বলীউডৰ এগৰাকী শক্তিশালী অভিনেত্ৰী কংগনা ৰাণাৱট যি কেইবাখনো হিন্দী ছবিত শক্তিশালী অভিনয় কৰি দৰ্শকৰ সমাদৰ লাভ কৰিবলৈ সক্ষম হৈছে ৷ শেহতীয়াকৈ চলচ্চিত্ৰ পৰিচালনাৰ ক্ষত্ৰতো আগবাঢ়িছে অভিনেত্ৰী গৰাকী ৷ কংগনা ৰাণাৱটে এইবাৰ অভিনয়ৰ লগতে একক পৰিচালনা কৰিছে “ইমাৰ্জেন্সি” নামৰ এখন ঐতিহাসিক নাটকৰ ৷ যাৰ কিছু দৃশ্যাংশ গ্ৰহণ কৰা হৈছে অসমত ৷
‘দ্য চেণ্টিলেন’ বাতৰি কাকতৰ এক প্ৰতিবেদন অনুসৰি সোমবাৰে বলীউডৰ জনপ্ৰিয় অভিনেত্ৰী গৰাকীয়ে “ইমাৰ্জেন্সি”ৰ বাবে অসমত হোৱা চিত্ৰগ্ৰহণৰ কাম সমাপ্ত কৰে।উল্লেখনীয় যে কংগনাই ছবিখনৰ চেটৰ পৰা ধাৰাবাহিকভাৱে সামাজিক মাধ্যমত ছবিসমূহ পোষ্ট কৰি আছিল । ইয়াৰ পূৰ্বে ছেপ্টেম্বৰ মাহত কংগনাই দিল্লীত “ইমাৰ্জেন্সি”ৰ চিত্ৰগ্ৰহণ সমাপ্ত কৰিছিল।
কংগনা ৰাণাৱটৰ প্ৰথম একক পৰিচালনা “ইমাৰ্জেন্সি”। ছবিখনত কংগনাই প্ৰয়াত প্ৰাক্তন প্ৰধানমন্ত্ৰী তথা ৰাজনীতিবিদ গৰাকীৰ চৰিত্ৰত শক্তিশালী অভিনয় কৰিছে ৷ ছবিখনৰ কাহিনীৰ কেন্দ্ৰবিন্দু হৈছে ভাৰতৰ প্ৰাক্তন তথা প্ৰথম মহিলা প্ৰধানমন্ত্ৰী ইন্দিৰা গান্ধীৰ জীৱন। কংগনাৰ উপৰিও ছবিখনত অনুপম খেৰ, মহিমা চৌধুৰী, বিষক নায়াৰ, আৰু শ্ৰেয়াছ তালপাদেও আদিৰ দৰে বহুকেইগৰাকী জনপ্ৰিয় অভিনেতাই গুৰুত্বপূৰ্ণ অভিনয় কৰিছে।
অৱশ্যে ছবিখনৰ আনুষ্ঠানিক মুক্তিৰ বাবে নিৰ্দিষ্ট তাৰিখ এতিয়াও ঘোষণা কৰা হোৱা নাই। “ইমাৰ্জেন্সি”ৰ উপৰিও বলীউড তাৰকা কংগনা ৰাণাৱটে পৰিচালক সৰ্বেশ মেৱাৰাৰ “তেজস” ছবিখনতো অভিনয় কৰি আছে ৷ য’ত তেওঁক ভাৰতীয় বায়ুসেনাৰ পাইলটৰ চৰিত্ৰত দেখা পোৱা যাব ।
