সম্পাদকীয়

উৎসৱৰ ঋতু শৰৎ। শৰতৰ শুভ ক্ষণতে শেৱালিৰ সুৱাসে মত্যলৈ আদৰণি জনাই সৰগৰ দেৱী দেৱতাক। মহিষাসুৰ নিধনৰ বাবে মত্যলৈ নামি অহা দুৰ্গা ৰূপী ভগৱতী গোসাঁনীক শুভ্ৰ শেৱালিয়ে দলিচা পাৰি আদৰণি জনাইছে।

দেৱী পূজা অসমত ইতিহাসে ঢুকি নোপোৱাৰ সময়ৰে পৰা চলি আহিছে। কামাখ্যা দেৱীৰ মন্দিৰ, কালিকা পুৰাণ, যোগিনীতন্ত্ৰই এই কথাৰ আভাস দিয়ে। শদিয়াৰ তাম্ৰেশ্বৰী মন্দিৰত নৰবলি দিয়াৰ প্ৰথাও প্ৰচলন আছিল। প্ৰতাপ সিংহ স্বৰ্গদেউৰ দিনত মাটিৰ প্ৰতিমা সাজি দুৰ্গা পূজাৰ প্ৰচলনে আহোম সকলকো সামৰি লয়। সেই সময়ৰে পৰা অসমৰ চুকে কোণে উলহ মালহেৰে দুৰ্গা পূজা পালন কৰা হয়। আনকি লক্ষ্মীনাথ বেজবৰুৱাকে প্ৰমুখ্য কৰি কেইবাজনো সাহিত্যিকে দুৰ্গা পূজাহে অসমৰ জাতীয় উৎসৱ হোৱা উচিত বুলি মত পোষণ কৰিছিল।

বিশ্বজুৰি ব্যাপি থকা কভিদ মহামাৰীৰ ত্ৰাসৰ ফলত যোৱা বছৰৰ দৰে এই বছৰো দুৰ্গা পূজাৰ আয়োজনত পূৰ্বৰ উৎসাহ নোহোৱা হৈছে। এফালে আৰ্থিক সংকট আনফালে মৃত্যু দূত ৰূপী কভিদ মহামাৰীয়ে মানৱ সমাজক জুৰুলা কৰি পেলাইছে। তথাপি কভিদ বিধি মানি দুৰ্গা পূজাৰ আয়োজন কৰা হৈছে।

সংকটৰ সময়ছোৱাত মা দুৰ্গাৰ আশীৰ্বাদত মহিষাসুৰ ৰূপী কভিদ মহামাৰীৰ অন্ত পৰক। মানুহৰ মনৰ ভিতৰত জী থকা মহিষাসুৰৰ নিপাত যাওক এয়াই দুৰ্গামাৰ চৰণত আমাৰ প্ৰাৰ্থনা।

সমূহ অসমবাসী ৰাইজলৈ “কণ্ঠ-the voice” ৰ তৰফৰ পৰা শাৰদীয় দুৰ্গা পূজাৰ হিয়াভৰা শুভকামনা। সমূহ অসমবাসী ৰাইজলৈ শাৰদীয় উৎসৱৰ বতৰত Voice24×7 পৰিয়ালৰ তৰফৰ পৰা আগবঢ়োৱা হৈছে শাৰদীয় বিশেষ উপহাৰ
” কণ্ঠ- the voice”। আশাকৰোঁ সমূহ অসমবাসী ৰাইজে আমাৰ প্ৰথম প্ৰয়াসক আঁকোৱালি ল’ব।

সম্পাদনা কক্ষ

নীতা চক্রবর্ত্তী, শিৱানী বৰা, পূৰ্বালি শৰ্মা বৰদলৈ, খনিন ডেকা, বিশাল শৰ্মা, পিয়ুষ ৰঞ্জন বৰদলৈ