গুৱাহাটী : নতুন দিল্লীত অনুষ্ঠিত হোৱা গণৰাজ্য দিৱস শিবিৰ ২০২৩ৰ সময়ত অসমৰ এন চি চি কেডেট শ্ৰীমতী সায়ন্তানী ঘোষক ডিজি প্ৰশংসা কাৰ্ড প্ৰদান কৰা হয়। দিল্লীৰ জিঅ’এইচ (গাৰ্ড অৱ অনাৰ) খেলপথাৰত এনচিচিৰ সঞ্চালক প্ৰধান লেফটেনেণ্ট জেনেৰেল গুৰবীৰপাল সিঙে ডিজি প্ৰশংসা কাৰ্ড প্ৰদান কৰে ৷ সায়ন্তনী ঘোষ ৬০ অসম ছোৱালী বেটেলিয়ন এন চি চিৰ কেডেট । এনচিচিৰ সম্পূৰ্ণ সময়ৰ বিষয়া, সহযোগী বিষয়া (এন অ’), বিষয়া প্ৰশিক্ষকৰ অধীনত, চাৰ্জেণ্ট, মেজৰ প্ৰশিক্ষক আৰু কেডেটসকলক দুঃসাহসিক ক্ৰীড়া, প্ৰশিক্ষণ, বা সামাজিক বা সাংস্কৃতিক ক্ষেত্ৰত অসাধাৰণ অৱদানৰ বাবে এই কাৰ্ড প্ৰদান কৰা হয় ৷ এই সন্মানীয় কাৰ্ড লাভ কৰা অসমৰ গুৱাহাটীৰ বাসিন্দা সায়ন্তনী ঘোষ অসম ডাউন টাউন বিশ্ববিদ্যালয়ৰ ছাত্ৰী। এগৰাকী মেধাৱী ছাত্ৰী হিচাপে সুখ্যাতি অৰ্জন কৰা সায়ন্তনীয়ে ৰাষ্ট্ৰীয় পৰ্যায়ৰ বিভিন্ন সাংস্কৃতিক কাৰ্যসূচীত সক্ৰিয় অংশগ্ৰহণ কৰি আহিছে।
এন চি চি গণৰাজ্য দিৱস শিবিৰ (আৰ ডি চি)-২০২৩ত অংশগ্ৰহণৰ বাবে তেওঁ কেৱল শিবিৰত প্ৰৱেশ কৰিবলৈ সক্ষম হোৱাই নহয়, ১৭টা সঞ্চালকালয়ৰ সকলো কেডেটৰ ভিতৰত তেওঁ আছিল একমাত্ৰ কেডেট যিসকলক প্ৰদৰ্শনৰ বাবে নিৰ্বাচিত কৰা হৈছিল ৷ আৰ ডি চিৰ তিনিওটা মূল ইভেণ্টতে (পি এম ৰেলী, পি এম হাউছ ইভেণ্ট, প্ৰেচিডেণ্ট হাউছ ইভেণ্ট) তেওঁ অংশগ্ৰহন কৰিছিল। ২০২৩ চনৰ গণৰাজ্য দিৱস শিবিৰ ভ্ৰমণৰ সময়ত ভাৰতৰ উপ-ৰাষ্ট্ৰপতি, দিল্লীৰ মুখ্যমন্ত্ৰী, অসমৰ মুখ্যমন্ত্ৰী, নৌসেনাৰ মুৰব্বী আৰু সেনাবাহিনীৰ মুৰব্বীৰ সন্মুখত অনুষ্ঠান পৰিৱেশন কৰাৰ বাবেও নিৰ্বাচিত হৈছিল ৷
গণৰাজ্য দিৱস শিবিৰ এনচিচিৰ আটাইতকৈ সন্মানীয় বাৰ্ষিক অনুষ্ঠান আৰু ইয়াত অংশগ্ৰহণকাৰী যুৱক-যুৱতীসকলয়ে গণৰাজ্য দিৱসৰ পেৰেড আৰু প্ৰধানমন্ত্ৰীৰ এনচিচি ৰেলীকে ধৰি কেইবাটাও জীৱনজোৰা অভিজ্ঞতাৰ মুখামুখি হয় ৷ সাধাৰণতে গোট আৰু সঞ্চালকালয় পৰ্যায়ত কেইবাবাৰো কঠোৰ পৰীক্ষাৰ অন্ততহে আৰ ডি চি কেডেটসকলক এই স্থানলৈ নিৰ্বাচন কৰা হয়।
