আজি বিশিষ্ট ভাষাতত্ত্ববিদ, শিক্ষাবিদ, শিক্ষাপ্ৰশাসক তথা লেখক টাবুৰাম টাইডৰ ওপজা দিন । ১৯৪২ চনৰ আজিৰ দিনটোতে লখিমপুৰ জিলাৰ ঘুণাসূঁতি আয়েংগিয়াত তেওঁৰ জন্ম হৈছিল । ১৯৬৭ চনত তেওঁ কটন কলেজত প্ৰবক্তা হিচাপে যোগদান কৰে । ১৯৭০ চনত তেওঁ কেন্দ্ৰীয় লোকসেৱা আয়োগৰ সৰ্বভাৰতীয় প্ৰতিযোগিতামূলক পৰীক্ষাত ভাৰতীয় প্ৰশাসনীয় সেৱা আৰু ভাৰতীয় বন সেৱাৰ বাবে বাছনিত উঠিছিল যদিও স্বাস্থ্যজনিত কাৰণত সেই পদবী লাভ নকৰিলে । এনে সেৱাৰ বাবে বাছনিভুক্ত হোৱা তেঁৱেই আছিল অসমৰ প্ৰথমগৰাকী জনজাতীয় যুৱক । কটন কলেজত চৈধ্য বছৰ সেৱা আগবঢ়োৱাৰ পিছত তেওঁ অসম চৰকাৰৰ শিক্ষা বিভাগৰ উপসঞ্চালকৰ দায়িত্ব গ্ৰহণ কৰে । তাৰ পিছত তেওঁ এছচিইআৰটিৰ সঞ্চালক, অসম মাধ্যমিক শিক্ষা পৰিষদৰ সঞ্চালক, উচ্চ শিক্ষা বিভাগৰ সঞ্চালক, অসম মাধ্যমিক শিক্ষা পৰিষদৰ অধ্যক্ষ, ৰাজ্যিক বাছনি পৰিষদৰ (উচ্চ শিক্ষা) অধ্যক্ষ আদি বিভিন্ন পদবীত সেৱা আগবঢ়ায় । তদুপৰি তেওঁ আছিল আনন্দৰাম বৰুৱা ভাষা, কলা, সংস্কৃতি প্ৰতিষ্ঠানৰ প্ৰথমগৰাকী সঞ্চালক । তেওঁ গুৱাহাটী বিশ্ববিদ্যালয়ৰ বিদ্যায়তনিক পৰিষদৰো সদস্য আছিল । ১৯৬৮ চনত তেওঁ নাহেন্দ্ৰ পাদুনৰ সৈতে গুৱাহাটী মিচিং কেবাং নামৰ অনুষ্ঠান এটাৰ জন্ম দি মিচিং ভাষাৰ বিজ্ঞানসন্মত লিপি ব্যৱহাৰত আগভাগ লয় । ১৯৭২ চনত জন্ম লাভ কৰা মিচিং আগম কেবাঙৰ তেওঁ প্ৰতিষ্ঠাপক সভাপতি হয় । আকাশবাণী ডিব্ৰুগড়ৰ বাবে তেওঁ মিচিং ভাষা শিক্ষাৰ এটা পাঠ্যক্ৰমো যুগুতাই দিছিল । তেওঁ ইংৰাজী, অসমীয়া আৰু মিচিং ভাষাত অসংখ্য প্ৰবন্ধ-পাতি লিখিছিল । একুঁকি নিবন্ধ, Glimpses, Mising Gompir Kumsung (মিচিং শব্দৰ ভঁৰাল) আদি তেওঁৰ প্ৰকাশিত পুথি । মিচিং আগম কেবাঙে তেওঁক সন্মানজনক আগম মিগাং উপাধি প্ৰদান কৰে । তেওঁ অসম চৰকাৰৰ সাহিত্যিক পেঞ্চনো লাভ কৰে । এইগৰাকী বিশিষ্ট ব্যক্তিলৈ আমাৰ প্ৰণাম ।
আজি বিশিষ্ট প্লাজমা বিজ্ঞানী তথা বিজ্ঞানভিত্তিক লেখিকা ডঃ জয়ন্তী চুতীয়াৰ ওপজা দিন । ১৯৪৮ চনৰ আজিৰ দিনটোতে শিলসাগৰৰ জামগুৰিত তেওঁৰ জন্ম হৈছিল । পদাৰ্থ বিজ্ঞানৰ স্নাতকোত্তৰ ডিগ্ৰী লৈ তেওঁ solid state Physics ত ডক্টৰেট ডিগ্ৰী লাভ কৰে । ১৯৮১ চনত তেওঁ চিএছআইআৰৰ পোষ্ট ডক্টৰেট ফেলো হিচাপে নিযুক্ত হয় । ১৯৮৫ চনত Institute of Advanced studies in Science and Technology (IASST)ৰ সহকাৰী অধ্যাপক হিচাপে নিযুক্তি পায় । ১৯৮৮ চনত তেওঁ জাপানৰ Institute of space and Astronautical Scienceত গৱেষণাৰ সুযোগ পায় । তাৰ পিছত তেওঁ গুৱাহাটীৰ আইএএছএছটিৰ বিভাগীয় মুৰব্বী তথা ৰিছাৰ্চ গাইড হিচাপে নিযুক্তি পাই পিছলৈ অনুষ্ঠানটোৰ সঞ্চালক পদত অধিষ্ঠিত হয় । এনে এটি বিজ্ঞান প্ৰতিষ্ঠানৰ মুৰব্বী হোৱা তেঁৱেই ভাৰতৰ প্ৰথমগৰাকী মহিলা । তেওঁ বিশ্বৰ বিভিন্ন প্ৰান্তত বিজ্ঞানৰ চেমিনাৰ, ৱৰ্কশ্বপ আদিত সাৰগৰ্ভ বক্তৃতা প্ৰদান কৰি ৰাজ্যখনক গৌৰৱান্বিত কৰিছে । ইতিমধ্যে তেওঁ বিজ্ঞানীৰ জীৱনী, ভ্ৰমণ কাহিনী, উপন্যাস আদিৰ ২১খন গ্ৰন্থ ৰচনা কৰিছে । বিজ্ঞান জগতলৈ আগবঢ়োৱা অৱদানৰ বাবে তেওঁ কমল কুমাৰী ৰাষ্ট্ৰীয় বঁটা, মহিলা পদাৰ্থ বিজ্ঞানী বঁটা আদি বিভিন্ন সন্মান লাভ কৰিছে । এইগৰাকী মহিলা বিজ্ঞানীক জনালোঁ তেওঁৰ ওপজা দিনৰ ওলগ ।
