আজি বিশিষ্ট কবি, সমালোচক তথা অনুবাদক নলিনীধৰ ভট্টাচাৰ্যৰ ওপজা দিন । ১৯২১ চনৰ আজিৰ দিনটোতে যোৰহাটৰ মেলেং কাঠগাঁৱত তেওঁৰ জন্ম হয় । স্নাতকোত্তৰ ডিগ্ৰী লাভ কৰি তেওঁ শ্বিলঙৰ ছেইণ্ট এন্থনীজ কলেজত অসমীয়াৰ প্ৰবক্তা হিচাপে যোগদান কৰে । পিছত ১৯৬০ চনত তেওঁ গুৱাহাটীৰ আৰ্য বিদ্যাপীঠ কলেজত যোগদান কৰি ১৯৮৩ চনত অৱসৰ গ্ৰহণ কৰে । তেওঁ ‘ৰামধেনু’ৰ পাতত অনুবাদকৰ্মৰে সাহিত্যিক জীৱনৰ পাতনি মেলে । তেওঁৰ প্ৰথমটো কবিতা ‘দুখীয়া’ প্ৰকাশ পাইছিল ‘আৱাহন’ৰ পাতত । ১৯৭৯ চনত তেওঁৰ প্ৰথমখন কাব্য গ্ৰন্থ ‘এই কুঁৱলীতে’ । চেৰাশালিৰ মালিতা, ননী ঘৰত আছেনে, আহত সপোন আদি তেওঁৰ অন্যান্য কাব্য গ্ৰন্থ । মূল আৰু ফুল, কবিতাৰ কথা, মহৎ ঐতিহ্য আদি তেওঁৰ প্ৰবন্ধ সংকলন । দুই পুৰুষ, ঈশ্বৰী তলাৰ কাহিনী, ডঃ ঝিভাগো আদি অনুবাদ গ্ৰন্থ । মহৎ ঐতিহ্য গ্ৰন্থৰ বাবে ২০০২ চনত তেওঁ সাহিত্য অকাডেমি বঁটা লাভ কৰে । ১৯৮৩ চনত কবিতাৰ কথাৰ বাবে ভাৰতীয় ভাষা পৰিষদ বঁটা লাভ কৰে । ২০০৬ চনত লাভ কৰে অসম উপত্যকা বঁটা । সাহিত্যিকগৰাকীলৈ আমাৰ প্ৰণাম ।
আজি বিশিষ্ট সাহিত্যিক তথা অৰ্থনীতিবিদ ভৱানন্দ ডেকাৰ স্মৃতি দিৱস । ১৯৫৮ চনত তেওঁ গুৱাহাটীৰ প্ৰাগজ্যোতিষ মহাবিদ্যালয়ত অৰ্থনীতিৰ অধ্যাপক হিচাপে যোগদান কৰে আৰু ১৯৯২ চনত কলেজখনৰ অধ্যক্ষ হিচাপে অৱসৰ গ্ৰহণ কৰে । তেওঁ সৰ্থেবাৰীৰ বাপুজী কলেজৰো প্ৰতিষ্ঠাপক অধ্যক্ষ আছিল । ১৯৬৮ চনত তেওঁ পৰীক্ষিত হাজৰিকা আৰু উপেন্দ্ৰ নাথ গোস্বামীৰ সৈতে লগ লাগি দিল্লীত অসমীয়া সাহিত্য সমাজ প্ৰতিষ্ঠা কৰে । দিল্লী বিশ্ববিদ্যালয় আৰু কেন্দ্ৰীয় লোকসেৱা আয়োগত অসমীয়া ভাষাৰ সুকীয়া বিভাগ খোলাতো তেওঁ আগভাগ লৈছিল । তেওঁ আমি, উদয়গিৰি, ৰাষ্ট্ৰজ্যোতি আদি আলোচনীৰো সম্পাদক আছিল । তেওঁ ১১৪খন বিভিন্ন বিষয়ৰ পুথি ৰচনা কৰে । তেওঁ আছিল অসমীয়া ভাষাত অৰ্থনীতি বিষয়ক কিতাপ লিখা প্ৰথমগৰাকী ব্যক্তি । ২০০৬ চনৰ আজিৰ দিনটোতে তেওঁৰ দেহাৱসান ঘটে । সাহিত্যিক, অৰ্থনীতিবিদগৰাকীলৈ আমাৰ প্ৰণাম ।
