঋত্বিক আৰু বিক্ৰমৰ চৰিত্ৰত অভিনয় কৰা বলীউডৰ জনপ্ৰিয় অভিনেতা ছেইফ আলী খানক এখন টেবুলত মুখামুখিকৈ বহি কথা পাতি থকা দেখা গৈছে আৰু সেই সময়তে ঋত্বিকে ছেইফক উদ্দেশ্যি কিবা কৈছে ৷ ঋত্বিকে এটা আচৰিত কাহিনী ক’বলৈ বিচাৰিছে আৰু সেইটো ছেইফক সাৱধান আৰু ধৈৰ্য্যৰে শুনিবলৈ কৈছে বেধাৰ চৰিত্ৰ ৰূপায়ণ কৰা অভিনেতা গৰাকীয়ে ।ট্ৰেইলৰটোত দৰ্শকে দেখিবলৈ পাব ঋত্বিক অৰ্থাৎ বেধাৰ এক ভয়াবহ অতীত ৷ দেখা পাব তেওঁৰ ভাতৃৰ চৰিত্ৰত অভিনয় কৰা ৰোহিত চাৰাফৰ সৈতে তেওঁৰ সংযোগ আৰু লগতে আৰু বহু আকৰ্ষণীয় দৃশ্য।
আনহাতে ট্ৰেইলৰটোৰ শেষৰ ফালে বেধাই বিক্ৰমক কোৱা এটা সংলাপে আকৰ্ষিত কৰিছে দৰ্শকক ৷ বেধাই কৈছে যে ভাল আৰু বেয়াৰ মাজৰ পৰা কোনোবা এটা বাছি লোৱাটো সহজ। কিন্তু এই কাহিনীটোত দুয়োটাই বেয়া।
শেহতীয়াকৈ ঋত্বিক ৰৌছনেও তেওঁৰ ইনষ্টাগ্ৰাম হেণ্ডেলত ছবিখনৰ পোষ্টাৰ আপলোড কৰাৰ কিছু সময়ৰ পিছতেই তেওঁৰ অনুৰাগীসকলৰ পৰা মৰম আৰু শুভেচ্ছা লাভ কৰিছে ।
আনহাতে ঋত্বিকৰ পিতৃ ৰাকেশ ৰৌছন,জনপ্ৰিয় অভিনেতা অভিষেক বচ্চনেও সামাজিক মাধ্যমত বহুল ভাৱে সমাদৰ লাভ কৰা এই পোষ্টটোত মন্তব্য প্ৰদান কৰিছে।
আৰ মাধৱন আৰু বিজয় সেথুপতি অভিনীত ২০১৭ চনৰ একে নামৰ তামিল ছবিখনৰ পুনৰ্নিৰ্মাণ হৈছে ‘বিক্ৰম বেধা’। হিন্দী সংস্কৰণত মূল চৰিত্ৰত অভিনয় কৰিছে ৰধিকা আপ্তে, ৰোহিত সৰফ আৰু সত্যদীপ মিশ্ৰ আদি জনপ্ৰিয় অভিনেতা সকলে । অহা ৩০ ছেপ্টেম্বৰত ছবিগৃহত মুক্তি লাভ কৰিব ছবিখনে ।
