আজি অসমৰ ভ্ৰাম্যমাণ থিয়েটাৰ জগতখনৰ অন্যতম কাণ্ডাৰী ৰতন লহকৰৰ স্মৃতি দিৱস । অভিনয়ৰ প্ৰতি তীব্ৰ ধাউতি থকা ৰতন লহকৰে ন বছৰ বয়সতে অভিনয় কৰিছিল । ১৯৬৭ চনত স্নাতকোত্তৰ ডিগ্ৰী লাভ কৰি তেওঁ চাকৰিৰ প্ৰতি মন নেমেলি নাটকৰ জগতখনত সোমাই পৰে । ৰূপাঞ্জলি শিল্পী সমাজ গঢ় দি নাট্য চৰ্চা কৰাৰ পিছত তেওঁ নটৰাজ থিয়েটাৰৰ জৰিয়তে ভ্ৰাম্যমাণ থিয়েটাৰৰ জগতখনত ভৰি দিয়ে । অভিনেতা, নাট পৰিচালক, প্ৰযোজক হিচাপে তেওঁ বিশেষ খ্যাতি অৰ্জন কৰে । ১৯৭৬ চনত তেওঁ অসমৰ আগশাৰীৰ ভ্ৰাম্যমাণ নাট্যদল ‘কহিনুৰ থিয়েটাৰ’ৰ জন্ম দিয়ে । কহিনুৰৰ মঞ্চতে তেজীমলা, টাৰ্জান, ক্লিঅ’পেট্ৰা, ক্ৰাইম এণ্ড পানিছমেণ্ট, আনাৰকলি, বিষ্ণুপ্ৰসাদ, অসীমত যাৰ হেৰাল সীমা, টাইটানিক আদিৰ দৰে নাটক উপহাৰ দি এগৰাকী সফল প্ৰযোজক হিচাপে স্বীকৃতি লাভ কৰিছে ।২০১৭ চনৰ আজিৰ দিনটোতে তেওঁৰ দেহাৱসান ঘটে । এই বিশিষ্ট সাংস্কৃতিক কৰ্মীগৰাকীলৈ আমাৰ প্ৰণাম ।
আজি বিশিষ্ট স্তম্ভ লেখক, নাট্যকাৰ, চলচ্চিত্ৰ সমালোচক, সম্পাদক পবিত্ৰ কুমাৰ ডেকাৰ ওপজা দিন । ১৯৪০ চনৰ আজিৰ দিনটোতে নগাঁৱৰ হয়বৰগাঁৱত তেওঁৰ জন্ম হৈছিল । নগাঁও কলেজত পঢ়ি থকা দিনতে তেওঁ কেইবাখনো একাংকিকা আৰু পূৰ্ণাংগ নাট পৰিচালনা কৰাৰ লগতে তাত অভিনয়ো কৰিছিল । তেওঁ শ্ৰেষ্ঠ অভিনেতা আৰু শ্ৰেষ্ঠ পৰিচালকৰ সন্মানো লাভ কৰিছিল । তেওঁ আছাম ট্ৰিবিউন কাকত গোষ্ঠীৰ বিজ্ঞাপন ব্যৱস্থাপক পদত যোগদান কৰি তাৰ পৰা অৱসৰ গ্ৰহণ কৰিছিল । ১৯৬০ চনত তেওঁ ভূপেন হাজৰিকা সম্পাদিত আমাৰ প্ৰতিনিধিৰ সহযোগী সম্পাদক হয় । আলোচনীখনত তেওঁৰ ব্যংগাত্মক স্তম্ভ লেখা ধনঞ্জয়ৰ ডায়েৰী অতি জনপ্ৰিয় হৈছিল । তেওঁ উত্তৰ পূৰ্বাঞ্চলৰ প্ৰথমখন চলচ্চিত্ৰ তথা সাংস্কৃতিক আলোচনী ৰূপকাৰৰ প্ৰকাশ আৰু সম্পাদনা কৰিছিল । তেওঁ ঐক্যতান নামৰ এটা অপেছাদাৰী নাট্য দলো গঠন কৰিছিল । তেওঁ ভাৰতীয় গণনাট্য সংঘৰ অসম শাখাৰ সৈতে জড়িত আছিল । কেইবাখনো ভ্ৰাম্যমাণ থিয়েটাৰৰ বাবে তেওঁ নাটক লিখিছিল । বিভিন্ন কাকত আলোচনীত চলচ্চিত্ৰ সমালোচনা লিখিছিল । মৰা মানুহ বচাবৰ উপায়, ৰসালাপ, ব্যাকুল কামনা আদি তেওঁৰ প্ৰকাশিত গ্ৰন্থ । বিশিষ্ট ব্যক্তিগৰাকীলৈ আমাৰ প্ৰণাম ।
