পদ্মা নদীৰ ওপৰত নির্মাণ কৰা দলঙৰ সফলতাক লৈ উৎফুল্লিত হৈ পৰিছে বাংলাদেশ চৰকাৰ। বহুতে দাবী কৰে যে পৰিবহণ, পৰ্যটনৰ পৰা আৰম্ভ কৰি ব্যৱসায়লৈকে বাংলাদেশৰ অৰ্থনীতি এই দলঙখনৰ বাবেই উন্নত হৈছে । বাংলাদেশে অৰ্থনীতি অধিক শক্তিশালী কৰিবলৈ পৰিকল্পনা গ্ৰহণ কৰিছে ৷ মেঘনা নদীৰ ওপৰত নতুন দলং নিৰ্মাণৰ পৰিকল্পনা আৰম্ভ কৰিছে হাছিনা চৰকাৰে। ইতিমধ্যে মেঘনা নদীৰ ওপৰত দুখনকৈ দলং নিৰ্মাণ কৰা হৈছে। এইবাৰ বাংলাদেশে সেই নদীৰ ওপৰত আন এখন দলং নিৰ্মাণৰ সিদ্ধান্ত লৈছে। ফলত ঢাকাৰ চুবুৰীয়া জিলাসমূহৰ সৈতে যোগাযোগ সহজ হ’ব।
বাংলাদেশৰ সংবাদ মাধ্যমৰ বাতৰি অনুসৰি নাৰায়ণগঞ্জৰ আৰাই হাজাৰ আৰু ব্ৰহ্মনবৰীয়াৰ বাঞ্চাৰমপুৰ উপজিলাৰ মাজত পোনপটীয়া পথ সংযোগ স্থাপন কৰা হ’ব ৷ যিয়ে ঢাকা-চট্টগ্ৰাম আৰু ঢাকা-চিলেট পথৰ বিকল্প পথ হিচাপে কাম কৰিব। দক্ষিণ কোৰিয়াৰ জৰিয়তে পিপিপি-জিটিইউৰ ভিত্তিত নিৰ্মাণ হ’ব এই দলংখন। বাংলাদেশ দলং প্ৰাধিকৰণে এই প্ৰকল্পৰ কাম কৰিব ৷ ইয়াৰ উপৰিও গড়কাপ্তানী আৰু ৰাজহুৱা পথ বিভাগে দুয়োফালে পথ নিৰ্মাণ কৰিব।
চৰকাৰী সূত্ৰ অনুসৰি মেঘনাৰ ওপৰত ভূলতা-আৰাই হাজাৰ-বাঞ্চাৰমপুৰ পথত ফেৰী ঘাটৰ বিপৰীতে এই তৃতীয়খন দলং নিৰ্মাণ হ’ব । জানিব পৰা মতে এই দলংখনৰ দৈৰ্ঘ্য হ’ব ৩.১৩ কিলোমিটাৰ। যান-বাহন চলাচলৰ সুবিধাৰ বাবে দলঙৰ দুয়োকাষে ৪.৪ কিলোমিটাৰ পথ নিৰ্মাণ কৰা হ’ব। মেঘনা নদীত জাহাজৰ চলাচলত যাতে কোনো অসুবিধা নহয় তাৰ প্ৰতি বিশেষ গুৰুত্ব দিয়া হৈছে।
২০২০ চনৰ পৰা বাংলাদেশ চৰকাৰে এই দলং নিৰ্মাণৰ কথা চিন্তা কৰিবলৈ আৰম্ভ কৰিছিল। এই দলং নিৰ্মাণ সম্ভৱ নে নহয় সেই সন্দৰ্ভত আলোচনা, ২০২০ চনৰ মাৰ্চ মাহৰ পৰা আৰম্ভ হৈছিল। পিছলৈ আগষ্টৰ ভিতৰত কেবিনেটে এই প্ৰকল্প ৰূপায়ণৰ বাবে অনুমোদন জনায়। বাংলাদেশৰ সংবাদ মাধ্যম “আমাৰ সময়”ৰ প্ৰতিবেদন অনুসৰি এই দলং নিৰ্মাণৰ কামত কোৰিয়াৰ নিৰ্মাণ কোম্পানী “ডায়েউ ইঞ্জিনিয়াৰিং এণ্ড কনষ্ট্ৰাকচন লিমিটেড”, “হুণ্ডাই ইঞ্জিনিয়াৰিং” আৰু “কোৰিয়ান এক্সপ্ৰেছৱে কৰ্প’ৰেচন” জড়িত হ’ব। বাংলাদেশ চৰকাৰে অহা বছৰৰ মে’ মাহত এই দলং নিৰ্মাণৰ বাবে বিনিয়োগ কোম্পানীটোৰ সৈতে চুক্তিবদ্ধ হোৱাৰ পৰিকল্পনা কৰিছে।
