আজি মহাবীৰ জয়ন্তী। মহাবীৰ জৈন হ’ল জৈন ধৰ্মৰ ২৪তম আৰু অন্তিমগৰাকী তীৰ্থংকৰ। যি জৈন ধৰ্মৰ পঞ্চশীল নীতি মন্ত্ৰৰ ওপৰত গুৰুত্ব আৰোপ কৰিছিল।
সত্য, অহিংসাৰ নীতিৰে মানুহক পোহৰৰ বাট দেখুওৱা মহাবীৰ জৈনে বিশ্বাস কৰিছিল যে আমি নিজৰ প্ৰতি যিদৰে আচৰণ কৰোঁ, আনৰ প্ৰতিও একে ধৰণৰ চিন্তাধাৰা থাকিব লাগে। এইটোৱেই তেওঁৰ আটাইতকৈ ফলপ্ৰসূ মূলমন্ত্ৰ।
মহাবীৰ জয়ন্তী প্ৰতি বছৰে চ’ত মাহৰ শুক্ল পক্ষৰ ত্ৰয়োদশী তিথিত পালন কৰা হয়। জৈন ধৰ্মৰ ২৪ তম তীৰ্থংকৰ মহাবীৰ জৈনৰ জন্ম হৈছিল বিহাৰৰ কুণ্ডগ্ৰামত।
মহাবীৰৰ শৈশৱৰ নাম আছিল বৰ্ধমান।
কোৱা হয় যে ৩০ বছৰ বয়সত তেওঁ ৰাজপ্ৰসাদৰ আনন্দ ত্যাগ কৰি সত্যৰ সন্ধানত অৰণ্যৰ ফালে গৈছিল। ঘন অৰণ্যত বাস কৰি থাকোঁতে তেওঁ বাৰ বছৰ ধৰি কঠোৰ তপস্যা কৰিছিল আৰু তাৰ পিছত ৰিজুবালুকা নদীৰ পাৰৰ ছাল গছৰ তলত জ্ঞান লাভ কৰিছিল। মহাবীৰে সমাজৰ উন্নতি আৰু জনসাধাৰণৰ কল্যাণৰ বাবে প্ৰচাৰ কৰিছিল।
মহাবীৰ জয়ন্তীৰ তাৎপৰ্য
মহাবীৰ জয়ন্তীক বিশেষকৈ জৈন পন্থাৰ লোকসকলৰ বাবে অতি বিশেষ বুলি গণ্য কৰা হয়। মহাবীৰ জয়ন্তীৰ দিনা জৈন ধৰ্মৰ লোকসকলে প্ৰভাত ফেৰী, অনুষ্ঠান আৰু শোভাযাত্ৰা উলিয়ায়।
মহাবীৰে মানুহৰ বাবে মোক্ষ লাভৰ বাবে পাঁচটা নিয়ম স্থাপন কৰিছিল ৷
এই নিয়ম সমূহক আমি পঞ্চশীল নীতি বুলি জানো। এই পাঁচটা নীতি হ’ল অহিংসা, অস্তেয়, ব্ৰহ্মচাৰ্য, সত্য আৰু অপৰিগ্ৰহ।
মহাবীৰ জয়ন্তীৰ দিনা ভগৱান মহাবীৰক পূজা কৰা হয় আৰু তেওঁক স্মৰণ কৰি তেওঁ দিয়া নীতিসমূহ পালন কৰাৰ প্ৰয়াস কৰা হয়। লগতে এই উপলক্ষে ধৰ্মীয় অনুষ্ঠানৰো আয়োজন কৰা হয়।
মহাবীৰৰ চিন্তা
- নিজকে জয় কৰক। কাৰণ লাখ শত্ৰুক জয় কৰাতকৈ এই এটা বস্তুৱেই ভাল।
- প্ৰতিটো আত্মা নিজৰ মাজতে আনন্দময় আৰু সৰ্বজ্ঞানী। সুখ আমাৰ ভিতৰত আছে, বাহিৰত বিচাৰিবলৈ চেষ্টা নকৰিবা।
- প্ৰতিটো জীৱৰ ওপৰত দয়া কৰক। ঘৃণাই কেৱল ধ্বংসৰ দিশেহে লৈ যায়।
- সত্যৰ পোহৰেৰে আলোকিত হৈ জ্ঞানী মানুহে মৃত্যু জয় কৰে।
- ঈশ্বৰৰ কোনো সুকীয়া অস্তিত্ব নাই। কেৱল আপোনাৰ সকলো প্ৰচেষ্টা সঠিক দিশত ৰাখিলেই আপুনি দেৱতাক বিচাৰি পাব পাৰে।
