আজি বিশ্ববিশ্ৰুত নাট্যকাৰ তথা নাট পৰিচালক হেনৰিক ইবছেনৰ ওপজা দিন । ১৮২৮ বৰ্ষৰ আজিৰ দিনটোতে নৰৱেৰ স্কিয়েনত জন্ম লাভ কৰিছিল হেনৰিক জোহান ইবছেনে । থিয়েটাৰত আধুনিকতাবাদৰ প্ৰতিষ্ঠা কৰোঁতাসকলৰ ভিতৰত অন্যতম আছিল ইবছেন । তেওঁক বাস্তৱতাবাদৰ পিতৃ বুলিও কোৱা হয় । সমগ্ৰ বিশ্বতে ছেইক্সপিয়েৰৰ পিছতেই আটাইতকৈ সঘনাই যিগৰাকী নাট্যকাৰৰ নাট মঞ্চস্থ হৈছে, তেৱেই হ’ল ইবছেন । তেওঁৰ কেইখনমান অতি জনপ্ৰিয় নাট হ’ল এন এনিমী অব দ্য পিপল, ঘোষ্টছ, এ ডলছ হাউছ, দ্য ৱাইল্ড ডাক ইত্যাদি । ২০০৬ চনত বিশ্বত সৰ্বাধিক মঞ্চস্থ হোৱা নাটকখন আছিল ‘এ ডলছ হাউছ’ । এইগৰাকী বিশিষ্ট নাট্যকাৰৰ স্মৃতিত ১৯৯৫ চনত এটা গ্ৰহাণুৰ নাম ৰখা হৈছিল ৫৬৯৬ ইবছেন । বিশিষ্ট নাট্যকাৰলৈ আমাৰ প্ৰণাম ।
আজি কবি, প্ৰবন্ধকাৰ তথা শিক্ষাবিদ জ্ঞাননাথ বৰাৰ ওপজা দিন । ১৮৯০ বৰ্ষৰ আজিৰ দিনটোতে গুৱাহাটীত তেওঁৰ জন্ম হৈছিল । তেওঁ আছিল গুৱাহাটী একতা সভাৰ অন্যতম প্ৰতিষ্ঠাতা তথা সম্পাদক । অসম ছাত্ৰ সন্মিলনৰ তৃতীয় অধিবেশনৰ প্ৰধান সম্পাদক আছিল তেওঁ । অসম ৰাজ্যিক মহাসভাৰো তেওঁ সভাপতি আছিল । ১৯৬৮ চনত তেজপুৰত অনুষ্ঠিত অসম সাহিত্য সভাৰো তেওঁ সভাপতি আছিল । ‘সখী ঐ পৰেনে মনত’ নামৰ কবিতাটোৰে তেওঁ সাহিত্যৰ জগতখনত খোজ পেলাইছিল । পেছাত এগৰাকী অধিবক্তা জ্ঞাননাথ বৰাই আৰ্ল ল কলেজৰ অধ্যক্ষ ৰূপেও কাৰ্যনিৰ্বাহ কৰিছিল । অসমত বিদেশী, যুগতত্ব, নতুন পৃথিৱী, আধুনিক সাহিত্য, এ প্লী ফৰ সংস্কৃত এজ নেছনেল লেংগুৱেজ আদি তেওঁৰ উল্লেখযোগ্য গ্ৰন্থ । এইগৰাকী বৰেণ্য সাহিত্যিকলৈ আমাৰ প্ৰণাম ।
আজি বিশিষ্ট ভাৰতীয় সাহিত্যিক খুছৱন্ত সিঙৰ স্মৃতি দিৱস । তেওঁ আছিল এগৰাকী সাহিত্যিক, আইনজীৱী, কূটনীতিক, সাংবাদিক আৰু ৰাজনীতিক । দেশ বিভাজনৰ সময়ৰ ৰক্তাক্ত হিংসাত্মক পৰিস্থিতিৰ অভিজ্ঞতাৰে তেওঁ ১৯৫৬ চনত লিখি উলিয়াইছিল তেওঁৰ বিখ্যাত গ্ৰন্থ ট্ৰেইন টু পাকিস্তান । পিছলৈ এই উপন্যাসখনৰ আধাৰতে ১৯৯৮ চনত নিৰ্মাণ হৈছিল একে নামৰ এখন চলচ্চিত্ৰ । স্তম্ভ লেখক হিছাপেও তেওঁ খ্যাত । লাহোৰ উচ্চ ন্যায়ালয়ত অধিবক্তা হিচাপে কৰ্মজীৱনৰ পাতনি মেলা সিঙে দেশৰ স্বাধীনতাৰ পিছতেই ব্ৰিটিছ সাম্ৰাজ্যত ভাৰতৰ বৈদেশিক সেৱাত নিযুক্ত হৈছিল । পিছলৈ আকাশবাণীত সাংবাদিক আৰু ইউনেস্ক’ৰ মাছ কমিউনিকেছন বিভাগত জড়িত হয় । তেওঁ লোকসভা আৰু ৰাজ্যসভাৰ সাংসদো আছিল । তেওঁক ভাৰত চৰকাৰে পদ্মবিভূষণ সন্মানেৰে সন্মানিত কৰে । এইগৰাকী বিশিষ্ট ব্যক্তিলৈ আমাৰ প্ৰণাম ।
