হেমদোলত “কাৰাটে প্ৰশিক্ষণ কেন্দ্ৰ”ৰ শুভাৰম্ভ

ৰঙিয়া মহকুমাৰ অন্তৰ্গত হেমদোলত ‘ৰঙিয়া জিলা কাৰাটে এছোছিয়েশ্যন’ৰ সহযোগত আৰু ‘আকাশ ষ্পৰ্টচ একাডেমী’ৰ উদ্যোগত ৰঙিয়াৰ সমীপৰ হেমদোল প্ৰাথমিক বিদ্যালয় প্ৰাঙ্গনত এটি কাৰাটে প্ৰশিক্ষণ কেন্দ্ৰৰ শুভাৰম্ভ কৰা হয় ৷ ৰঙিয়াৰ এটি অগ্ৰণী স্বেচ্ছাসেৱী অনুষ্ঠান “আকাশ”ৰ ক্ৰীড়াক সমাজ জীৱনৰ অংশ হিচাবে প্ৰাধান্য দিয়াৰ বাবে উদ্যোগী সংস্থা ” আকাশ ষ্পৰ্টচ একাডেমী” ৰ উদ্যোগত আৰম্ভ কৰা “কাৰাটে প্ৰশিক্ষণ কেন্দ্ৰ”টোৰ শুভ উদ্বোধন কৰে ৰাষ্ট্ৰীয় খেলুৱৈ আৰু অসম কাৰাটে এছোছিয়েশ্যনৰ যুটীয়া সম্পাদক তথা ৰঙিয়া কাৰাটে এছোছিয়েশ্যনৰ সম্পাদক চৈয়দ মাজহাৰুল ইছলামে ৷ চহৰত সুযোগ সুবিধা বেছি যদিও বেছিভাগ গাঁৱৰ পৰা যোৱা প্ৰতিভাইহে ক্ৰীড়া জগতখন উজলাই ৰাখিছে বুলি বক্তব্য ৰাখি তেখেতে শিক্ষাৰ্থীসকলক উদ্বোদ্ধ কৰে ৷ ড্ৰাগচৰ দৰে নিচাসক্ত সামগ্ৰীয়ে সমাজৰ যুৱচামক ধ্বংস কৰিব ওলোৱা সময়ত প্ৰধানত খেলুৱৈ সকলক এনে বস্তুবোৰে প্ৰভাৱিত কৰিব নোৱাৰে বুলি মন্তব্য ৰাখে সমাজকৰ্মী গুণমণি দাসে ৷ শিশু খেলুৱৈ সুৰঞ্জন কলিতাৰ কাৰাটেৰ কলা-কৌশল প্ৰদশৰ্নে সমজুৱাক আপ্লুত কৰে ৷ সমাজ সংগঠক হেমন্ত কলিতাই আঁত ধৰা শুভাৰম্ভ অনুষ্ঠানটিত অংশগ্ৰহণ কৰে প্ৰশিক্ষক ভূপেন নমশুদ্ৰ আৰু অজন্তা দাস , “আকাশ”ৰ বিপুল কাকতি, ধ্ৰুৱজ্যোতি কলিতা, নিপন দত্ত কলিতা, প্ৰণিতা কলিতা, চুমিতা শীল, বন্দনা বৈশ্য আৰু বহুকেইজন স্থানীয় ক্ৰীড়ানুৰাগীয়ে ৷ প্ৰশিক্ষণত নামভৰ্তিৰ বাবে ৯১০১২-৬৪২৫৬ আৰু ৯১০১১-১৫০৮৫ নম্বৰত যোগাযোগ কৰিবলৈ উদ্যোক্তাসকলে আহ্বান জনাইছে ৷