ভাৰতীয় ক্ৰিকেট দলত সুযোগ পোৱাটো এতিয়া অধিক কঠিন হৈ পৰিব । তাৰ বাবে ভাৰতীয় ক্ৰিকেটাৰসকলে বিভিন্ন টেষ্টৰ লগতে ডেক্সা টেষ্টতো উত্তীৰ্ণ হ’ব লাগিব। ইয়াৰ পিছতহে জাতীয় দলত সুযোগ দিয়া হ’ব । ক্ৰিকেটাৰৰ আঘাতৰ সম্ভাৱনা হ্ৰাস কৰাৰ বাবেই এই সিদ্ধান্ত গ্ৰহণ কৰিছে বিচিচিআইয়ে।
ডেক্সা পৰীক্ষা কি?
ই এক বিশেষ পদ্ধতি যাৰ দ্বাৰা মানুহৰ শৰীৰত হাড়ৰ ঘনত্ব জুখিব পাৰি।এই পৰীক্ষাৰ জৰিয়তে ক্ৰিকেটাৰৰ স্কেন কৰা হয়, য’ত ‘ডুৱেল এনাৰ্জি এক্স-ৰে’ শৰীৰত প্ৰৱেশ কৰে। ইয়াৰ জৰিয়তে হাড়ৰ ঘনত্ব জুখিব পাৰি। অৰ্থাৎ ক্ৰিকেটাৰৰ হাড়ৰ ঘনত্ব এই পৰীক্ষাৰ পৰাই গম পোৱা যাব। হাড়ৰ ঘনত্ব কম হোৱা ক্ৰিকেটাৰ আঘাত পোৱাৰ সম্ভাৱনা বেছি। তেনে ক্ষেত্ৰত ভাৰতীয় দলটোৱে সুযোগ পোৱাৰ আগতে হাড়ৰ ঘনত্ব বৃদ্ধি কৰিব লাগিব। ডেক্সা এতিয়া বিশ্বৰ বিভিন্ন খেলত পৰীক্ষা কৰা হৈছে। বিদেশী ফুটবলত এই পৰীক্ষা দীৰ্ঘদিন ধৰি চলি আহিছে। ইয়াৰ উপৰিও এথলীট সকলেও এই পৰীক্ষা কৰিয়েই থাকে ৷ শৰীৰটো সুস্থ কৰি ৰাখি প্ৰতিপক্ষক পৰাস্ত কৰিবলৈ নিজৰ শৰীৰৰ সুস্থতাৰ বিষয়ে জনাটো অতি প্ৰয়োজনীয়। এই পৰীক্ষা ক্ৰীড়াবিদসকলৰ বাবে অত্যন্ত গুৰুত্বপূৰ্ণ।
ক’ত, কেনেকৈ কৰা হ’ব এই পৰীক্ষা?
এয়া ১০ মিনিটৰ পৰীক্ষা। এই পৰীক্ষাৰ বাবে অত্যাধুনিক সঁজুলিৰ প্ৰয়োজন। ইতিমধ্যে বিচিচিআইয়ে সেই বিশেষ যন্ত্ৰ অনাৰ পৰিকল্পনা কৰিছে। বাংগালুৰুৰ নেশ্যনেল ক্ৰিকেট একাডেমীত অনুষ্ঠিত হ’ব এই পৰীক্ষা। প্ৰতিটো ছিৰিজৰ পূৰ্বে পৰীক্ষা অনুষ্ঠিত কৰা হ’ব। এই পৰীক্ষাৰ সময়ত ক্ৰিকেটাৰসকলৰ বিষ বা আন কোনো শাৰীৰিক সমস্যা নহ’ব বুলি জনোৱা হৈছে।
এই পৰীক্ষাত আৰু কি জানিব পাৰি?
