আজি জনপ্ৰিয় অসমীয়া অভিনেত্ৰী ইভা আচাওৰ স্মৃতি দিৱস । তেওঁ চলচ্চিত্ৰ, ভ্ৰাম্যমাণ থিয়েটাৰ আৰু অনাতাঁৰ নাটতো অভিনয় কৰিছিল । পঞ্চাশ-ষাঠিৰ দশকৰ কেইবাখনো চলচ্চিত্ৰত মনপৰশা অভিনয় কৰি আজিও দৰ্শকৰ মনত সাঁচ বহুৱাই থৈছে । পিয়লি ফুকন চলচ্চিত্ৰৰ যোগেদি তেওঁ চলচ্চিত্ৰৰ জগতখনত পদাৰ্পণ কৰে । তাৰ পিছত তেওঁ ভক্ত প্ৰহ্লাদ, কেঁচাসোণ, পুৱতি নিশাৰ সপোন, লাচিত বৰফুকন, শকুন্তলা, নৰকাসুৰ, মণিৰাম দেৱান, এৰা বাটৰ সুৰ, প্ৰতিধ্বনি, মমতা, সন্তান, ভাইটি আদি অসমীয়া চলচ্চিত্ৰত অভিনয় কৰে । ১৯৮২-৮৩ বৰ্ষত তেওঁ অনিৰ্বাণ থিয়েটাৰতো অভিনয় কৰে । তেওঁ বলীউডৰ প্ৰখ্যাত চলচ্চিত্ৰ নিৰ্মাতা বিমল ৰয়ৰ সুজাতা, উৰ্দু চলচ্চিত্ৰ দূৰ হেই সুখ কি গাঁও, বাংলা চলচ্চিত্ৰ বাঘিনী, পাগল বাবু আৰু তৃষ্ণাত অভিনয়ৰ প্ৰস্তাৱ লাভ কৰিছিল যদিও একমাত্ৰ পৰিয়ালৰ ৰক্ষণশীলতাৰ বাবে সেই সুযোগ গ্ৰহণ কৰিব নোৱাৰিলে, কেৱল উৰ্দু চলচ্চিত্ৰখনতহে অভিনয়ৰ বাবে পিতৃৰ সন্মতি বহু চেষ্টাৰ মূৰত লাভ কৰে । ১৯৫৮ চনত তেওঁ ফিল্মফেয়াৰ আলোচনীৰ সৰ্বভাৰতীয় প্ৰতিভা সন্ধানী প্ৰতিযোগিতাৰ মহিলা শাখাত শ্ৰেষ্ঠ প্ৰতিযোগীৰ সন্মান লাভ কৰে । ১৯৮৮ চনৰ আজিৰ দিনটোতে তেওঁ জীৱন নাটৰ সামৰণি মাৰে । এইগৰাকী শিল্পীলৈ আমাৰ প্ৰণাম ।
আজি অসমৰ প্ৰথমগৰাকী মহিলা চলচ্চিত্ৰ পৰিচালিকা সুপ্ৰভা দেৱীৰ স্মৃতি দিৱস । তেওঁৰ স্বামী আছিল প্ৰযোজক দ্বিজেন্দ্ৰ নাৰায়ণ দেৱ আৰু তেওঁ স্বামীৰ সৈতে যুটীয়াভাৱে যোগ-বিয়োগ, তৰামাই, মৰমী, ৰাংঢালী আদি কেইবাখনো চলচ্চিত্ৰ প্ৰযোজনা কৰে । ১৯৮৪ চনত তেওঁ নয়নমণি আৰু ১৯৮৬ চনত সৰৱজান চলচ্চিত্ৰ দুখন পৰিচালনা কৰে । তেওঁ ২০০৩ চনত জিলিকাব লুইতৰে পাৰ নামৰ এখন ধাৰাবাহিক গুৱাহাটী দূৰদৰ্শন কেন্দ্ৰৰ বাবে নিৰ্মাণ কৰিছিল । তেওঁ এগৰাকী গীতিকাৰো আছিল । ২০১১ চনৰ আজিৰ দিনটোতে তেওঁৰ দেহাৱসান ঘটে । এইগৰাকী চলচ্চিত্ৰ কৰ্মীলৈ আমাৰ প্ৰণাম ।
আজি বিপ্লৱী ছে গুৱেভাৰাৰ ওপজা দিন । ১৯২৮ চনৰ আজিৰ দিনটোতে তেওঁ আৰ্জেণ্টিনাৰ ৰ’ছাৰিঅ’ত জন্ম লাভ কৰে । তেওঁ আছিল এগৰাকী চিকিৎসক, লেখক, গেৰিলা যোদ্ধা তথা চৰকাৰী বিষয়া । তেওঁ কিউবাৰ বিপ্লৱৰ এগৰাকী অগ্ৰণী নেতা আছিল । এই বিপ্লৱীগৰাকীলৈ আমাৰ প্ৰণাম ।
