আনুষ্ঠানিকভাৱে নেটফ্লিক্সৰ হিট ড্ৰামা শৃংখলা ‘স্কুইড গেম’ৰ দ্বিতীয় সংস্কৰণ পুনৰ ৰাইজৰ মাজলৈ অহাৰ কথা নিশ্চিত কৰি দেওবাৰে ষ্ট্ৰীমিং প্লেটফৰ্মৰ দ্বাৰা মুকলি কৰা হ’ল এটা চমু টিজাৰ ।
‘স্কুইড গেম’ৰ লেখক, পৰিচালক আৰু প্ৰযোজক হোৱাঙে তেওঁৰ এক বিবৃতিত কয়, “যোৱা বছৰ ‘স্কুইড গেম’ৰ প্ৰথম ছিজনটো জীৱন্ত কৰিবলৈ ১২ বছৰ লাগিছিল। কিন্তু ‘স্কুইড গেম’ নেটফ্লিক্সৰ আটাইতকৈ জনপ্ৰিয় শৃংখলা হ’বলৈ মাত্ৰ ১২ দিন লাগিছিল। ‘স্কুইড গেম’ৰ লেখক, পৰিচালক আৰু প্ৰযোজক হিচাপে, সমগ্ৰ বিশ্বৰ অনুৰাগীসকলৰ বাবে ই এক বৃহৎ খলকনিৰ সৃষ্টি কৰিছে । আমাৰ অনুষ্ঠানটো চোৱা আৰু মৰম দিয়াৰ বাবে আপোনালোকক ধন্যবাদ।”
আনহাতে বিবৃতিটোৱে নতুন চিজনৰ কাহিনীটোৰ বিষয়ে প্ৰকাশ কৰিছিল যে, নায়ক চেয়ং গি-হুন (লী জাং-জে) আৰু মুখাপিন্ধা বিৰোধী ফ্ৰণ্ট মেন (লী বায়ুং-হুন) দুয়ো পুনৰ ঘূৰি আহিব।
উল্লেখযোগ্য যে, ‘স্কুইড গেম’ৰ প্ৰথম চিজনটো নেটফ্লিক্সৰ এতিয়ালৈকে আটাইতকৈ ডাঙৰ টিভি শ্ব’ হিচাপে চিহ্নিত হৈছে ৷ মুক্তিৰ প্ৰথম চাৰি সপ্তাহতে ‘স্কুইড গেম’ৰ ১.৬৫ বিলিয়ন ঘণ্টা দৰ্শন কৰা কাৰ্য্যই নিশ্চয়কৈ এক অভিলেখ সৃ্ষ্টি কৰিবলৈকো সক্ষম হৈছে । জানুৱাৰীত, নেটফ্লিক্সৰ সহ-মুখ্য কাৰ্যবাহী বিষয়া টেড চাৰাণ্ডোছে আনুষ্ঠানিকভাৱে নিশ্চিত কৰিছিল যে ইয়াৰ আৰু অধিক খণ্ড আহি আছে।
