২০১৮ চনত মিজোৰামত দুটা দশকৰ ৰাজনীতিৰ পৰম্পৰা ভংগ কriকংগ্ৰেছক তৃতীয় স্থানলৈ ঠেলি দি বিৰোধী দলৰ নেতাৰ পদ দখল কৰে জোৰাম পিপলছ মুভমেণ্টৰ নেতা লালডুহোমাই । জোৰাম পিপলছ মুভমেণ্টৰ নেতা লালডুহোমাৰ অনুগামীসকলে দাবী কৰিছে যে এইবাৰ তেওঁ শাসকীয় মিজো নেচনেল ফ্ৰণ্টক অতিক্ৰম কৰি আইজলৰ শাসনৰ গাদী দখল কৰিব।
আশীৰ দশকত প্ৰধানমন্ত্ৰী ইন্দিৰা গান্ধীৰ নিৰাপত্তাৰ দায়িত্বত আছিল আই পি এছ বিষয়া লালডুহোমা। পৰৱৰ্তী সময়ত তেওঁ চাকৰিৰ পৰা পদত্যাগ কৰি ৰাজ্যিক কংগ্ৰেছৰ সভাপতি আৰু লোকসভাৰ সাংসদ হয় ৷ ঐতিহাসিক মিজো চুক্তিৰ জৰিয়তে উত্তৰ-পূবৰ ৰাজ্যখনলৈ শান্তি অনাত তেওঁৰ গুৰুত্বপূর্ণ ভূমিকা আছিল। বিভিন্ন মতামত সমীক্ষা অনুসৰি সম্ভাব্য ত্ৰিশংকু মিজোৰাম বিধানসভাত এইবাৰ চৰকাৰ গঠনৰ ক্ষেত্ৰত তেওঁৰ দলে নিৰ্ণায়ক ভূমিকা ল’ব পাৰে।
জনমত সমীক্ষা বা বুথ ৰিটাৰ্ণ সমীক্ষা প্ৰায়ে বাস্তৱৰ সৈতে মিল নাথাকে। অৱশ্যে একাংশ সমীক্ষাৰ পৰা অনুমান কৰিব পাৰি যে ৪০ আসনৰ বিধানসভাত ২১খন আসনৰ যাদুকৰী সংখ্যাত উপনীত হ’ব নোৱাৰিব এম এন এফ বা কংগ্ৰেছে। তেনে ক্ষেত্ৰত লালডুহোমাৰ দলটোৱে আঠৰ পৰা ১২খন আসন লাভ কৰি নিৰ্ণায়ক শক্তি হ’ব পাৰে। এবিপি-চি ভোটাৰৰ মতামত সমীক্ষা অনুসৰি এমএনএফ ১৩-১৭, কংগ্ৰেছ ১০-১৪, জেডপিএম ৯-১৩ আৰু নিৰ্দলীয়, বিজেপি আদি দলে এখনৰ পৰা তিনিখন বিধানসভাৰ আসন লাভ কৰিব পাৰে। এনে পৰিস্থিতিত একালৰ কংগ্ৰেছ নেতা আৰু পিছলৈ বিজেপিৰ সহযোগী লালডুহোমাই কি কৰিব সেই লৈ মিজোৰামত জল্পনা-কল্পনাৰ চৰ্চা চলিছে।
২০১৮ চনৰ নিৰ্বাচনৰ ঠিক আগতে লালডুহোমাই নিজেই নিজৰ দল জোৰাম নেচনেলিষ্ট পাৰ্টিকে ধৰি মুঠ ৭টা দল লৈ জে পি এম গঠন কৰিছিল। আঠখন আসন লাভ কৰি বিধানসভাৰ দ্বিতীয় বৃহত্তম শক্তি হিচাপে পৰিগণিত হয়। বিজয়ী এম এন এফে ২৬খন আসন আৰু দশক পুৰণি কংগ্ৰেছে ৫খন আসন লাভ কৰে। চেৰচিপ আসনত কংগ্ৰেছৰ বিদায়ী মুখ্যমন্ত্ৰী লালথানহাউলাক পৰাস্ত কৰে লালডুহোমাই। ইয়াৰ পিছত জেড পি এম লালডুহোমাক সভাপতি হিচাপে লৈ ‘ৰাজনৈতিক দল’ হিচাপে আত্মপ্ৰকাশ কৰে। যদিও আইনী প্ৰক্ৰিয়াৰ বাবে বিধায়কৰ পদ হেৰুৱালে, উপ-নিৰ্বাচনত তেওঁ পুনৰ জয়লাভ কৰে। শেহতীয়াকৈ ৰাজ্যখনৰ দ্বিতীয় বৃহত্তম পৌৰসভা লুংলেইৰ আটাইকেইখন আসনত জেড পি এমৰ প্ৰাৰ্থীয়ে জয়লাভ কৰিছে।
প্ৰসংগক্ৰমে উল্লেখ কৰিব পাৰি যে ১৯৮২ চনত লালডুহোমাক অসমৰ পৰা দিল্লীলৈ বদলি কৰি ইন্দিৰাৰ নিৰাপত্তাৰক্ষীৰ দায়িত্ব দিয়া হয়। ইন্দিৰাই জানিব পাৰিলে যে ১৯৭৭ চনত আই পি এছ হোৱাৰ পূৰ্বে তেওঁ মিজোৰামৰ প্ৰথম মুখ্যমন্ত্ৰী চি চুঙৰ ৰাজ্যিক প্ৰশাসনিক সেৱাৰ বিষয়া হিচাপে সহায়ক আছিল। তেওঁৰ ৰাজনৈতিক জ্ঞান দেখি ইন্দিৰাই তেওঁক ১৯৮৪ চনত মিজোৰামলৈ ঘূৰাই পঠিয়াই । লালডুহোমাই আৰক্ষী সেৱাৰ পৰা পদত্যাগ কৰি লোকসভাৰ সদস্য হয়। তেওঁৰ জৰিয়তেই ১৯৮৬ চনত বিদ্ৰোহী নেতা (আৰু এম এন এফৰ প্ৰতিষ্ঠাপক) লালডেংগাই শান্তি চুক্তিত স্বাক্ষৰ কৰে।
ইয়াৰ পিছত লালথানহাউলাৰ লগত সংঘাতৰ বাবে লালডুহোমাই প্ৰথমে কংগ্ৰেছ ত্যাগ কৰি মিজো জাতীয় সংঘ গঠন কৰে। পিছলৈ পিপংলছ কনফাৰেন্সত যোগদান কৰে। পৰৱৰ্তী গন্তব্যস্থান আছিল লালডেংগাৰ দলৰ এম এন এফ। লালডেঙাৰ মৃত্যুৰ পিছত লালডুহোমাই তেওঁৰ উত্তৰাধিকাৰী জোৰামথাংগা (এম এন এফৰ মুৰব্বী আৰু বৰ্তমানৰ মুখ্যমন্ত্ৰী)ৰ সৈতে সংঘাতৰ বাবে জোৰাম জাতীয়তাবাদী পাৰ্টি গঠন কৰে। ২০০৩ আৰু ২০০৮ চনত তেওঁ বিধায়ক হয়। ২০১৮ চনত বিৰোধী দলৰ নেতা হয় তেওঁ ।
