আজি বিশিষ্ট ভূগোলবিদ মহম্মদ তাহেৰৰ স্মৃতি দিৱস । তেওঁ আছিল স্বাধীনতাৰ পৰৱৰ্তী কালৰ অসমৰ এগৰাকী অগ্ৰণী ভূগোল বিজ্ঞানী, কৃতী শিক্ষক আৰু সুলেখক । তেওঁ কটন কলেজৰ পৰা বিএছচি পৰীক্ষাত উত্তীৰ্ণ হৈ ১৯৫৬ চনত কলিকতা বিশ্ববিদ্যালয়ৰ পৰা স্নাতকোত্তৰ ডিগ্ৰী লাভ কৰে। তেওঁ গুৱাহাটী বিশ্ববিদ্যালয়ৰ ভূগোল বিভাগত অধ্যাপনা কৰাৰ উপৰি বিশ্ববিদ্যালয়ৰ পাঠ্যপুথি প্ৰস্তুতি সমন্বয় সমিতিৰ সচিব, অসম মাধ্যমিক শিক্ষা পৰিষদৰ অধ্যক্ষ আৰু গুৱাহাটী বিশ্ববিদ্যালয়ৰ বিজ্ঞান গুৰু হিচাপেও কাৰ্যনিৰ্বাহ কৰিছিল। তেওঁ আন্তঃৰাষ্ট্ৰীয় মানচিত্ৰ সংস্থাৰো (NATMO) গৱেষক আছিল। ৰামধেনু, প্ৰকাশ আদি আলোচনীত তেওঁৰ গল্প-কবিতা আদি প্ৰকাশ পাইছিল । অসম সাহিত্য সভাৰ অভিলাষী প্ৰকল্প বিশ্বকোষৰ ‘সমাজ আৰু সংস্কৃতি’ খণ্ডৰ তেওঁ সম্পাদক আছিল । ২০১৫ চনৰ আজিৰ দিনটোতে তেওঁৰ দেহাৱসান ঘটে। এইগৰাকী মহান ব্যক্তিলৈ আমাৰ প্ৰণাম ।
আজি বিশিষ্ট সাংবাদিক পৰাগ কুমাৰ দাসৰ ওপজা দিন । ১৯৬১ চনৰ আজিৰ দিনটোতে শ্বিলঙত তেওঁৰ জন্ম হৈছিল। দিল্লীৰ ছেইণ্ট ষ্টিফেন্স কলেজৰ পৰা অৰ্থনীতিৰ স্নাতক ডিগ্ৰী লাভ কৰি দিল্লীৰ স্কুল অৱ ইকোনমিক্সৰ পৰা স্নাতকোত্তৰ ডিগ্ৰী লাভ কৰে। ১৯৮৪ চনত পঞ্জাব নেচনেল বেংকৰ বিষয়া হিচাপে যোগদান কৰি পিছলৈ ইউনিট ট্ৰাষ্ট অৱ ইণ্ডিয়া আৰু গুৱাহাটী ষ্টক এক্সেঞ্জৰ মহাপ্ৰবন্ধক হিচাপে যোগদান কৰে। ১৯৯৫ চনত তেওঁ অসমীয়া প্ৰতিদিন কাকতৰ কাৰ্যবাহী সম্পাদক নিযুক্ত হয়। তাৰ পূৰ্বে ১৯৮৯ চনত বুধবাৰ কাকতৰ সম্পাদক হিচাপে কাৰ্যনিৰ্বাহ কৰে। ১৯৯৪ চনত আগান আলোচনীৰ প্ৰকাশক আৰু সম্পাদক হয় । তেওঁ কেইবাটাও মানৱ অধিকাৰ সংস্থাৰ সৈতে জড়িত আছিল। ছাংলট ফেনলা, স্বাধীনতাৰ প্ৰস্তাৱ, ৰাষ্ট্ৰদ্ৰোহীৰ দিনলিপি আদি তেওঁৰ প্ৰকাশিত পুথি। সাংবাদিকগৰাকীলৈ আমাৰ প্ৰণাম।