হাড়ৰ ঘনত্বৰ উপৰিও শৰীৰৰ চৰ্বি আৰু পেশীৰ শক্তিও এই পৰীক্ষাৰ জৰিয়তে জুখিব পাৰি। শৰীৰৰ চৰ্বিৰ বিষয়ে জনাটো ক্ৰিকেটাৰৰ বাবে অতি প্ৰয়োজনীয়। ক্ৰিকেটাৰৰ শৰীৰৰ চৰ্বি আনৰ তুলনাত ১০ শতাংশতকৈ কম হ’ব লাগে। একেদৰে ফুটবলাৰৰ শৰীৰত সাধাৰণতে ৫ৰ পৰা ৮ শতাংশ চৰ্বি থাকিব লাগে। শৰীৰৰ চৰ্বি যিমান কম, পেশী সিমানেই বেছি থাকে। ফলত শাৰীৰিক শক্তি বৃদ্ধি পায়। এই পৰীক্ষাৰ জৰিয়তে এইবাৰ ক্ৰিকেটাৰসকলেও নিজৰ শৰীৰৰ এই দিশটোৰ প্ৰতি সচেতন হ’ব পাৰিব ।
দেওবাৰে ব’ৰ্ডৰ বৈঠকত বিচিচিআইৰ সভাপতি ৰজাৰ বিনি, সম্পাদক জয় শ্বাহ, প্ৰাক্তন বাছনি সমিতিৰ মুৰব্বী চেতন শৰ্মা, ভাৰতীয় দলৰ অধিনায়ক ৰোহিত শৰ্মা আৰু প্ৰশিক্ষক ৰাহুল দ্ৰাবিড় উপস্থিত থাকে। তাতেই এই নতুন ফিটনেছ টেষ্টৰ সিদ্ধান্ত লোৱা হৈছিল। ভাৰতীয় দলৰ কেইবাজনো ক্ৰিকেটাৰ অহৰহ আঘাতপ্ৰাপ্ত হৈ আছে। ইয়াৰ ভিতৰত উল্লেখযোগ্য নাম হ’ল যশপ্ৰীত বুমৰাহ, দীপক চহৰ, ৰবীন্দ্ৰ জাদেজা আৰু ৱাশ্বিংটন সুন্দৰ। এই ক্ৰিকেটাৰসকলৰ অনুপস্থিতিৰ বাবেই ভাৰত বিপদত পৰিছে। এই আঘাতক লৈ অধিনায়ক ৰোহিতে ৰাজহুৱাভাৱে অসন্তুষ্টি প্ৰকাশ কৰে। ইয়াৰ পিছতে ভাৰতীয় ক্ৰিকেট ব’ৰ্ডে এই সিদ্ধান্ত গ্ৰহণ কৰে।
এই পৰিপ্ৰেক্ষিতত ভাৰতীয় দলৰ প্ৰাক্তন ফিটনেছ প্ৰশিক্ষক ৰামজী শ্ৰীনিবাসনে কয় , “মই ২০১১ চনত এই পৰীক্ষাৰ কথা কৈছিলো। কিন্তু তাৰ পিছত আৰম্ভ কৰিব পৰা নগ’ল। এই পৰীক্ষাৰ পৰা শৰীৰৰ বহু সবিশেষ জানিব পৰা যায় যিটো ক্ৰিকেটাৰসকলৰ মূল্যায়নৰ বাবে উপযোগী। ক্ৰিকেটাৰসকলেও নিজৰ শৰীৰৰ প্ৰতি সচেতন হ’ব পাৰে।“
ইয়াৰ বাহিৰেও ব’ৰ্ডৰ বৈঠকত ইযো-ইয়ো টেষ্ট সন্দৰ্ভত এটা ডাঙৰ সিদ্ধান্ত লোৱা হৈছিল। ইয়ো ইয়ো পৰীক্ষাৰ মাপকাঠী ১৬.১ৰ পৰা ১৬.৫লৈ বৃদ্ধি পাইছে। মন কৰিবলগীয়া যে আগতে ভাৰতীয় দলত যোগদান কৰিবলৈ ইয়ো ইয়ো পৰীক্ষা বাধ্যতামূলক আছিল। বিৰাট কোহলী, জাদেজাৰ দৰে একাংশ ক্ৰিকেটাৰে আগতে ভাল ফলাফল লাভ কৰিছিল। বহুতেই এই পৰীক্ষাত ব্যৰ্থ হোৱাৰ বাবে ৰাষ্ট্ৰীয় দলত প্ৰৱেশ কৰিব নোৱাৰিলে। যোৱা কেইবছৰমানৰ পৰা এই টেষ্ট বন্ধ হৈ আছিল। কিন্তু শেহতীয়াকৈ দেখা পোৱা আঘাতৰ বাবে বিশেষজ্ঞসকলে এই পৰীক্ষা পুনৰ কৰা হ’ব বুলি জানিবলৈ দিছে ৷
