২০০০ চনত ‘কাহো না প্যাৰ হায়’ ছবিৰ জৰিয়তে ডাঙৰ পৰ্দাত অভিষেক ঘটিছিল আমিষা পেটেলৰ ৷ প্ৰথমখন ছবি ছুপাৰহিট হয় । দ্বিতীয়খন ছবিও ব্লকবাষ্টাৰ ৷ হৃত্বিক ৰোশনৰ বিপৰীতে অভিনয় কৰা ছবিখনে আমিষাক আকাশলংঘী সফলতা প্ৰদান কৰিছিল। ইয়াৰ পিছত আমিষাই ‘বদ্ৰী’ নামৰ এখন ছবিত অভিনয় কৰিছিল। বক্স অফিচতো সফলতা লাভ কৰিছিল। একেৰাহে সফলতা লাভ কৰাৰ বাবে আমিষাই উদ্যোগটোত ছবি পোৱাত কোনো সমস্যা নাছিল। অমিষাৰ তৃতীয়খন ছবি ‘গডাৰ এক প্ৰেম কথা’ই প্ৰথম দুখন ছবিৰ সফলতাক অতিক্ৰম কৰিছিল ৷। হিন্দী চিনেমাত ক্ৰমাৎ জনপ্ৰিয় হৈ পৰিল আমিষা। কিন্তু অভিনেত্ৰীগৰাকীৰ যিমান দ্ৰুতগতিত সফলতা আহিল, বিফলতাও সিমান সোনকালে আহিল। ‘আপ মুঝে আচ্ছে লগানে লাগে’, ‘ক্ৰান্তি’, ‘ক্যা ইয়ে প্যাৰ হায়’, ‘য়ে হেয় জলৱা’, ‘পাৰৱানা’ ইত্যাদিকে ধৰি আমিষাৰ কেইবাখনো চিনেমা হিট হৈছিল। ডাঙৰ নায়কৰ সৈতে পৰ্দা শ্বেয়াৰ কৰিও এই ছবিবোৰত অমিষাই একো কৰিব নোৱাৰিলে। ধাৰাবাহিক ব্যৰ্থতাৰ পিছত ব্যক্তিগত জীৱনত ইটোৰ পিছত সিটো বিতৰ্কৰ ফলত অভিনেত্ৰীগৰাকীৰ ভাবমূৰ্তি ক্ষতিগ্ৰস্ত হয় যদিও ‘হামৰাজ’ ছবিখনেৰে পুনৰ আশাৰ সঞ্চাৰ সৃষ্টি কৰে ৷
সেই সময়ত পৰিচালক বিক্ৰম ভটৰ সৈতে আমিষাৰ প্ৰেমৰ সম্পৰ্কই বহু বিতৰ্কৰ সৃষ্টি কৰিছিল। যদিও আমিষাই নিজেই একো স্বীকাৰ কৰা নাছিল। শুনা যায় যে ‘আপ মুঝে আচ্ছে লগনে লগা’ ছবিত অভিনয়ৰ বাবেই বিক্ৰমক আমিষাই লগ পাইছিল। লাহে লাহে তেওঁলোকৰ মাজত প্ৰেম হয় আৰু তাৰ পিছত একেলগে থাকিবলৈ লয় । অৱশ্যে পিছত আমিষাই বিক্ৰমৰ বিৰুদ্ধে ধন চুৰি কৰাৰ অভিযোগ উত্থাপন কৰে। এই সকলোবোৰ কথাকে লৈ যথেষ্ট বিভ্ৰান্তিৰ সৃষ্টি হৈছে। পাঁচ বছৰৰ ভিতৰতে দুয়োৰে সম্পৰ্ক ভাঙি গ’ল। সেই ঘটনাৰ ইমান বছৰৰ পাছত এইবাৰ অভিনেত্ৰীগৰাকীয়ে নিজৰ প্ৰেম জীৱনৰ বিষয়ে মুকলিকৈ প্ৰকাশ কৰিছে ৷ তেওঁৰ ছবি ‘গডাৰ’ৰ দ্বিতীয় খণ্ড অতি সোনকালে মুক্তি পাব। সেই বিষয়ে আশাবাদী অভিনেত্ৰীগৰাকী। কেৰিয়াৰৰ এটা দীঘলীয়া পৰ্যায়ত তেওঁ সফলতা দেখা নাপালে। তাৰ বাবে তেওঁ পোনপটীয়াকৈ বিক্ৰমৰ সৈতে তেওঁৰ সম্পৰ্ককে দোষাৰোপ কৰে। আমিষাই কয়, ‘মোৰ জীৱনত দুটা সম্পৰ্ক আছিল। দুয়োটাই মোৰ কেৰিয়াৰৰ ক্ষতি কৰিছে। যোৱা ১২-১৩ বছৰ ধৰি মই পুৰুষ বর্জিত জীৱন কটায় আহিছো ৷ মই শান্তি বিচাৰো মই ইয়াতকৈ বেছি একো নিবিচাৰো।” ইয়াৰ উপৰিও আমিষাই কয় যে কোনো ছুপাৰষ্টাৰ বা ইণ্ডাষ্ট্ৰীৰ কোনো ডাঙৰ তাৰকাৰ সৈতে সম্পৰ্ক থাকিলেহে সুবিধা পোৱা যায়। অন্যথা গ্ৰহণযোগ্যতাৰ প্ৰশ্ন উত্থাপন হয়। ১১ আগষ্টত মুক্তি পাব গডাৰ ২। এতিয়া অভিনেত্ৰীগৰাকীয়ে এই ছবিখনৰ মুক্তিৰ বাবে অপেক্ষা কৰি আছে।
