আজিৰ দিনটোতে বিশিষ্ট স্বাধীনতা সংগ্ৰামী মণিৰাম দেৱানক ব্ৰিটিছে ফাঁচী দিছিল । ব্ৰিটিছে অসম দখল কৰাৰ পিছত তেওঁ ইংৰাজৰ অধীনত ৰেভিনিউ চিৰস্তাদাৰ আৰু তহচিলদাৰ পদবী লাভ কৰে ।পিছত তেওঁ ব্ৰিটিছৰ চাকৰি বাদ দি শিৱসাগৰ জিলাৰ চিংলৌত নিজাকৈ দুখন চাহবাগান আৰম্ভ কৰে ।তেৱেই অসমত প্ৰথমে চাহ বাগিচা স্থাপন কৰিছিল । তেওঁ কলিকতাৰ পৰা প্ৰকাশিত ‘বিবেক দৰ্পণ’ত বিভিন্ন প্ৰবন্ধ-পাতি লিখাৰ উপৰি ‘বুৰঞ্জী বিৱেক ৰত্ন’ নামৰ এখন পুথিও ৰচনা কৰিছিল । ১৮৫৭ চনৰ শেষৰ ফালে তেওঁ কন্দৰ্পেশ্বৰ সিংহক উজনি অসমৰ ৰজা পাতিবলৈ ব্ৰিটিছক অনুৰোধ জনাবলৈ কলিকতালৈ ৰাওনা হয় । তাতেই চিপাহী বিদ্ৰোহৰ কথা জানিব পাৰি উৎসাহিত হৈ তেওঁ ব্ৰিটিছৰ বিৰুদ্ধে যুদ্ধ কৰিবলৈ সাজু হোৱাৰ বাবে কন্দৰ্পেশ্বৰ সিংহলৈ এখন চিঠি লিখে । কিন্তু সেই চিঠিখন ব্ৰিটিছৰ আৰক্ষী বিষয়া হৰনাথ দাৰোগাৰ হাতত পৰে আৰু ব্ৰিটিছে বিদ্ৰোহৰ পৰিকল্পনা কৰাৰ অপৰাধত ১৯৫৮ চনৰ আজিৰ দিনটোতে তেওঁক যোৰহাটত ফাঁচী দিয়ে ।এইগৰাকী মহান ব্যক্তিলৈ আমাৰ প্ৰণাম ।
আজি সাহিত্যিক বেণুধৰ শৰ্মাৰ স্মৃতি দিৱস । তেওঁ আছিল একাধাৰে সাহিত্যিক, সাংবাদিক, সমাজ সংস্কাৰক আৰু প্ৰত্নতত্ত্ববিদ । ১৯১৫ চনত শিৱসাগৰ উচ্চ মাধ্যমিক বিদ্যালয়ৰ পৰা প্ৰৱেশিকা পৰীক্ষাত উত্তীৰ্ণ হৈ উচ্চ শিক্ষাৰ বাবে কলিকতালৈ গৈছিল যদিও অসহযোগ আন্দোলনত অংশ গ্ৰহণ কৰি শিক্ষা আধাতে সামৰি উভতি আহে আৰু শিক্ষকতাৰে কৰ্মজীৱনৰ পাতনি মেলে।তেওঁ আছিল সাহিত্য অকাডেমি বঁটা লাভ কৰা দ্বিতীয়গৰাকী অসমীয়া । কংগ্ৰেছৰ কাচিয়লি ৰ’দত নামৰ গ্ৰন্থখনৰ বাবে ১৯৬০ চনত তেওঁ এই বঁটা লাভ কৰিছিল। ১৯৫৬ চনত ধুবুৰীত অনুষ্ঠিত অসম সাহিত্য সভাৰ অধিৱেনত তেওঁ সভাপতিত্ব কৰিছিল । অসম বুৰঞ্জীৰ উপকৰণ, দেশদ্ৰোহী কোন বদন নে পূৰ্ণানন্দ, মোগল খেলাৰ আখৰা আদি তেওঁৰ প্ৰকাশিত পুথি। তেওঁ ‘তৰুণ অসম’ৰ সম্পাদক আৰু প্ৰথম অসমীয়া দৈনিক বাতৰি কাকত ‘দৈনিক বাতৰি’ৰ সহকাৰী সম্পাদক আছিল। ১৯৮১ চনৰ আজিৰ দিনটোতে তেওঁৰ দেহাৱসান ঘটে । ভাৰত চৰকাৰে মৰণোত্তৰভাৱে তেওঁক পদ্মভূষণ সন্মান প্ৰদান কৰে। এইগৰাকী বিশিষ্ট ব্যক্তিলৈ আমাৰ প্ৰণাম ।
আজি বিশিষ্ট সাহিত্যিক তথা গৱেষক নন্দ তালুকদাৰৰ স্মৃতি দিৱস । তেওঁ প্ৰথমতে শ্বিলঙৰ শংকৰদেৱ কলেজত অধ্যাপনা কৰিছিল আৰু পিছলৈ গুৱাহাটীৰ পাণ্ডু কলেজত অধ্যাপনা কৰিবলৈ লৈ তাৰ পৰাই অৱসৰ গ্ৰহণ কৰে । তেওঁ ৰচনা আৰু সম্পাদনা কৰা গ্ৰন্থসমূহৰ ভিতৰত কবি আৰু কবিতা, চিৰ চেনেহী মোৰ ভাষা জননী, সম্বাদ পত্ৰৰ ৰ’দ কাঁচলিত অসমীয়া সাহিত্য আদি উল্লেখযোগ্য। ১৯৮৩ চনৰ আজিৰ দিনটোতে তেওঁৰ দেহাৱসান ঘটে। এইগৰাকী মহান ব্যক্তিলৈ আমাৰ প্ৰণাম ।
