বয়স হৈছে ৮০ বছৰ। কিন্তু ভাল কাম কৰিবলৈ এতিয়াও আগ্ৰহী ৷ তেওঁ হৈছে অমিতাভ বচ্চন ৷ অমিতাভ বচ্চনে এতিয়াও পৰ্দাত বিভিন্ন চৰিত্ৰত অভিনয় কৰিবলৈ শাৰীৰিক ব্যায়াম কৰে। শেহতীয়াকৈ বিগ বিক দীপিকা পাডুকন আৰু দক্ষিণৰ অভিনেতা প্ৰভাসৰ সৈতে হিন্দী ছবি ‘কল্কি ২৮৯৮ এডি’ত দেখা গৈছিল। তেওঁ যি শক্তিৰে একাধিক একচন দৃশ্য পৰিবেশন কৰিছিল, দৰ্শকক স্তম্ভিত কৰি তুলিছিল। কিন্তু এই বয়সত ইমান ফিট হোৱাৰ ৰহস্য কি? বচ্চনৰ ফিটনেছৰ ৰহস্য প্ৰকাশ কৰিছে বৃন্দা ভাট আৰু শিবোহাম নামৰ দুগৰাকী ফিটনেছ-ট্ৰেইনাৰে। বচ্চনে বিগত ২৪ বছৰে তেওঁলোকৰ তত্বাৱধানত ব্যায়াম কৰি আহিছে। শেহতীয়াকৈ মায়ানগৰীৰ চেলিব্ৰিটি ফিটনেছ ট্ৰেইনাৰ দম্পতীয়ে বিগ বিক লৈ মন্তব্য প্ৰকাশ কৰিছে। এক সাক্ষাৎকাৰত বৃন্দাই প্ৰকাশ কৰে যে বিগ বি আনতকৈ কিয় আৰু ক’ত পৃথক। তেওঁ কয় , “বহুতে কয় যে সময় নথকাৰ বাবে তেওঁলোকে ব্যায়াম কৰিব নোৱাৰো।’ কিন্তু অমিতাভ বচ্চনৰ হাজাৰটা কাম থাকিলেও তেওঁ ব্যায়াম কৰাৰ বাবে সময় উলিয়াই ৷ এবাৰ ভাল কিবা এটা মূৰত সোমাই গ’লেই তেওঁক ৰখোৱাটো কঠিন হৈ পৰে।”
ফিটনেছ ট্ৰেইনাৰৰ দম্পতীয়ে এই বয়সতো অমিতাভক শৰীৰ চর্চা কৰিবলৈ শিকায় । আনহাতে বিগ বিৰ পৰাও তেওঁলোকে অনুশাসন আৰু সময়নুৱর্তিতা শিকিছে ৷ এই দুটা গুণৰ বাবে অমিতাভ এতিয়াও প্ৰথম বুলি তেওঁলোকে কয় ৷ বৃন্দাই কয় যে অমিতাভ বচ্চনে সাধাৰণতে পুৱা ৬ বজাৰ পৰা ব্যায়াম আৰম্ভ কৰে। কিন্তু আজিলৈকে তেওঁ ৬ বজাতকৈ এক মিনিটো কেতিয়াও দেৰি কৰা নাই ৷ বৰঞ্চ বচ্চনে কোনো কাৰণত প্ৰশিক্ষণলৈ আহিব নোৱাৰিলে আগতীয়াকৈ জনাই দিছিল। কৰ্মস্থলীৰ পৰা উভতি আহি পলম হ’লেও বহু আগতেই খবৰ দিয়ে। বৃন্দা আৰু শিবোহামে কয় যে তেওঁলোকে সময়ৰ মূল্য অমিতাভ বচ্চনৰ পৰা শিকিছে।
প্ৰতিটো দিনৰ ব্যস্ততাত কেনেকৈ ব্যায়াম কৰিবলৈ সময় উলিয়াব পাৰি?
১) যিকোনো কামৰ আগত পৰিকল্পনা কৰাটো ভাল। গোটেই দিনটো ক’ত সময় কটাব সেই বিষয়ে আগতীয়াকৈ এটা ধাৰণা থাকিলে শৰীৰ চর্চাৰ বাবে সময় ৰাহি কৰাত সহায়ক হ’ব।
২) ব্যায়ামৰ বিভিন্ন উপায় আছে। চাইকেল চলোৱা, যোগাসন, সাঁতোৰ, দৌৰা – যি বিচাৰে ব্যায়াম কৰক। আনন্দৰে ব্যায়াম কৰিলে ৰুটিনত বাধাৰ আশংকা কম।
৩) অকলে ব্যায়াম কৰিব মন নাযায়। সম্ভৱ হ’লে বন্ধু বা চিনাকি লোকৰ লগত ব্যায়াম কৰক। ইয়াৰ ফলত বিৰক্তি কমি যাব। সমমনসম্পন্ন ব্যক্তিৰ লগত ব্যায়ামৰ কথা পাতিব পাৰে। শাৰীৰিক আৰু মানসিক দুয়োটা দিশতে উপকৃত হ’ব।
