আৰ চি প্ৰডাকচন প্ৰযোজনাত আৰু ঝুলন মহন্তৰ পৰিচালনাত নির্মাণ হোৱা নতুন অসমীয়া ছবি “সুন্দৰপুৰ কেঅছ”ৰ গীত আৰু গীতৰ দৃশ্যাংশ মুকলি কৰা হয় ৷ মহানগৰীৰ পাঞ্জাবাৰীত স্থিত আইদেউ ছবিগৃহত আয়োজিত এক অনুষ্ঠানত জনপ্ৰিয় কণ্ঠশিল্পী গায়ত্ৰী হাজৰিকাৰ কথা আৰু কণ্ঠৰ “কিয় জানো আজি”,মঞ্জুলা হাজৰিকাৰ কথাৰে বলিউডৰ জনপ্ৰিয় কণ্ঠশিল্পী ছানৰ কণ্ঠত”অচিনাকী এই চহৰ” শীর্ষক গীত আৰু দৃশ্যাংশ মুকলি কৰা হয় ৷ গায়ত্ৰী হাজৰিকাৰ কথা আৰু কণ্ঠৰ “কিয় জানো আজি” গীতটি মুকলি কৰে বিশিষ্ট কণ্ঠশিল্পী মনীষা হাজৰিকা, শান্তা উজীৰ, জে পি দাস, সমৰ হাজৰিকা আৰু গীতিকাৰ তথা জ্যেষ্ঠ সাংবাদিক গৌতম শৰ্মাই। ইপিনে ছানৰ কণ্ঠত”অচিনাকী এই চহৰ” শীর্ষক গীতটি বিশিষ্ট কণ্ঠশিল্পী পুলক বেনার্জী, বিশিষ্ট অভিনেত্রী চেতনা দাস, ডঃ জয়ন্ত দাসে মুকলি কৰে । একেটা অনুষ্ঠানতে মহাপুৰুষ শ্ৰীমন্ত শংকৰদেৱ বিৰচিত কীর্ত্তণ (পাষণ্ড মর্দ্দণ)ক মুখ্য কৰি ছবিখনৰ কাহিনীৰ সৈতে ৰিজনি খোৱাকৈ জনপ্ৰিয় কণ্ঠশিল্পী অংগৰাগ মহন্ত(পাপন)ৰ কণ্ঠত বাণীৱদ্ধ কৰা ঘোষাটিৰো মুক্তি দিয়া হয় ৷ এই ঘোষাটিৰ দৃশ্য-শ্ৰৱ্য মুকলি কৰে বিশিষ্ট শিল্পী পুলক বেনার্জী, বিশিষ্ট চিকিৎসক হিতেশ বৰুৱা আৰু অসমীয়া খবৰৰ কাৰ্যবাহী সম্পাদক বিশ্বজিৎ দাসে ৷ ছবিখনৰ গীত আৰু গীতৰ দৃশ্যাংশ মুকলি অনুষ্ঠানত উপস্থিত থাকি সৌস্তভ বৰ্ধন কৰে দক্ষিনপাট সত্ৰৰ সত্ৰাধিকাৰ শ্ৰীশ্ৰী ননীগোপাল দেৱ গোস্বামীয়ে ।
উল্লেখ্য যে এই ছবিখনৰ দৃশ্য গ্ৰহন অসমৰ লগতে অৰুনাচলৰ বিভিন্ন স্থানত সম্পন্ন কৰা হৈছে ৷ অহা ছেপ্তেম্বৰ মাহত বোলছবি খন ছবিগৃহত মুক্তি দিয়া হ’ব ৷ ‘সুন্দৰপুৰ কেঅছ’ ঝুলনকৃষ্ণ মহন্তৰ কাহিনী,চিত্রনাট্য পৰিচালনা আৰু সম্পাদনাৰ দ্বিতীয়খন পূৰ্ণ দৈৰ্ঘৰ কথাছবি। মহাপুৰুষ শ্রী মন্ত শংকৰদেৱে গঢ়িব খোজা এখন সুন্দৰ অসমৰ প্ৰতিচ্ছবিৰে ছবিখনৰ কাহিনী সজোৱা হৈছে ৷ ছবিখনৰ সংগীত পৰিচালনা কৰিছে অসম ৰাজ্যিক চলচ্চিত্র বঁটাৰে সন্মানীত হোৱা সৌৰভ মহন্তই ৷
তিনিওটি গীতৰ সংমিশ্ৰণৰ দায়িত্বত আছে ক্রমে মুম্বাইস্থিত ত্রিহংকু লহকৰ আৰু ভাস্কৰ শৰ্মা। ৰাষ্ট্ৰীয় বঁটা প্রাপক শব্দযন্ত্রী দেৱজিৎ গায়ন, অসমৰ এজন বিশিষ্ট চিত্রগ্রহণকাৰী চন্দ্ৰ কুমাৰ দাসে চিত্রগ্রহণ কৰা ছবিখনত অভিনয় কৰিছে বিশিষ্ট অভিনেতা অৰুণ নাথ, ৰাজীৱ গোস্বামী, জলি লস্কৰ, গাৰ্গী দত্ত, বণী দেউৰীকে ধৰি বহুকেইগৰাকী শিল্পীয়ে ৷ ছবিখনতবিশেষ ভূমিকাত দেখা যাব ৰাষ্ট্ৰীয় নাট্য বিদ্যালয় দিল্লীৰ স্নাতক দুই নৱাগত পার্থ প্রতিম হাজৰিকা আৰু শিল্পী দত্তক।
অনুষ্ঠানত অসমৰ সংবাদ মাধ্যমৰ উপৰিও সাহিত্য-সংগীত ছবি জগতৰ কেইবা গৰাকীয়ো বিশিষ্ট ব্যক্তি উপস্থিত থাকে। এই অনুষ্ঠানটোৰ আঁত ধৰে বিশিষ্ট চলচ্চিত্ৰ সাংবাদিক-আলোচক, প্ৰযোজক, পৰিচালক আৰু অভিনেতা নয়ন প্ৰসাদে ।
