জ্যোতিষ শাস্ত্ৰ আৰু বাস্তু শাস্ত্ৰৰ সম্বন্ধ অতি প্ৰাচীন কালৰে পৰা বিদ্যমান। মানুহৰ জীৱনত সকলো গ্ৰহৰ শুভ-অশুভৰ প্ৰভাৱ অছে। ই চিৰ’সত্য। ঘৰৰ আকৰ্ষণ শক্তিৰ প্ৰভাৱ কেৱল মানুহৰ ওপৰতে নহয় , নিৰ্জীৱ বস্তুৰ ওপৰতো পৰে। সেইবাবে ঘৰখন বনোৱাৰ আগতে আমি বাস্তু শাস্ত্ৰৰ জ্ঞান লোৱাৰ অতি প্ৰয়োজন।
ঘৰখনৰ স্থিতি অনুকুল বা প্ৰতিকুল হ’লে মানুহে সুখ বা দুখ ভোগ কৰে। বাস্তু অনুসৰি ৮ টা দিশ আছে আৰু প্ৰত্যেক দিশ এক নিশ্চিত গ্ৰহৰ দ্বাৰা প্ৰভাৱিত হৈ থাকে। গতিকে এই গ্ৰহৰ দ্বাৰা ঘৰৰ গৰাকী তথা তেওঁৰ পৰিয়ালৰ সদস্যৰ ওপৰত প্ৰভাৱ পৰে। দিশ কেইটিৰ পৰা ঘৰখনত পৰা প্ৰভাৱৰ বিষয়ে জানো আহক-
১) সূৰ্য ঃ ঘৰৰ প্ৰৱেশ দ্বাৰ যদি পূৱ দিশত হয় তেনেহলে এই ভৱনত সূৰ্যৰ আধিপত্য থাকে। তেজস্বিতা সূৰ্যৰ স্বভাৱ। সেইবাবে পৰিয়ালত ইয়াৰ প্ৰভাৱ পৰা স্বাভাৱিক। ঘৰৰ মুখ্য দুৱাৰ পূৱ ফালে হ’লে সেই ঘৰৰ সকলো লোক শ্ৰেষ্ঠ ব্যক্তিত্বৰ আৰু সমৃদ্ধিশালী হয়।
২) চন্দ্ৰ ঃ ঘৰৰ প্ৰৱেশ দ্বাৰ বা মুখ্য দুৱাৰ যদি বায়ব্য দিশত হয় , তেনেহ’লে এনে ঘৰত চন্দ্ৰৰ আধিপত্য থাকে। পৰিয়ালৰ মুখ্য ব্যক্তি গৰাকীৰ স্বভাৱ অতি চঞ্চল , অস্থিৰ আৰু আবেগত বৈ যোৱা ধৰণৰ হয়। ঘূৰি-ফুৰি তেওঁলোকে সুখ অনুভৱ কৰে।
৩) মঙ্গল ঃ ঘৰৰ প্ৰৱেশ দ্বাৰ বা মুখ্য দুৱাৰ যদি দক্ষিণৰ দিশত হয় , তেনেহ’লে সেই ঘৰৰ স্বামী মঙ্গল হয়। মঙ্গলৰ প্ৰভাৱৰ কাৰণে তেনে ঘৰৰ মুখ্য ব্যক্তি গৰাকী সাহসী আৰু চঞ্চল হয়।
৪) বুধ ঃ ঘৰৰ প্ৰৱেশ দ্বাৰ বা মুখ্য দুৱাৰ যদি উত্তৰ দিশত থাকে , তেনেহ’লে সেই ঘৰত বুধৰ আধিপত্য থাকে। বুধে নিজৰ প্ৰভাৱৰ দ্বাৰা গৃহস্বামীৰ ব্যক্তিত্বত বুদ্ধি-চাতুৰ্য তথা বিনোদৰ সমাৱেশ ঘটায়। এওঁলোকৰ কাৰ্যক্ষেত্ৰ লেখন বা সাহিত্য হয়। এনে ঘৰৰ ব্যক্তিয়ে নিয়মানুৱৰ্তিতা আৰু অনুশাসন ভালদৰে পালন কৰে।
৫) বৃহস্পতি ঃ ঘৰৰ প্ৰৱেশ দুৱাৰ ঈশান দিশত হ’লে সেই ঘৰত বৃহস্পতিৰ আধিপত্য থাকে। এনে ঘৰৰ মুখ্য ব্যক্তিজন দয়ালু , ধাৰ্মিক তথা বিচাৰশীল প্ৰকৃতিৰ হয়। আৱশ্যক হ’লে সাহসী হোৱাও দেখা যায়। এওঁলোকৰ ৰুচি , অধ্যয়ন – অধ্যাপনা – ভাষা বা শিক্ষাৰ আন ক্ষেত্ৰত থকা দেখা যায়।
৬) শুক্ৰ ঃ ঘৰৰ প্ৰৱেশ দ্বাৰ বা মুখ্য দুৱাৰ আগ্নেয় দিশত হ’লে , সেই ঘৰত শুক্ৰৰ আধিপত্য থাকে। এনেকুৱা ঘৰৰ মুখ্য ব্যক্তিজন বিলাসী হয়। এওঁলোকৰ কথা-বতৰা চিনেমা , নাটক , সঙ্গীত , অভিনয় আদিত যুক্ত হৈ থাকে। ৰসিক প্ৰকৃতিৰ হোৱা বাবে এওঁলোকৰ পোছাক ৰংচঙীয়া হৈ থাকে।
৭) শনি ঃ ঘৰৰ প্ৰৱেশ দ্বাৰ বা মুল দুৱাৰ পশ্চিম দিশত থাকিলে , সেই ঘৰত শনিৰ আধিপত্য থাকে। শনিৰ স্বভাৱৰ ফল স্বৰূপে ঘৰৰ মুখ্য ব্যক্তিজনৰ গম্ভীৰতা তথা বিচাৰশীলতা গুণৰ সমাবেশ ঘটে। এনে ঘৰৰ ব্যক্তিয়ে যিকোনো কাৰ্যত হাত দিয়াৰ আগতে গভীৰ চিন্তা কৰি আগবাঢ়ে।
৮) ৰাহু ঃ ঘৰৰ প্ৰৱেশ দ্বাৰ বা মুখ্য দুৱাৰ নৈৠত দিশত হ’লে সেই ঘৰৰ অধিপতি ৰাহু হয়। এনে ঘৰৰ লোক তামসিক অৰ্থাৎ অহংকাৰী তথা ধূৰ্ত হয়। এওঁলোক খঙাল প্ৰকৃতিৰ হোৱা দেখা যায়।
