আজি বিশিষ্ট সংস্কৃত পণ্ডিত আনন্দৰাম বৰুৱাৰ ওপজা দিন । ১৮৫০ চনৰ আজিৰ দিনটোতে উত্তৰ গুৱাহাটীত তেওঁৰ জন্ম হৈছিল । তেওঁ আছিল প্ৰথম অসমীয়া প্ৰশাসনিক বিষয়া (আইচিএছ), প্ৰথম স্নাতক আৰু অধিবক্তা । তেওঁ সংস্কৃত ভাষাৰ এগৰাকী বিদগ্ধ পণ্ডিত আছিল । তেওঁ অসমীয়া ভাষাত কোনো গ্ৰন্থ ৰচনা কৰা নাছিল যদিও সংস্কৃত ভাষাত ৰচিত তেওঁৰ গ্ৰন্থকেইখন বিশ্বৰ পণ্ডিতসকলৰ দ্বাৰা সমাদৃত হৈছিল । হায়াৰ সংস্কৃত গ্ৰামাৰ, এনচিয়েণ্ট জিঅ’গ্ৰাফী অব ইণ্ডিয়া, ইংলিছ-সংস্কৃত ডিক্সনাৰী, মহাবীৰ চৰিতম, সৰস্বতী কথাভৰণম আদি তেওঁৰ উল্লেখযোগ্য গ্ৰন্থ । এইগৰাকী পণ্ডিতলৈ আমাৰ প্ৰণাম ।
আজি অসমৰ প্ৰথমগৰাকী মুখ্যমন্ত্ৰী ছাৰ ছৈয়দ মহম্মদ ছাদুল্লাৰ ওপজা দিন । ১৮৮৫ চনৰ আজিৰ দিনটোতে গুৱাহাটীত তেওঁৰ জন্ম হৈছিল । তেওঁ ব্ৰিটিছ ভাৰতৰ অসম প্ৰদেশৰ মুখ্যমন্ত্ৰী (তেতিয়া প্ৰধানমন্ত্ৰী বোলা হৈছিল) আছিল । ১৯৩৭ চনত তেওঁ মুছলিম লীগ কেবিনেটৰ মুখ্যমন্ত্ৰী হিচাপে নিৰ্বাচিত হয় । ইয়াৰ পূৰ্বে তেওঁ ১৯১৯ চনত গুৱাহাটী পৌৰ সভাৰ সভাপতি আৰু ১৯২৪ চনৰ পৰা ১৯৩৪ চনলৈ অসম চৰকাৰৰ শিক্ষা আৰু কৃষি বিভাগৰ ভাৰপ্ৰাপ্ত মন্ত্ৰী আছিল । তেওঁ এগৰাকী অধিবক্তাও আছিল । ১৯৪৬ চনত ব্ৰিটিছ চৰকাৰে তেওঁক সন্মানীয় নাইট (অৰ্ডাৰ অব ইণ্ডিয়ান এম্পায়াৰ) উপাধি প্ৰদান কৰে । এইগৰাকী নেতালৈ আমাৰ প্ৰণাম ।
আজি ভাৰতীয় পৰিৱেশবিদ সুন্দৰলাল বহুগুণাৰ স্মৃতি দিৱস । তেওঁ বিখ্যাত চিপকো আন্দোলনৰ নেতা আছিল । বহু বছৰ ধৰি তেওঁ হিমালয়ৰ অৰণ্য সংৰক্ষণৰ বাবে যুঁজ দিছিল । তেওঁ তেহৰি বান্ধ বিৰোধী আন্দোলনৰো নেতৃত্ব দিছিল । তেওঁ এগৰাকী সক্ৰিয় গান্ধীবাদী আছিল । ভাৰত চৰকাৰে পৰিৱেশ সংৰক্ষণৰ বাবে তেওঁক পদ্মবিভূষণ সন্মান প্ৰদান কৰে । ২০২১ চনৰ আজিৰ দিনটোতে কোভিড-১৯ত আক্ৰান্ত হৈ উত্তৰাখণ্ডৰ ঋষিকেশত তেওঁৰ মৃত্যু হয় । এইগৰাকী পৰিৱেশবিদলৈ আমাৰ প্ৰণাম ।
