‘ডন ৩’ ছবিখনক লৈ বলিউডত যথেষ্ট চৰ্চা আৰম্ভ হৈছে। আনকি শ্বুটিং আৰম্ভ হোৱাৰ আগতেই ইটোৰ পিছত সিটো জল্পনা-কল্পনাই চর্চা লাভ কৰিছে ৷ ‘ডন’ আৰু ‘ডন ২’ৰ পিছত শ্বাহৰুখ খানে ‘ডন ৩’ লৈ ঘূৰি অহাৰ কথা আছিল। কিন্তু তেওঁ এই ছবিখনত অভিনয় কৰিবলৈ মান্তি নহ’ল। উদ্যোগটোত বহু জল্পনা-কল্পনা আৰু হুলস্থুলৰ অন্তত ‘ডন ৩’ ছবিখনৰ বাবে চূড়ান্ত কৰা হৈছে ৰণবীৰ সিঙক। অৱশ্যে ‘ডন’ৰ চৰিত্ৰৰ বাবে ৰণবীৰৰ নাম চূড়ান্ত কৰা হৈছে যদিও আন চৰিত্ৰৰ বিষয়ে এতিয়াও জল্পনা-কল্পনা চলি আছে। ছবিখনৰ আন আন চৰিত্ৰসমূহৰ ভিতৰত অন্যতম গুৰুত্বপূৰ্ণ চৰিত্ৰ হৈছে ৰোমা। প্ৰিয়ংকা চোপ্ৰাক ‘ডন’ আৰু ‘ডন ২’ত ৰোমা হিচাপে দেখা গৈছিল। ‘ডন ৩’ ছবিখনলৈ প্ৰিয়ংকা ঘূৰি আহিবনে?
২০০৬ চনত শ্বাহৰুখ আৰু প্ৰিয়ংকাই ফাৰহান আখতাৰৰ ‘ডন’ ছবিত প্ৰথমবাৰৰ বাবে একেলগে কাম কৰিছিল। ইয়াৰ পিছত ২০১১ চনত তেওঁলোকে পুনৰ ‘ডন ২’ ছবিত অভিনয় কৰে। তেতিয়াই শ্বাহৰুখ-প্ৰিয়ংকাৰ মাজত সম্পর্ক গঢ় লৈ উঠে ৷ ইয়াৰ বিষয়ে আলোচনা বাঢ়ি যোৱাৰ পাছত শ্বাহৰুখ খানৰ পত্নী গৌৰী খানে বিবাহ বিচ্ছেদৰ দৰে কঠিন সিদ্ধান্ত গ্ৰহণ কৰে ৷ পত্নীক শান্ত কৰিবলৈ শ্বাহৰুখে প্ৰিয়ংকাৰ সৈতে আন কোনো ছবিত কাম নকৰাৰ প্ৰতিশ্ৰুতি দিছিল। যোৱা ১২ বছৰত শ্বাহৰুখ আৰু প্ৰিয়ংকাক কেতিয়াও একেলগে দেখা পোৱা নাই ৷গতিকে ‘ডন ৩’ত প্ৰিয়ংকা পুনৰ ওভতি অহাটো অসম্ভৱ বুলি ধাৰণা কৰা হৈছে। অৱশ্যে শ্বাহৰুখ ছবিখন এৰি যোৱাৰ পিছৰে পৰা এই ধাৰণা সলনি হৈছে। ৰণবীৰে ডনৰ চৰিত্ৰত অভিনয় কৰাৰ লগে লগে ডন ৩ত প্ৰিয়ংকাৰ ৰোমা ৰূপত ঘূৰি অহাৰ সম্ভাৱনা সম্পূৰ্ণৰূপে নুই কৰিব নোৱাৰি। এই সন্দৰ্ভত এতিয়ালৈকে কোনো সুনিৰ্দিষ্ট খবৰ পোৱা নাই ৷ কিন্তু প্ৰিয়ংকাই নিজেই ছবিখনলৈ ঘূৰি অহাৰ সম্ভাৱনা সম্পূৰ্ণৰূপে নুই কৰা নাই।
পৰিচালক হিচাপে ফাৰহানৰ অন্যতম সফল ফ্ৰেঞ্চাইজি হৈছে ‘ডন’। ২০০৬ চনত মুক্তি পোৱা ‘ডন’ৰ পিছত ২০১১ চনত মুক্তি পায় ‘ডন ২’। এই দুখন ছবিৰ জৰিয়তে ফাৰহানে বক্স অফিচত সফলতা লাভ কৰাৰ লগতে সমালোচকৰ প্ৰশংসাও লাভ কৰে। ১৯৭৮ চনত অমিতাভ বচ্চনে ‘ডন’ ৰূপে দৰ্শকৰ সন্মুখত উপস্থিত হৈছিল। বিগ বিৰ পিছত শ্বাহৰুখে এই ভূমিকাত এক সুকীয়া পৰিচয় সৃষ্টি কৰিছিল। কিন্তু ২০১১ চনত মুক্তি পোৱা ‘ডন ২’ৰ পিছত তেওঁ এই ভূমিকাৰ পৰা দীঘলীয়া বিৰতি লৈছিল। এই বছৰত ‘ডন ৩’ৰ পুনৰ শ্বুটিং আৰম্ভ হ’ব ৷ সূত্ৰ অনুসৰি ফাৰহানে চিত্ৰনাট্য লিখাৰ কাম প্ৰায় শেষ কৰিছে।
