শ্বুটআউটত ব্ৰিটেইনক পৰাস্ত কৰি ভাৰতে অলিম্পিক হকীৰ ছেমি ফাইনেলত প্ৰৱেশ কৰিছে । নিয়মীয়া সময়ৰ খেলখন ১-১ গ’লত সমাপ্ত হোৱাৰ পিছত শ্বুটআউট হয়। ভাৰতে ৪-২ গ’লত জয়লাভ কৰে। ভাৰতীয় দলটোৱে ১০ জনীয়া দলৰ সৈতে ৪২ মিনিট খেলি বিজয় সাৱ্যস্ত কৰে ৷ ভাৰতে ছেমি ফাইনেলত জাৰ্মানী আৰু আৰ্জেণ্টিনাৰ মাজত বিজয়ী দলৰ বিৰুদ্ধে খেলিব। মঙলবাৰৰ খেলখনত জয়ী হ’লে শেষবাৰৰ ব্ৰঞ্জৰ পদক বিজয়ী দলে পেৰিছ অলিম্পিকত ৰূপৰ পদক নিশ্চিত কৰিব।
এই খেলখনত অমিত ৰুইদাসক ৰঙা কাৰ্ড দেখুৱাইছিল। ভিডিঅ’ আম্পায়াৰ বেঞ্জামিন গুৱেণ্টগেনৰ পৰামৰ্শ মতে ভাৰতীয় দলৰ ডিফেন্সৰ অন্যতম মূল ভেটি ৰুইদাসক দ্বিতীয় কোৱাৰ্টাৰৰ চতুৰ্থ মিনিটত ৰঙা কাৰ্ড দেখুওৱা হয়। প’ছেছনৰ বাবে হোৱা যুঁজৰ সময়ত ভুলবশতঃ তেওঁৰ লাঠিডালে এজন ব্ৰিটিছ খেলুৱৈৰ মূৰত খুন্দা মাৰে। বেঞ্জামিনে দক্ষিণ আফ্ৰিকাৰ ফিল্ড আম্পায়াৰ শ্বেন ৰাপাপৰ্টক কয় যে এই হিটটো “ইচ্ছাকৃতভাৱে” কৰা হৈছে। বাকী সময়খিনি ভাৰতীয় দলটোৱে ১০জন খেলুৱৈৰ সৈতে খেলিব লগা হৈছিল। অলিম্পিক হকীত প্ৰথমবাৰৰ বাবে কোনো খেলুৱৈক ৰঙা কাৰ্ড দেখুওৱা হৈছিল।
অৱশ্যে ভাৰতীয় দলটোক এই বিপদে ৰখাব নোৱাৰিলে। ১০ জনলৈ হ্ৰাস পোৱাৰ পিছত ভাৰতীয় দলৰ প্ৰশিক্ষক ক্ৰেগ ফুলটনে কৌশল সলনি কৰিলে। খেলখনৰ ২২ মিনিটত পেনাল্টি কৰ্ণাৰত অধিনায়ক হৰমনপ্ৰীতে ভাৰতক অগ্ৰগতি প্ৰদান কৰে। ভাৰতীয় দলটোৱে কোৱাৰ্টাৰ ফাইনেলৰ আৰম্ভণিৰে পৰাই ৰক্ষণাত্মক কৌশল অৱলম্বন কৰিছিল। আগবাঢ়ি যোৱাৰ পিছত ভাৰতীয় দলটো অধিক ৰক্ষণশীল হৈ পৰিল। সেই সুযোগ লৈ ব্ৰিটেইনে ২৭ মিনিটত মৰ্টন লীৰ গ’লেৰে সমতা স্থাপন কৰে। দ্বিতীয় কোৱাৰ্টাৰৰ বাকী সময়ছোৱাত ব্ৰিটিছ খেলুৱৈসকলে ভাৰতীয় ৰক্ষণভাগত যথেষ্ট হেঁচা প্ৰয়োগ কৰিবলৈ চেষ্টা কৰিছিল। কিন্তু সফল নহ’ল ৷
এজন কম খেলুৱৈৰে হকী খেলাটো কঠিন। অৱশ্যে ভাৰতীয় দলটোৱে এক চেকেণ্ডৰ বাবেও ইয়াৰ অনুভৱ হ’বলৈ দিয়া নাছিল। শেষত নিৰ্ধাৰিত ৬০ মিনিটৰ খেলখন ১-১ গ’লত সমাপ্ত হয়। মেচখন শ্বুট আউটলৈ যায়। শ্বুট আউটত ভাৰতৰ হৈ হৰমনপ্ৰীত, সুখজিৎ সিং, ললিত কুমাৰ উপাধ্যায় আৰু ৰাজকুমাৰ পালে গ’ল দিয়ে। ব্ৰিটেইনৰ হৈ জেমছ এলবেৰী, জেক ৱালছে গ’ল দিয়ে। কন’ৰ উইলিয়ামছন আৰু ফিলিপ ৰ’পাৰ গ’ল দিয়াত ব্যর্থ হয়।
