১৫ বছৰ পূর্বে ছবিজগতত প্ৰৱেশ কৰিছিল ইমৰাণ খানে । নতুন নায়কে ‘জানে তু ইয়া জানে না’ চিনেমাৰ জৰিয়তে দৰ্শক মৰম লাভ কৰিছিল। প্ৰথমখন ছবিৰ জৰিয়তেই তেওঁ নিজৰ আকর্ষনীয় চেহেৰাৰ বাবে দর্শকৰ সমাদৰ লাভ কৰে ৷ এই ছবিখন মুক্তি পোৱাৰ পিছত ইমৰানে বহু ছবিত চুক্তিবদ্ধ হয়। ইমৰাণৰ শেষৰখন মুক্তিপ্ৰাপ্ত ছবি আছিল নিখিল আদৱানীৰ ‘কট্টি বাট্টি’। আঠ বছৰ ধৰি পৰ্দাত দেখা পোৱা নাছিল অভিনেতাগৰাকীক। কেইবাবছৰ ধৰি ডাঙৰ পৰ্দাৰ পৰা আঁতৰি আছিল ইমৰাণ। শুনা গৈছে যে ইমৰানে পুনৰ ডাঙৰ পৰ্দাত কামৰ প্ৰস্তুতি আৰম্ভ কৰিছে। ছ’চিয়েল মিডিয়াত নায়কৰ মন্তব্যক কেন্দ্ৰ কৰিয়েই আৰম্ভ হৈছিল জল্পনা-কল্পনা।
শেহতীয়াকৈ প্ৰবীণ অভিনেত্ৰী জিনাত আমনৰ বিষয়ে চৰ্চিত হৈছে। কিছুদিন পূৰ্বে এটা বিজ্ঞাপনত তেওঁক বেলেগ ধৰণেৰে দৰ্শকে দেখিছিল। ইমৰাণৰ অনুৰাগীসকলে সেইটো দেখি দুখ প্ৰকাশ কৰিছে। জিনাতৰ ইনষ্টাগ্ৰাম পোষ্টত ইমৰাণৰ এজন অনুৰাগীয়ে মন্তব্য কৰি কয় যে, “জিনাতজীও আকৌ কেমেৰাৰ সন্মুখত দেখা গ’ল মই মোৰ ইমৰাণক আকৌ কেতিয়া দেখা পাম?” এই মন্তব্য নায়কৰ চকুৰ পৰা সাৰি নাযায়। নায়কেও ধেমেলীয়াকৈ উত্তৰ দিলে। ইমৰানে তেওঁৰ অদিতি নামৰ অনুৰাগীলৈ লিখিছে, “ঠিক আছে অদিতি, মোৰ মন্তব্যই যদি এক মিলিয়ন (১০ লাখ) লাইক পায়, তেন্তে আপোনাৰ সপোন বাস্তৱায়িত হ’ব।”
ইমৰাণৰ এই মন্তব্য দেখি বিভিন্ন জল্পনা-কল্পনা আৰম্ভ হৈছে। প্ৰিয় নায়কৰ পৰা উত্তৰ পোৱাৰ পিছত অনুৰাগীসকলে ইমৰাণৰ এই চৰ্ত পূৰণ কৰিবলৈ সকলোকে অনুৰোধ জনায়। নায়কৰ এই মন্তব্যই ইতিমধ্যে লাখৰ ওপৰত লাইক পাইছে। কেৱল সেয়াই নহয় অনুৰাগীসকলে সঁচাকৈয়ে নায়কজনক পুনৰ পৰ্দাত চাব বিচাৰে। অৱশ্যে উদ্যোগটোত তেওঁৰ আন এক পৰিচয় আছে। অভিনেতা আমিৰ খানৰ ভতিজা।
