চৰকাৰী চিকিৎসালয়ৰ আন্তঃগাথঁনি-গুণমান মূল্যায়নৰ বাবে ৩দিনীয়া স্বাস্থ্যসেৱা উৎসৱ

বোকাখাত, ৬ এপ্ৰিল : চৰকাৰী চিকিৎসালয়সমূহৰ আন্তঃগাথঁনিৰ লগতে উপলব্ধ সেৱাৰ মান মূল্যায়নৰ উদ্দেশ্যে আজিৰে পৰা অসমত আৰম্ভ হৈছে তিনিদিনীয়া অসম স্বাস্থ্যসেৱা উৎসৱ-২০২৩। ৰাজ্যৰ স্বাস্থ্য আৰু পৰিয়াল কল্যাণ মন্ত্ৰী কেশৱ মহন্তই কৃষিমন্ত্ৰী অতুল বৰাৰ উপস্থিতিত আজি বোকাখাট মহকুমাৰ অন্তৰ্গত কহৰাস্থিত শ্বহীদ বেজা বৈষ্ণৱ আদৰ্শ চিকিৎসালয়ৰ পৰা স্বাস্থ্য সেৱা উৎসৱৰ ৰাজ্যিক কাৰ্যসূচী আনুষ্ঠানিক ভাৱে উদ্বোধন কৰে। জিলা পৰ্যায়ৰ চিকিৎসালয়, মহকুমা অসামৰিক চিকিৎসালয়, সামূহিক স্বাস্থ্যকেন্দ্ৰ আৰু প্ৰাথমিক স্বাস্থ্যকেন্দ্ৰ পৰ্যায়লৈ ৰাজ্যৰ মুঠ ১২৫২খন চৰকাৰী চিকিৎসালয়ক সামৰি আজিৰে পৰা ৮ এপ্ৰিল ২০২৩লৈ তিনিদিনীয়াকৈ এই স্বাস্থ্য সেৱা উৎসৱৰ আয়োজন কৰিছে ৰাজ্য চৰকাৰৰ স্বাস্থ্য আৰু পৰিয়াল কল্যাণ বিভাগে। স্বাস্থ্যসেৱা উৎসৱৰ জৰিয়তে মূল্যায়ন হ’ব লগা এই চৰকাৰী চিকিৎসানুষ্ঠানসমূহৰ ভিতৰত আছে ২১খন জিলা চিকিৎসালয়, ১৬ খন মহকুমা অসামৰিক চিকিৎসালয়, ২০৫খন সামূহিক চিকিৎসা কেন্দ্ৰ তথা এফ আৰইউ আৰু ১০১০ খন প্ৰাথমিক চিকিৎসা কেন্দ্ৰ। গুণোৎসৱৰ আৰ্হিত হোৱা এই স্বাস্থ্যসেৱা মহোৎসৱৰ আজি প্ৰথম দিনা চিকিৎসালয়সমূহৰ মূৰব্বীসকলে নিজ নিজ চিকিৎসানুষ্ঠানত আন্তঃমূল্যায়ক হিচাপে আন্তঃগাথঁনি, উপলব্ধ মানৱসম্পদ আৰু সা-সুবিধাৰ প্ৰয়োজনীয়তাৰ সবিশেষ খতিয়ান কৰি তথ্য যুগুত কৰিব। গুণোৎসৱৰ আৰ্হিত স্বাস্থ্য উৎসৱৰ পৰৱৰ্তী দুটা দিনত বহিঃমূল্যায়কে এই চিকিৎসালয়সমূহ পৰিদৰ্শন কৰি আন্তঃগাঠনিৰ লগতে চিকিৎসা সেৱাৰ গুণমান, অভাৱ-প্ৰয়োজনীয়তা আদি দিশসমূহৰ বাস্তৱ মূল্যায়ন কৰি ৰাজ্য চৰকাৰৰ ওচৰত প্ৰতিবেদন ৰূপে দাখিল কৰিব। উল্লেখ্য যে ৰাজ্যৰ মুখ্যমন্ত্ৰীৰ পৰা আৰম্ভ কৰি মন্ত্ৰীসভাৰ সকলো সদস্য, ৰাজ্যৰ কেওগৰাকী সাংসদ আৰু বিধায়ক, ৰাজ্যৰ মুখ্য সচিব সমন্বিতে অসম চৰকাৰৰ শীৰ্ষ বিষয়াবৰ্গ, স্বায়ত্ত পৰিষদৰসমূহৰ মুখ্য কাৰ্যবাহী সদস্য-কাৰ্যবাহী সদস্যসকল, জিলাৰ উপায়ুক্তসকলৰ লগতে কেউখন চিকিৎসা মহাবিদ্যালয়ৰ অধ্যাপকসকলে স্বাস্থ্য উৎসৱত অংশগ্ৰহণ কৰি আগন্তুক দুটা দিনত জিলাসমূহত কমেও এখনকৈ চৰকাৰী চিকিৎসালয় পৰিদৰ্শন কৰি আন্তঃগাঁথনি, চিকিৎসক-স্বাস্থ্যকৰ্মীৰ উপলব্ধতা আৰু সেৱাৰ গুণগত মানৰ বিষয়ে বহিঃমূল্যায়ক হিচাপে মূল্যায়ন কৰিব।
ইফালে, কহৰাৰ শ্বহীদ বেজা বৈষ্ণৱ আদৰ্শ চিকিৎসালয়ত বৃহস্পতিবাৰে এই স্বাস্থ্য উৎসৱ উদ্বোধন কৰি বিভাগীয় মন্ত্ৰী মহন্তই চিকিৎসালয়খন পৰিদৰ্শন কৰি আন্তঃগাথঁনি, চিকিৎসক-স্বাস্থ্যকৰ্মীৰ উপলব্ধতা আৰু সেৱাৰ গুণগত মানৰ আভাষ লয়। মন্ত্ৰীগৰাকীয়ে আদৰ্শ চিকিৎসালয়খনত চিকিৎসক-স্বাস্থ্যকৰ্মীৰে আলোচনাত মিলিত হৈ চিকিৎসালয়ত উপলব্ধ সা-সুবিধা, আন্তঃগাথঁনিগত সামৰ্থ আদিৰ বিষয়ে বুজ লয়। তদুপৰি, আশাকৰ্মী আৰু চিকিৎসাধীন ৰোগীৰ সৈতেও মত বিনিময় কৰি চিকিৎসাসেৱাক লৈ তেখেতসকলৰ অভিজ্ঞতাৰ বিষয়েও অৱগত হয় স্বাস্থ্যমন্ত্ৰীয়ে। স্বাস্থ্য উৎসৱৰ অংশ হিচাপে মন্ত্ৰীগৰাকীয়ে আদৰ্শ চিকিৎসালয়খনত আজি এই পৰিদৰ্শন তথা নিৰীক্ষণ কৰাৰ সময়ত গোলাঘাট জিলাৰ ভাৰপ্ৰাপ্ত যুটীয়া স্বাস্থ্যসেৱা সঞ্চালক ডাঃ ৰঞ্জিত ভূঞা, বোকাখাটৰ মহকুমা চিকিৎসা আৰু স্বাস্থ্য বিষয়া ডাঃ অজয় কাকতি, আদৰ্শ চিকিৎসালয়ৰ উপ-অধীক্ষক ডাঃ জয়ন্ত কাকতি, এনএইচএমৰ জিলা কাৰ্যসূচী প্ৰৱন্ধক অনুস্কা বৰাই সহযোগিতা আগবঢ়ায়।