১০০০ আৰু ৫০০ টকীয়া পুৰণি নোট বাতিল কৰাৰ সিদ্ধান্তক প্ৰত্যাহ্বান জনোৱা গোচৰত সোমবাৰে উচ্চতম ন্যায়ালয়ে ৰায়দান কৰে ।দীর্ঘদিনীয়া শুনানিৰ অন্তত উচ্চতম ন্যায়ালয়ে কয় যে কেন্দ্ৰৰ সিদ্ধান্তত কোনো ভুল নাছিল ৷ যাৰ বাবে উচ্চতম ন্যায়ালয়ে কেন্দ্ৰৰ সিদ্ধান্তক সমৰ্থন কৰে ৷ কেন্দ্ৰীয় চৰকাৰৰ কোনো বিত্তীয় সিদ্ধান্তক সলনি কৰিব নোৱাৰি বুলিও উচ্চতম ন্যায়ালয়ে কয়। উচ্চতম ন্যায়ালয়ে পৰ্যবেক্ষণ কৰে যে সিদ্ধান্ত লোৱাৰ ধৰণ বিবেচনা কৰিলে কেন্দ্ৰৰ সিদ্ধান্ত বাতিল কৰিব নোৱাৰি। ৰিজাৰ্ভ বেংকৰ সৈতে ছমাহৰ আলোচনাৰ অন্তত কেন্দ্ৰই বিমুদ্ৰাকৰণৰ সিদ্ধান্ত গ্ৰহণ কৰিছিল বুলিও উচ্চতম ন্যায়ালয়ৰ সংবিধান বিচাৰপীঠখনে উল্লেখ কৰে । কেন্দ্ৰৰ এই সিদ্ধান্তৰ সপক্ষে চাৰিজন ন্যায়াধীশে মতদান কৰাৰ বিপৰীতে এজন ন্যায়াধীশে বিপক্ষে মতদান কৰে ৷
বিমুদ্ৰাকৰণৰ সিদ্ধান্তক প্ৰত্যাহ্বান জনাই উচ্চতম ন্যায়ালয়ত ৫৮খন আবেদন দাখিল কৰা হৈছিল ৷ আৱেদনকাৰীসকলে যুক্তি আগবঢ়ায় যে চৰকাৰে সঠিক পৰিকল্পনাৰে এই সিদ্ধান্ত লোৱা নাই আৰু শীঘ্ৰে এই সিদ্ধান্ত বাতিল কৰিব লাগে। চৰকাৰী পক্ষই যুক্তি প্ৰদর্শন কৰে যে কাৰ্যক্ষেত্ৰত এই সিদ্ধান্ত বাতিল কৰাটো সম্ভৱ নহয়। কেন্দ্ৰৰ অধিবক্তাই লগতে দাবী কৰে যে যদি বিমুদ্ৰাকৰণৰ সিদ্ধান্ত বাতিল কৰিবলৈ হ’লে পুনৰ অতীতলৈ ঘূৰি গৈ এই সিদ্ধান্ত বাতিল কৰিব লাগিব ৷
ন্যায়াধীশ এছ এ নাজিৰৰ নেতৃত্বত গঠিত পাঁচজনীয়া সংবিধান বিচাৰপীঠে শীতকালীন বিৰতিৰ পূৰ্বে দুয়োপক্ষৰ যুক্তি শুনিছিল আৰু ৭ ডিচেম্বৰত ৰায় সংৰক্ষিত কৰিছিল। সংবিধান বিচাৰপীঠৰ আন সদস্যসকল হ’ল ন্যায়াধীশ বি আৰ গাভা, বি ভি নাগাৰথ্না, এ এছ বোপন্না আৰু ভি ৰামাসুব্ৰহ্মণিয়াম। এই গোচৰত ন্যায়াধীশ বি আৰ গাভা আৰু ন্যায়াধীশ বি ভি নাগাৰাথ্নাই দুটা পৃথক ৰায় দিয়া বুলিও জল্পনা-কল্পনাৰ সৃষ্টি হৈছিল।
প্ৰসংগক্ৰমে উল্লেখ কৰিব পাৰি যে ২০১৬ চনৰ ৮ নৱেম্বৰত কেন্দ্ৰৰ বিজেপি চৰকাৰে ৫০০ আৰু ১০০০ টকীয়া নোট বাতিল কৰি নতুন ৫০০ আৰু ২০০০ টকীয়া নোট প্ৰৱৰ্তন কৰাৰ সিদ্ধান্ত লয়। চৰকাৰে অবাধ ক’লা ধন বন্ধ কৰিবলৈ এই সিদ্ধান্ত লৈছিল বুলি প্ৰকাশ কৰি আহিছে । ইয়াৰ উপৰিও চৰকাৰে দাবী কৰিছিল যে যদি পুৰণি নোট সলনি কৰা হয় তেন্তে ক’লা ধন ৰখা লোকসকল বিপদত পৰিব, আৰু ভাৰতীয় অৰ্থনীতিত স্বচ্ছতা আহিব। কিন্তু বিমুদ্ৰাকৰণৰ পিছত সম্পূৰ্ণ ওলোটা ছবি পৰিলক্ষিত হয়। মুকলি বজাৰত থকা প্ৰায় সকলো টকা বেংকলৈ ঘূৰি আহিছিল।
অৱশ্যে উচ্চতম ন্যায়ালয়ে বিমুদ্ৰাকৰণৰ সিদ্ধান্তক ‘শুদ্ধ’ বুলি অভিহিত কৰাৰ বিপৰীতে ন্যায়াধীশ বি ভি নাগাৰত্নে ইয়াক ‘অবৈধ’ বুলি অভিহিত কৰে। তেওঁ কয় যে ২০১৬ চনত কেন্দ্ৰীয় চৰকাৰে বিমুদ্ৰাকৰণৰ সিদ্ধান্তই বেছিভাগ লক্ষ্য পূৰণ কৰিব পৰা নাছিল। একে সময়তে ন্যায়াধীশগৰাকীয়ে কয় যে ইমান দিনৰ পাছতো আদালতে এই সিদ্ধান্ত স্থগিত ৰখাৰ নিৰ্দেশ দিব নোৱাৰে। ইয়াৰ কোনো সমাধান নাথাকিব বুলিও তেওঁ কয়।
উচ্চতম ন্যায়ালয়ৰ ৫ জনীয়া সাংবিধানিক বিচাৰপীঠৰ অন্যতম সদস্য ন্যায়াধীশ নাগাৰত্নে সোমবাৰে কয় , ‘ক’লা ধন আদায়, সন্ত্ৰাসবাদত ক’লা ধনৰ ব্যৱহাৰ আদি বন্ধ কৰাৰ বাবে বিমুদ্ৰাকৰণৰ সিদ্ধান্ত লোৱা হৈছিল। কিন্তু আইনী দৃষ্টিকোণৰ পৰা এই সিদ্ধান্ত অবৈধ। আদালতে সিদ্ধান্তৰ বস্তুনিষ্ঠ দিশটো নহয়, আইনী দিশটো পুনৰীক্ষণ কৰি বিচাৰ কৰে।”