আজি সাহিত্যিক তথা ইতিহাসৰ গৱেষক অম্বিকাচৰণ চৌধুৰীৰ স্মৃতি দিৱস । তেওঁ বিভিন্ন চৰকাৰী চাকৰি কৰাৰ পিছত বঙাইগাঁও শিক্ষক প্ৰশিক্ষণ বিদ্যালয়ৰ অধ্যক্ষ হিচাপে অৱসৰ গ্ৰহণ কৰে । তেওঁ বিভিন্ন বিষয়ৰ ৩৩খন গ্ৰন্থ লিখি থৈ গৈছে । ৰত্নপীঠত এভুমুকি তেওঁৰ এখন উল্লেখযোগ্য গ্ৰন্থ । অসম সাহিত্য সভাৰ ধুবুৰী অধিৱেশনত তেঁৱেই অসমীয়া ভাষাক অসমৰ ৰাজ্যভাষাৰ মৰ্যাদা দিব লাগে বুলি পোনপ্ৰথমে প্ৰস্তাৱ দিছিল । তেওঁ ১২ বছৰ কোচ ৰাজবংশী সন্মিলনীৰ সম্পাদক আছিল । অসম সাহিত্য সভাৰ দুধনৈ অধিৱেশনত তেওঁক ৰত্নপীঠৰ ৰত্ন উপাধি প্ৰদান কৰা হয় । ২০০৯ চনত অসম চৰকাৰে তেওঁক চিলাৰায় বঁটা প্ৰদান কৰে । ২০১১ চনৰ আজিৰ দিনটোতে তেওঁৰ দেহাৱসান ঘটে । সাহিত্যিকগৰাকীলৈ আমাৰ প্ৰণাম ।
আজি বিশিষ্ট সাহিত্যিক, সাংবাদিক ফণী তালুকদাৰৰ স্মৃতি দিৱস । তেওঁ শ্বিলং-গুৱাহাটী অনাতাঁৰ কেন্দ্রৰ অনুষ্ঠান কাৰ্যবাহী হিচাপে কৰ্মজীৱনৰ পাতনি মেলিছিল । পিছলৈ তেওঁ এইপদৰ পৰা অৱসৰ লৈ দৈনিক অসমৰ সহকাৰী সম্পাদক আৰু অসমবাণী, অগ্ৰগতি, নৱদূত আদি কাকতৰ সম্পাদক তথা সাপ্তাহিক সময়ৰ মুখ্য সম্পাদক হৈছিল । আলোকৰ যাত্ৰী, পৃথিৱীৰ প্ৰেম, অঘৰী অৱতাৰ আদি তেওঁৰ প্ৰকাশিত গ্ৰন্থ । ১৯৯৩ চনত তেওঁ অঘৰী অৱতাৰ গ্ৰন্থৰ বাবে সাহিত্য অকাডেমিৰ অনুবাদ বঁটা লাভ কৰে । তেওঁ বিভ্ৰাট, মানসকন্যা আৰু অপৰাজেয় নামৰ তিনিখন চলচ্চিত্ৰ পৰিচালনা কৰাৰ লগতে কেইবাখনো তথ্যচিত্ৰও নিৰ্মাণ কৰিছিল । তেওঁ জ্যেতি চিত্ৰবনৰ অধ্যক্ষ আৰু অসম নাট্য সন্মিলনৰ সভাপতি আছিল । ১৯৯৮ চনৰ আজিৰ দিনটোতে তেওঁৰ দেহাৱসান ঘটে । সাহিত্যিক, সাংবাদিকগৰাকীলৈ আমাৰ প্ৰণাম ।
