আজি সংস্কৃত পণ্ডিত, দাৰ্শনিক তথা সাহিত্যিক ৰাধানাথ ফুকনৰ স্মৃতি দিৱস । তেওঁ এগৰাকী প্ৰশাসনিক বিষয়াও আছিল । ব্ৰিটিছ চৰকাৰে তেওঁক ৰায়বাহাদুৰ উপাধি প্ৰদান কৰিছিল । এ ই চি হিচাপে কৰ্মজীৱনৰ আৰম্ভণি কৰি ছেছন জাজ হিচাপে তেওঁ অৱসৰ গ্ৰহণ কৰে । তেওঁ এগৰাকী চাহ খেতিয়কো আছিল । তেওঁ আছিল অসমৰ প্ৰথমগৰাকী স্নাতকোত্তৰ ডিগ্ৰীধাৰী । তেওঁৰ ৰচনাত ভাৰতীয় দৰ্শনৰ মূল তত্ত্বসমূহৰ বিজ্ঞানসন্মত বিশ্লেষণ পোৱা যায় । দৰ্শন শাস্ত্ৰসমূহ তেওঁ মূল সংস্কৃতৰ পৰা অসমীয়া আৰু ইংৰাজীলৈ অনুবাদ কৰিছিল । তেওঁ ইংৰাজী আৰু হিন্দী ভাষাতো সাহিত্য চৰ্চা কৰিছিল । সাংখ্য দৰ্শন, বেদান্ত দৰ্শন, কথাৰে উপনিষৎ (হিন্দী আৰু অসমীয়াত), বিজ্ঞানৰ সিপাৰে (হিন্দী আৰু অসমীয়াত), অসমীয়াৰ ভৱিষ্যত, The Theory of Rebirth তেওঁৰ উল্লেখযোগ্য গ্ৰন্থ । গুৱাহাটী বিশ্ববিদ্যালয়ে তেওঁক ডি লিট সন্মান প্ৰদান কৰে । সংস্কৃত সঞ্জীৱনী সভাই বেদান্ত বাচস্পতি উপাধি প্ৰদান কৰে । ১৯৬৪ চনৰ আজিৰ দিনটোতে তেওঁৰ দেহাৱসান ঘটে । এইগৰাকী মণিষীলৈ আমাৰ প্ৰণাম ।
আজি বিশিষ্ট ৰাজনীতিক তথা সাহিত্যিক গৌৰীশংকৰ ভট্টাচাৰ্যৰ স্মৃতি দিৱস । তেওঁ সদৌ অসম ছাত্ৰ ফেডাৰেচনৰ সভাপতি আছিল । তদুপৰি নিখিল ভাৰত ছাত্র ফেডাৰেচনৰ কাৰ্যকৰী সদস্য আৰু নিখিল ভাৰত ট্ৰেড ইউনিয়ন কংগ্ৰেছৰ ৰাষ্ট্ৰীয় পৰিষদৰ সদস্য আছিল । বাঁওপন্থী ৰাজনীতিকগৰাকীয়ে চাৰিবাৰ অসম বিধানসভালৈ নিৰ্বাচিত হৈছিল । তেওঁ ১৯৬৯ চনত পিপলছ ডেম’ক্ৰেটিক পাৰ্টী অব আছাম নামৰ ৰাজ্যৰ প্ৰথমটো বাঁওপন্থী আঞ্চলিক দল প্ৰতিষ্ঠা কৰিছিল । তেওঁ আঞ্চলিকতাবাদ আৰু ৰাষ্ট্ৰীয়তাবাদৰ সমন্বিত ৰাজনীতি কৰিছিল । সাহিত্যতো তেওঁৰ দখল আছিল । আৱাহন আলোচনীত তেওঁৰ ভালেমান গল্প প্ৰকাশ পাইছিল । তেওঁৰ গল্প সংকলনখনৰ নাম প্ৰেমতকৈও তীব্ৰ । ভূমিপুত্ৰৰ সমবেদনা তেওঁৰ আন এখন গ্ৰন্থ । সবিনয় নিবেদন তেওঁৰ আত্মজীৱনীমূলক গ্ৰন্থ । তেওঁ ১৯৯৭ চনত অম্বিকাগিৰি ৰায়চৌধুৰী বঁটা লাভ কৰিছিল । তেওঁ এগৰাকী অনুবাদকো আছিল । ১৯৯৮ চনত তেওঁ সাহিত্য অকাডেমি অনুবাদ বঁটা লাভ কৰে । ২০০৩ চনৰ আজিৰ দিনটোতে তেওঁৰ দেহাৱসান ঘটে । এইগৰাকী নেতালৈ আমাৰ প্ৰণাম ।
আজি ঐতিহাসিক অসম আন্দোলনৰ প্ৰথমগৰাকী শ্বহীদ খৰ্গেশ্বৰ তালুকদাৰৰ ওপজা দিন । ১৯৫৯ চনৰ আজিৰ দিনটোতে তেওঁ ভৱানীপুৰৰ উজান বৰবৰী গাঁৱত জন্ম লাভ কৰিছিল ।তেওঁ সদৌ অসম ছাত্ৰ সন্থাৰ সক্ৰিয় কৰ্মী আছিল । হাউলীৰ বি এইছ কলেজৰ প্ৰাক-বিশ্ববিদ্যালয় শ্ৰেণীৰ ছাত্ৰ অৱস্থাতে ১৯৭৯ চনৰ ১০ ডিচেম্বৰৰ দিনা আন্দোলনৰ কাৰ্যসূচীত যোগ দিবলৈ গৈ তেওঁ পুলিচৰ গুলীত প্ৰাণ হেৰুৱাবলগীয়া হয় । শ্বহীদগৰাকীলৈ আমাৰ প্ৰণাম ।
