পেছাত তেওঁ এজন ব্যৱসায়ী আৰু উদ্যোগপতি। কিন্তু ৰাজ কুন্দ্ৰাক বলীউডৰ অভিনেত্ৰী শিল্পা শ্বেট্টীৰ স্বামী হিচাপে বেছি পৰিচিত। দুবছৰমান আগতে পৰ্ণগ্ৰাফী গোচৰত তেওঁৰ নাম জড়িত আছিল। যাৰ বাবে তেওঁ বহুদিন কাৰাবাস খাটিছিল। যদিও ৰাজে পিছত জামিন পাইছিল আৰু তেওঁ জেলৰ পৰা মুক্তি পাইছিল, তথাপিও তেওঁ জীৱনৰ সেই অধ্যায়টো পাহৰা নাছিল। এইবাৰ তেওঁ সেই অধ্যায়টো চিনেমাৰ পৰ্দাত উপস্থাপন কৰাৰ পৰিকল্পনা কৰিছে। ৰাজৰ বায়’পিক নিৰ্মাণ হ’বলৈ ওলাইছে। সেই বায়’পিকখনত ৰাজৰ জীৱনৰ কঠিন অধ্যায়টো সন্নিবিষ্ট কৰা হৈছে। ৰাজে নিজেই তেওঁৰ বায়’পিকখনত মুখ্য চৰিত্ৰত অভিনয় কৰিবলৈ ওলাইছে। শিল্পাৰ স্বামীয়ে এই ছবিৰ জৰিয়তে বলীউডত অভিনেতা হিচাপে আত্মপ্ৰকাশ কৰিবলৈ ওলাইছে।
২০২১ চনত পৰ্ণগ্ৰাফী গোচৰৰ সৈতে জড়িত আছিল শিল্পী শ্বেট্টীৰ স্বামী ৰাজ কুন্দ্ৰা। অভিযোগৰ ভিত্তিত তেওঁ সেই বছৰ কাৰাগাৰলৈ যাবলগীয়া হৈছিল ৷ প্ৰায় দুমাহ কাৰাগাৰত থকা ৰাজক মুকলি কৰি দিয়া হয়। মুম্বাইৰ আৰ্থাৰ ৰোড জেলত ৬৩ দিন কটালে ৰাজে। তেওঁ নিজৰ বায়’পিকখনত সেই ৬৩ দিনটোক আটাইতকৈ বেছি অগ্ৰাধিকাৰ দিবলৈ ওলাইছে। ৰাজৰ এই বায়’পিকখন কোনে পৰিচালনা কৰিব সেয়া এতিয়াও জানিব পৰা হোৱা নাই। অৱশ্যে সৃষ্টিশীল দৃষ্টিকোণৰ পৰা ৰাজ নিজেই ছবিখনৰ সৈতে ওতঃপ্ৰোতভাৱে জড়িত হ’ব বুলি শুনা গৈছে। শিল্পাৰ স্বামীয়ে অভিনয়ৰ লগতে প্ৰডাকচনৰ কামতো গুৰুত্ব দিব।
ৰাজে ছবিখনৰ চিত্ৰনাট্য শুদ্ধকৈ লিখাৰ ওপৰত অধিক গুৰুত্ব দিছে। ৰাজৰ জেললৈ যোৱাৰ পৰা আৰম্ভ কৰি তাত ৬৩ দিন কটোৱাৰ পৰা আৰম্ভ কৰি জামিন পোৱালৈকে তেওঁ নিজৰ বায়’পিকখনত সকলো কথা প্ৰদর্শন কৰিব বিচাৰে। ছবিখনৰ চিত্ৰনাট্য লিখা সম্পূৰ্ণ হোৱাৰ পিছতহে ছবিখনৰ শ্বুটিং আৰম্ভ হ’ব।
