শুকুৰবাৰে অনুষ্ঠিত হ’ব অলিম্পিকৰ উদ্বোধনী অনুষ্ঠান ৷ তাৰ দুদিন আগতে ফুটবলকে ধৰি কিছু খেল আৰম্ভ হ’ব । বুধবাৰে প্ৰথম দিনাই খেলপথাৰত প্ৰৱেশ কৰিব ইউৰো কাপ বিজয়ী স্পেইন আৰু কোপা আমেৰিকা বিজয়ী আৰ্জেণ্টিনা। স্পেইনে উজবেকিস্তানৰ বিৰুদ্ধে খেলিব। আৰ্জেণ্টিনাৰ প্ৰতিদ্বন্দ্বী হ’ব মৰক্কো।
১৬টা দলে অলিম্পিকৰ বাবে যোগ্যতা অৰ্জন কৰিছে। চাৰিটাকৈ দলৰ সৈতে চাৰিটা গোটত বিভক্ত। প্ৰতিটো গ্ৰুপৰ পৰা শীৰ্ষ দুটা দলে কোৱাৰ্টাৰ ফাইনেলত প্ৰৱেশ কৰিব। তাৰ পৰাই ছেমি ফাইনেল আৰু ফাইনেল অনুষ্ঠিত হ’ব। ব্ৰঞ্জৰ পদকৰ বাবে মেচ অনুষ্ঠিত হ’ব। আৰ্জেণ্টিনাৰ গ্ৰুপত আছে মৰক্কো, ইৰাক আৰু ইউক্ৰেইন। স্পেইনৰ গ্ৰুপত উজবেকিস্তান, ইজিপ্ত আৰু ডমিনিকান ৰিপাব্লিক অন্তৰ্ভুক্ত হৈছে। ফ্ৰান্সৰ গ্ৰুপত আছে আমেৰিকা, গিনি আৰু নিউজিলেণ্ড। আনটো গোটৰ ভিতৰত আছে জাপান, পাৰাগুৱে, মালি আৰু ইজৰাইল।
অৱশ্যে ইউৰো বা কোপা আমেৰিকাৰ দলৰ প্ৰায় কোনো খেলুৱৈয়েই অলিম্পিক দলত নাথাকে। আৰ্জেণ্টিনাৰ দলটোত আছে ২০২২ চনৰ কাটাৰ বিশ্বকাপ বিজয়ী দলৰ চাৰিজন খেলুৱৈ। তেওঁলোক হ’ল জুলিয়ান আলভাৰেছ, নিকোলাছ অটামেণ্ডি, জেৰ’নিমো ৰুলি আৰু থিয়াগো আলমাডা। অলিম্পিকত সোণৰ পদক লাভ কৰিলে তেওঁলোকে নজিৰ গঢ়ি তুলিব পাৰে। প্ৰথমবাৰৰ বাবে বিশ্বকাপ আৰু অলিম্পিকত স্বৰ্ণ পদক লাভ কৰিব। লগতে, একেৰাহে দুখন কোপা আমেৰিকা আৰু এটা বিশ্বকাপ আৰু তাৰ পিছত অলিম্পিকত সোণৰ পদক জয় কৰাটো আৰ্জেণ্টিনাৰ বাবে এক সোণালী অধ্যায় হ’ব পাৰে ৷
অলিম্পিক ফুটবল মূলতঃ ২৩ বছৰ অনুৰ্ধৰ ফুটবলাৰসকলে খেলে। তিনিজন জ্যেষ্ঠ ফুটবলাৰ একেলগে খেলিব পাৰিব। এই নিয়মৰ বাবেই আলভাৰেজ, অটামেণ্ডি আৰু ৰুলেই অলিম্পিক খেলাৰ যোগ্যতা অৰ্জন কৰিছে। আৰ্জেণ্টিনাক সোণৰ দাবীদাৰ হিচাপে গণ্য কৰা হৈছে । স্পেইন আৰু ফ্ৰান্সৰ মাজতো তীব্ৰ প্ৰতিদ্বন্দিতা হ’ব ৷