মেঘনাৰ ওপৰত নতুন দলং নিৰ্মাণৰ সন্দৰ্ভত সাংসদ তথা প্ৰাক্তন ৰাজ্যিক মন্ত্ৰী কেপ্তেইন এ বি এম তাজুল ইছলামে কয় , “যদি মেঘনাৰ ওপৰত তৃতীয়খন দলং নিৰ্মাণ কৰা হয় তেন্তে ইয়াক ঢাকা-চিট্টাগং আৰু ঢাকা-চিলেট ঘাইপথৰ বিকল্প হিচাপে ব্যাপকভাৱে ব্যৱহাৰ কৰা হ’ব। ঢাকা-চিলেটৰ মাজত ২২ কিলোমিটাৰ আৰু ঢাকা-চিটাগঙৰ মাজত ২৭ কিলোমিটাৰ দূৰত্ব হ্ৰাস কৰা হ’ব। অঞ্চলটোত কাৰখানাৰ সংখ্যাও বৃদ্ধি পাব। দলংখনত যাতায়ত বৃদ্ধিৰ বাবে সুকীয়া পথ প্ৰকল্পৰ কাম চলি আছে। এই দলংখন মেঘনাৰ ওপৰেৰে নিৰ্মাণ কৰা হয় তেন্তে ঢাকাৰ সৈতে বাঞ্চাৰমপুৰ-নবিনগৰ-আখৌৰাৰ যোগাযোগ সহজ হ’ব। ঢাকাৰ পৰা ৰৈহাজাৰ-বঞ্চৰামপুৰৰ পৰা ব্ৰহ্মনবৰীয়া আৰু ভাৰতৰ আগৰতলালৈকে যোগাযোগ ব্যৱস্থাও বহুখিনি উন্নত হ’ব। যাত্ৰী আৰু সামগ্ৰীৰ পৰিবহণো সহজ হ’ব।“
ইয়াৰ উপৰিও দলংখনকে কেন্দ্ৰ কৰি কৰিকান্দি অঞ্চলত স্থলবন্দৰ নিৰ্মাণৰ প্ৰস্তাৱ প্ৰধানমন্ত্ৰী হাছিনালৈও প্ৰেৰণ কৰা হৈছে। বৰ্তমান সময়ত আশুগঞ্জ হৈ ঢাকাৰ পৰা স্থল বন্দৰলৈ বিভিন্ন সামগ্ৰী যাবলৈ যি সময় লাগে, বাঞ্চাৰমপুৰৰ স্থল বন্দৰ মেঘনা নদীৰ পাৰত থাকিলে চাৰি ঘণ্টা কম সময় লাগিব।
বাংলাদেশ চৰকাৰে আশা কৰিছে যে এই দলং নিৰ্মাণে দেশৰ অৰ্থনীতিত ইতিবাচক প্ৰভাৱ পেলাব। ইয়াৰ উপৰিও হাছিনা চৰকাৰে সমগ্ৰ দেশৰ অৰ্থনীতি আৰু যোগাযোগ ব্যৱস্থাৰ পৰিৱৰ্তনৰ ক্ষেত্ৰতো এক বিপ্লৱ হ’ব বুলি ভাবে।
সম্প্ৰতি বিষ্ণন্দি-কৰৈকান্দি ফেৰী পথে ব্ৰাক্ষনবৰীয়াৰ বাঞ্চাৰামপুৰ আৰু নবিনগৰক ঢাকা আৰু অন্যান্য জিলাৰ সৈতে সংযোগ কৰিছে। বাৰিষাৰ সময়ত ভ্ৰমণ যথেষ্ট বিপদজনক হৈ পৰে। ইয়াৰ বাহিৰেও এই যাত্ৰাতো বহু সময় লাগে। আৰু সেইটোৱেই হৈছে দলংখন নিৰ্মাণৰ অন্যতম কাৰণ বুলি ছৌজৰ সূত্ৰই প্ৰকাশ কৰিছে।
প্ৰসংগক্ৰমে চলিত বৰ্ষৰ ২৫ জুনত বাংলাদেশৰ পদ্মা দলং উদ্বোধন কৰা হয়। বাংলাদেশৰ প্ৰধানমন্ত্ৰী শ্বেখ হাছিনাই বাংলাদেশৰ ‘সপোন-সেতু’ উদ্বোধন কৰে। পদ্ম দলঙৰ দৈৰ্ঘ্য ৯ কিলোমিটাৰতকৈও অধিক। কিন্তু পানীৰ ওপৰৰ অংশৰ দৈর্ঘ্য ৬ কিঃমিঃ। বাংলাদেশৰ এই সংবাদ মাধ্যমৰ মতে পদ্ম দলং নিৰ্মাণৰ বাবে প্ৰায় ৩০ হাজাৰ ১৯৩ কোটি টকা ব্যয় কৰা হৈছে। প্ৰায় দুটা দশকৰ পৰিকল্পনাৰ অন্তত পদ্ম দলং নিৰ্মাণ কৰা হৈছে। ২০০৭ চনত পদ্ম দলঙৰ প্ৰথম বাজেট গৃহীত হয়।
হাছিনাই লগতে দাবী কৰে যে পদ্ম দলং নিৰ্মাণৰ ফলস্বৰূপে দেশত বাণিজ্য আৰু বাণিজ্যৰ উন্নয়নৰ উপৰিও কৃষি আৰু কুটিৰ উদ্যোগকে ধৰি বহু ক্ষেত্ৰত নতুন কৰ্মসংস্থাপনৰ সুযোগ সৃষ্টি হৈছে। নতুন মেঘনা দলং নিৰ্মাণ হ’লে বাংলাদেশ চৰকাৰেও একেধৰণৰ সুবিধা লাভ কৰিব বুলি সেই দেশৰ একাংশ অৰ্থনীতিবিদে ভাবে।
