অসম ৰাজ্যিক শিশু অধিকাৰ সুৰক্ষা আয়োগৰ উদ্যোগত আজি শিশুৰ অধিকাৰ সন্দর্ভত এখন কর্মশালা অনুষ্ঠিত হয় ৷ গুৱাহাটীৰ নেডফি হাউচৰ প্ৰেক্ষাগৃহত অনুষ্ঠিত কর্মশালাখনত শিশু অধিকাৰৰ সৈতে জড়িত কেইবাটাও আগশাৰীৰ সংস্থাৰ লগতে চৰকাৰী বিভাগসমূহৰ প্ৰতিনিধিয়ে অংশগ্ৰহণ কৰে ৷ অনুষ্ঠানৰ আৰম্ভনিতে ভাষণ প্ৰদান কৰি অসম চৰকাৰৰ শিক্ষা উপদেষ্টা তথা গুৱাহাটী বিশ্ববিদ্যালয়ৰ অধ্যাপক ডঃ ননী গোপাল মহন্তই শিশুৰ অধিকাৰ সুৰক্ষিত কৰাৰ বাবে এই ক্ষেত্ৰখনত কাম কৰি থকা চৰকাৰী-বেচৰকাৰী সংস্থাসমূহৰ মাজত থাকিবলগীয়া সমন্বয়তাৰ কথা উল্লেখ কৰে ৷ কর্মশালাখনৰ উদ্বোধনী ভাষণ প্ৰদান কৰে আয়োগৰ অধ্যক্ষা সুনীতা চাংকাকতিয়ে ৷ ইফালে ৰাজ্যিক শিশু সুৰক্ষা ছছাইটিৰ আয়ুক্ত সচিব পার্থ প্ৰতিম মজুমদাৰ সন্মানীয় অতিথি আৰু এনচিপিচিআৰৰ সদস্য সচিব ৰূপালী বেনার্জী সিং বিশিষ্ট অতিথি হিচাপে উপস্থিত থাকে ৷ উদ্বোধনী অনুষ্ঠানৰ পাছতে অসম ৰাজ্যিক শিশু অধিকাৰ সুৰক্ষা আয়োগৰ কাম কাজ সম্পর্কে আয়োগৰ সদস্য ডঃ পিলু হাজৰিকাই ভাষণ প্ৰদান কৰে ৷ ইয়াৰ পাছতে এনচিপিচিআৰৰ জ্যেষ্ঠ কাৰিকৰী কনছালটেণ্ট ছাইষ্টা খান শ্বাহে শিশু অধিকাৰ সুৰক্ষাৰ বাবে দায়িত্ববাহীসকলৰ মাজত সমন্বয়তাৰ প্ৰয়োজন সন্দর্ভে বাখ্যা কৰে ৷মুকলি আলোচনাত আয়োগৰ অধ্যক্ষা ডঃ সুনীতা চাংকাকতি, এনচিপিআৰৰ সদস্য সচিব ৰূপালী বেনার্জী সিং,আয়োগৰ সদস্য ৰূপা হাজৰিকা,অজয় কুমাৰ দত্তই অংশগ্ৰহণ কৰে ৷
উল্লেখ্য যে বিশ্বৰ মুঠ শিশুৰ ১৯ শতাংশই ভাৰতৰ ৷ যাৰ বাবে বিশ্বৰ ভিতৰতে সর্বাধিক শিশু থকা দেশখনেই হৈছে ভাৰত ৷ সেয়েহে শিশুৰ অধিকাৰ সুৰক্ষিত কৰি ৰাখিবলৈ চৰকাৰে কেতবোৰ ব্যৱস্থা গ্ৰহণ কৰি আহিছে ৷ ২০১১ বর্ষৰ লোকপিয়ল অনুসৰি ৮৪ নিযুত শিশু ভাৰতত শিক্ষা লাভৰ পৰা বঞ্চিত হৈ আহিছে ৷তদুপৰি ৪২.৭ নিযুত শিশু বিদ্যালয়ৰ বাহিৰত আছে ৷ ইউডাইছ প্লাছ ২০২০-২০২১ বর্ষৰ সমীক্ষা অনুসৰি দেশৰ ভিতৰতে আধাতে বিদ্যালয় এৰা শিশুৰ সংখ্যা সবাতোকৈ অধিক হৈছে অসমত ৷ মাধ্যমিক পর্যায়ত ২১ শতাংশ শিশুৱে আধাতে শিক্ষা সামৰি ৰাজ্যত বিদ্যালয় এৰিছে ৷ এনচিআৰবিৰ তথ্য অনুসৰি শিশু শ্ৰমিকৰ ক্ষেত্ৰত অসমৰ স্থান হৈছে ১৩ ৷ এনে বিভিন্ন কাৰণতে শিশুৰ অধিকাৰসমূহ সুৰক্ষিত কৰি ৰাখিবলৈ বিভিন্ন সংস্থাসমূহৰ সৈতে আজিৰ বৈঠক অনুষ্ঠিত কৰা হয় ৷
