১৫ অক্টোবৰত সকলো ক্ৰিকেট প্ৰেমীৰ দৃষ্টি নিৱদ্ধ হৈ থাকিব আহমেদাবাদত ৷ যদিহে নিৰাপত্তাজনিত কাৰণত তাৰিখ সলনি নহয় তেন্তে সেইদিনা এদিনীয়া বিশ্বকাপত ভাৰত-পাকিস্তান মুখামুখি হ’ব। এই হাই ভল্টেজ মেচৰ দিনটোত ভাৰতৰ বিভিন্ন প্ৰান্তৰ পৰা দৰ্শকে গুজৰাটৰ আহমেদাবাদলৈ যাত্ৰা কৰিব। সেইবাবেই মেচৰ আগদিনা অৰ্থাৎ ১৪ অক্টোবৰৰ বিমান ভাড়া আন দিনৰ তুলনাত প্ৰায় তিনিগুণ বৃদ্ধি পাইছে। ইতিমধ্যে সেইদিনাৰ বিমানৰ টিকট প্ৰায় বিক্ৰী হৈ গৈছে। দিনক দিনে বৃদ্ধি পাইছে বিমান ভাড়া।
যিকোনো দিনতে কলকাতাৰ পৰা আহমেদাবাদলৈ পোনপটীয়া বিমান ভাড়া প্ৰায় ৭ হাজাৰ টকা প্ৰতি যাত্ৰীৰ। কিন্তু সেই ভাড়া ১৪ অক্টোবৰত প্ৰতিজন যাত্ৰীৰ ২৩ৰ পৰা ২৭ হাজাৰ টকালৈ বৃদ্ধি পাইছে। অৰ্থাৎ ১৪ অক্টোবৰত আহমেদাবাদলৈ গ’লে যাত্ৰীসকলে আন দিনতকৈ তিনিগুণ খৰচ কৰিব লাগিব। কলকাতাৰ পৰা আহমেদাবাদলৈ দিল্লী বা মুম্বাইতকৈ বেছি সময় লাগে। গতিকে কলকাতাৰ পৰা আহমেদাবাদলৈ প্ৰত্যক্ষ বিমান ভাড়া আন দুখন চহৰতকৈ বেছি।
দিল্লীৰ পৰা আহমেদাবাদলৈ পোনপটীয়া বিমান যাত্ৰাত ডেৰ ঘণ্টা সময় লাগে। বিমান ভাড়া প্ৰতি যাত্ৰীৰ ৫ হাজাৰ টকাতকৈ অলপ কম। তাত ভাৰত-পাক খেলৰ আগদিনা বিমান ভাড়া প্ৰতিজন যাত্ৰীৰ ১৭ হাজাৰৰ পৰা ১৮ হাজাৰ টকাৰ ভিতৰত। অৰ্থাৎ দিল্লীৰ পৰা আহমেদাবাদলৈ বিমান ভাড়াও সেইদিনা তিনিগুণ বেছি হ’ব।
কলকাতা আৰু দিল্লীৰ তুলনাত মুম্বাইৰ পৰা আহমেদাবাদলৈ যাত্ৰা কৰিবলৈ কম সময় লাগে। এঘণ্টাৰ ভিতৰতে মুম্বাইৰ পৰা আহমেদাবাদত উপস্থিত হ’ব পাৰি ৷ মুম্বাইৰ পৰা আহমেদাবাদলৈ পোনপটীয়া বিমান ভাড়া প্ৰায় ৪ হাজাৰ টকা। সেই ভাড়া মেচৰ দিনটোত প্ৰতিজন যাত্ৰীৰ বাবে ১২ৰ পৰা ১৪ হাজাৰ টকা। অৰ্থাৎ সেই ভাড়া তিনিগুণ বৃদ্ধি পাইছে।
নৱৰাত্ৰিৰ নিৰাপত্তাজনিত কাৰণত ভাৰত-পাকিস্তানৰ খেলৰ তাৰিখ সলনি হ’ব পাৰে। নৱৰাত্ৰি গুজৰাটৰ এক গুৰুত্বপূৰ্ণ উৎসৱ। একেৰাহে দহদিন ধৰি চলি থকা এই উৎসৱে স্থানীয় ৰাইজক ব্যস্ত কৰি ৰাখে। ফলত বিশ্বকাপৰ আটাইতকৈ গুৰুত্বপূৰ্ণ মেচ দিৱসত পৰ্যাপ্ত আৰক্ষীৰ ব্যৱস্থাৰ পৰা আৰম্ভ কৰি খেলুৱৈ আৰু দৰ্শকৰ নিৰাপত্তালৈকে সমস্যাৰ সৃষ্টি হ’ব পাৰে। ভাৰতৰ বিভিন্ন নিৰাপত্তা সংস্থাই আন এটা দিনত খেলখন অনুষ্ঠিত কৰিবলৈ ব’ৰ্ডক অনুৰোধ জনাইছে।
ব’ৰ্ডৰ এগৰাকী বিষয়াই সংবাদ মাধ্যমৰ আগত কয়, ‘আমাৰ হাতত উপলব্ধ বিকল্পসমূহৰ বিষয়ে আলোচনা কৰা হৈছে আৰু অতি সোনকালে সিদ্ধান্ত লোৱা হ’ব। নিৰাপত্তা সংস্থাসমূহে আমাক জনাইছে যে ভাৰত-পাকিস্তানৰ দৰে হাই প্ৰফাইল মেচত দেশ-বিদেশৰ হাজাৰ হাজাৰ অনুৰাগী আহমেদাবাদলৈ আহিব। নৱৰাত্ৰিৰ বাবে সেই সময়ত সেই মেচ আয়োজন কৰাত সমস্যা হ’ব পাৰে।” মেচৰ নতুন দিন ঘোষণা হোৱাৰ আগদিনা বিমান ভাড়া, ইমান বৃদ্ধি হ’ব পাৰে।
