ভাৰতীয় ক্ৰিকেট ব’ৰ্ডে টি-২০ বিশ্বকাপৰ পাছত ভাৰতীয় ক্ৰিকেট দলৰ বাবে নতুন প্ৰশিক্ষক নিযুক্তি দিব। বিচিচিআইয়ে ইচ্ছুকসকলক আবেদন কৰিবলৈ অনুৰোধ জনাইছে। ২০২৭ চনৰ এদিনীয়া বিশ্বকাপলৈ নতুন প্ৰশিক্ষকৰ সৈতে চুক্তিবদ্ধ হোৱাৰ সিদ্ধান্ত গ্ৰহণ কৰিছে ব’ৰ্ডে। ঘনিষ্ঠ সূত্ৰই জনোৱা মতে, ৰাহুল দ্ৰাবিড় পুনৰ প্ৰশিক্ষকৰ দায়িত্ব ল’বলৈ ইচ্ছুক নহয়। তেনে ক্ষেত্ৰত নতুন কোনো অভিজ্ঞ ব্যক্তিক এই দায়িত্ব দিব লাগিব । বিচিচিআইয়ে ঘোষণা কৰিছে ৯টা চৰ্ত। নতুন প্ৰশিক্ষকে সেই সকলোবোৰ পূৰণ কৰিব লাগিব। ভাৰতীয় দলৰ নতুন প্ৰশিক্ষকৰ বাবে বিচিচিআইয়ে দিয়া চৰ্তসমূহ চাওঁ আহক।
১) মুখ্য প্ৰশিক্ষকৰ বাবে কমেও ৩০ খন টেষ্ট বা ৫০ খন এদিনীয়া খেল খেলাৰ অভিজ্ঞতা থাকিব লাগিব। আন্তঃৰাষ্ট্ৰীয় ক্ৰিকেট পৰিষদৰ (আইচিচি) পূৰ্ণ সদস্যৰ ৰাষ্ট্ৰীয় দলৰ প্ৰশিক্ষক হিচাপে কাম কৰাৰ কমেও দুবছৰৰ অভিজ্ঞতা থাকিব লাগিব। যদিহে আইচিচিৰ সহযোগী সদস্যজনে কোনো দেশৰ জাতীয় দলৰ প্ৰশিক্ষক, আইপিএলৰ বিদেশী লীগৰ ফ্ৰেঞ্চাইজি বা সমতুল্য, প্ৰথম শ্ৰেণীৰ ক্ৰিকেট দল বা কোনো দেশৰ ‘এ’ দলৰ প্ৰশিক্ষক হিচাপে কাম কৰাৰ অভিজ্ঞতা থাকিলেও আবেদন কৰিব পাৰিব ৷ এই ক্ষেত্ৰত কমেও তিনি বছৰৰ কৰ্ম অভিজ্ঞতা থাকিব লাগিব। বিচিচিআই লেভেল ৩ বা সমতুল্য কোচিং ডিগ্ৰী বাধ্যতামূলক। বয়স ৬০ বছৰৰ কম হ’ব লাগিব।
২)ভাৰতীয় দলৰ মুখ্য প্ৰশিক্ষকে মুম্বাইৰ পৰা কাম কৰিব লাগিব।
৩) ২০২৪ চনৰ ১ জুলাইৰ পৰা ২০২৭ চনৰ ৩১ ডিচেম্বৰলৈকে দায়িত্বত থাকিব লাগিব। সহায়ক হিচাপে ১৪ৰ পৰা ১৬জন লোক উপলব্ধ হ’ব।
৪) ভাৰতীয় দলৰ প্ৰশিক্ষণৰ মূল দায়িত্ব পালন কৰিব লাগিব। দলটো প্ৰস্তুত কৰাৰ দায়িত্ব তেওঁৰ।
৫)ভাৰতীয় দলটোক বিশ্বমানৰ কৰি তুলিব লাগিব। যাতে দলটোৱে যিকোনো ধৰণৰ ক্ৰিকেটত, যিকোনো ঠাইতে আৰু যিকোনো চৰ্তত সফলতা লাভ কৰিব পাৰে। জ্যেষ্ঠ আৰু যুৱ ক্ৰিকেটাৰৰ সৈতে কাম কৰিব লাগিব । তিনিওবিধ ক্ৰিকেটত ভাৰতীয় দলৰ প্ৰদৰ্শনৰ বাবে মুখ্য প্ৰশিক্ষকৰ দায়িত্ব থাকে। সহকাৰী প্ৰশিক্ষক আৰু অন্যান্য সহায়ক কৰ্মচাৰীয়ে দায়িত্বসমূহ ভাগ-বতৰা কৰিব পাৰে ৷ তেওঁলোকৰ কৰ্মক্ষমতাও নিৰীক্ষণ কৰিব লাগে। দলৰ সকলো ধৰণৰ অনুশাসনৰ দায়িত্ব মুখ্য প্ৰশিক্ষকে ল’ব লাগিব।
৬) বিশ্বৰ প্ৰথম শাৰীৰ ক্ৰিকেটাৰৰ সৈতে কাম কৰাৰ চাপ সহিব লাগিব ৷ খেলৰ মানৰ লগত খাপ খোৱাকৈ কাম কৰিব লাগিব।
৭) সমৰ্থক, সম্প্ৰচাৰক, সংবাদ মাধ্যম, অন্যান্য জাতীয় দল (মহিলা বা ১৯ বছৰৰ তলৰ), বিচিচিআইৰ সকলো বিষয়া, বিচিচিআইৰ চিইঅ’ আৰু ৰাষ্ট্ৰীয় বাছনি সমিতিৰ সৈতে সুসম্পৰ্ক বজাই ৰাখিব লাগিব । প্ৰয়োজনীয় যোগাযোগ বজাই ৰাখিব লাগে।
৮) দল আৰু ক্ৰিকেটাৰৰ প্ৰদৰ্শনৰ ওপৰত ভিত্তি কৰি সিদ্ধান্ত লোৱাৰ ক্ষমতা থাকিব লাগিব ।
৯) ভাৰতীয় দলৰ মুখ্য প্ৰশিক্ষক কৌশল ৰচনা কৰাত পাকৈত হোৱা উচিত। দলটোক ধাৰাবাহিকভাৱে সফলতাৰ দিশত আগুৱাই নিব লাগিব। দলৰ ভিতৰত জয়ী হোৱাৰ সংস্কৃতি গঢ়ি তুলি শীৰ্ষলৈ লৈ যাব লাগিব। মুখ্য প্ৰশিক্ষকে দলৰ সকলোকে দক্ষতাৰে চম্ভালিব লাগে। দলটো পেছাদাৰী পদ্ধতিৰে পৰিচালনা কৰিব লাগিব। প্ৰতিজন ক্ৰিকেটাৰক যথাযথ গুৰুত্ব দিয়া উচিত। ক্ৰিকেটাৰসকলৰ প্ৰতিভা আৰু দক্ষতাৰ সম্পূৰ্ণ ব্যৱহাৰ কৰিব লাগিব। দলটো সদায় আত্মবিশ্বাসী হ’ব লাগিব। দলৰ বাবে হ্ৰস্বম্যাদী আৰু দীৰ্ঘম্যাদী পৰিকল্পনা প্ৰস্তুত কৰিব লাগিব । এজনৰ সকলো ধৰণৰ ক্ৰিকেটৰ বাবে বিভিন্ন পৰিকল্পনা প্ৰস্তুত কৰাৰ ক্ষমতা থাকিব লাগিব।
