কামৰূপ মহানগৰ জিলা পথ-সুৰক্ষা সমিতিৰ গুৰুত্বপূৰ্ণ সভা

গুৱাহাটী, ১জুনঃ কামৰূপ মহানগৰ জিলা পথ-সুৰক্ষা সমিতিৰ এখন গুৰুত্বপূৰ্ণ সভা আজি পৰিবহণ বিভাগৰ দায়িত্বত থকা অতিৰিক্ত উপায়ুক্ত ড。 ধ্ৰুৱজ্যোতি হাজৰিকাৰ সভাপতিত্বত অনুষ্ঠিত হয়৷ সভাৰ আৰম্ভণিতে মহানগৰীৰ জালুকবাৰীত অলপতে সংঘটিত ভয়ংকৰ পথ দুৰ্ঘটনাত সাতজনকৈ অভিযান্ত্ৰিক ছাত্ৰই অকাল মৃত্যুক সাবটি ল’বলগীয়া হোৱা ঘটনাত গভীৰ শোক প্ৰকাশ কৰি শোকসন্তপ্ত পৰিয়াললৈ গভীৰ সমবেদনা জ্ঞাপন কৰা হয়। অনাগত দিনত যাতে এনে আৰু কোনো ঘটনা সংঘটিত নহয় তাৰ বাবে মহানগৰখনৰ পথ সুৰক্ষা ব্যৱস্থাটোক জিলা পথ-সুৰক্ষা সমিতিৰ লগত জড়িত বিভাগসমূহৰ যৌথ প্ৰচেষ্টাত অধিক কটকটীয়া কৰি তোলাত গুৰুত্ব দিয়া হয়৷ সভাখনত গুৱাহাটীত সততে দেখিবলৈ পোৱা বাইক ষ্টান্ট, ৰঙা লাইট অমান্যৰ ঘটনা, মদ্যপান কৰি গাড়ী চালনা, আৱৰণ মুক্ত যানবাহনৰ চলাচল, অনিয়ন্ত্ৰিত গতিবেগত গাড়ী চালনা, বিভিন্ন বাহনৰ অস্বাভাৱিক আৰু বিকট শব্দ, গাড়ীত কলা গ্লাছ ব্যৱহাৰ, মহানগৰীৰ দুৰ্ঘটনাপ্ৰৱন স্থান চিনাক্ত কৰি উলিওৱা আদি কেইবাটাও গুৰুত্বপূৰ্ণ বিষয়ত আলোচনা কৰা হয়৷ সহকাৰী পৰিবহণ আয়ুক্ত তথা অতিৰিক্ত দায়িত্ববাহী কামৰূপ মহানগৰ জিলা পৰিবহণ বিষয়া (পঞ্জীয়ন আৰু অনুজ্ঞাপত্ৰ) গৌতম দাসকে ধৰি ডিচিপি ট্ৰেফিক হিৰণ্য কুমাৰ বৰ্মন, জিলা পথ-সুৰক্ষা সমিতিৰ সদস্য-সচিব হেমন্ত দেউৰী ভড়ালী, জিএমচিৰ যুটীয়া আয়ুক্ত প্ৰণৱ দত্ত গোস্বামী, লোক নিৰ্মাণ বিভাগৰ বিষয়া কল্যাণ কুমাৰ দাস, শিখা দেৱী শৰ্মা, নৱ কুমাৰ শৰ্মা, এনএইচএআইৰ আয়ুস ৰাণা, পৰিবহণ বিষয়া (প্ৰৱৰ্তক) হিমাংশু কুমাৰ দাস, আঞ্চলিক পৰিবহণ প্ৰাধিকাৰী ৰফিকুল ইছলাম, যানবাহন পৰিদৰ্শক জয়সিং ৰংফাৰ, প্ৰৱৰ্তক পৰিদৰ্শক নীতু চেতিয়াসহ জিলা পথ-সুৰক্ষা সমিতিৰ লগত জড়িত বিভিন্ন বিভাগৰ উচ্চপদস্থ বিষয়াসকল সভাত উপস্থিত থাকে৷ সভাখনত সভাপতিত্ব কৰি অতিৰিক্ত উপায়ুক্ত ড。 ধ্ৰুৱজ্যোতি হাজৰিকাই বিভিন্ন দিশ উনুকিয়াই দি বিশেষকৈ জালুকবাৰীত সংঘটিত ভয়ানক পথ-দু্ৰ্ঘটনাৰ বিজ্ঞানসন্মত আৰু আনুসংগিক কাৰণ অধ্যয়নৰ বাবে মুখ্যমন্ত্ৰী ড° হিমন্ত বিশ্ব শৰ্মা আৰু আৰক্ষী সঞ্চালক প্ৰধান জি পি সিঙে দিয়া নিৰ্দেশৰ ভিত্তিত সংশ্লিষ্ট বিভাগসমূহক খৰতকীয়া প্ৰচেষ্টাৰে এই কাৰ্য নিয়াৰিকৈ সম্পন্ন কৰিবলৈ আহ্বান জনায়। মহানগৰীৰ দুৰ্ঘটনাপ্ৰৱন স্থানসমূহ চিনাক্ত কৰি সকলোৰে চকুত পৰাকৈ গতিবেগ নিয়ন্ত্ৰণৰ চিহ্ন ব্যৱহাৰ কৰা, স্পষ্ট আখৰেৰে গতিবেগ উল্লেখ কৰা, অধিক পোহৰৰ ব্যৱস্থা কৰাৰ উপৰি পামহি, গড়চুক, বৰাগাওঁ আদি অঞ্চলত অবৈধভাৱে গঢ়ি উঠা ধাৱাত অনুজ্ঞাপত্ৰ অবিহনেই সুৰাৰ ব্যৱসায় চলাই থকা কাৰ্য বন্ধ কৰা আদি দিশসমূহত সময় সাপেক্ষ ব্যৱস্থা গ্ৰহণ কৰিবলৈ অতিৰিক্ত উপায়ুক্ত গৰাকীয়ে পৰিবহণ, আৰক্ষী, লোকনিৰ্মাণকে ধৰি অনান্য বিভাগসমূহক আহ্বান জনায়। ইফালে মদ্যপান কৰি গাড়ী চলোৱাৰ ঘটনা ধৰা পৰা মাত্ৰকে চালকক জৰিমনা বিহাৰ উপৰি সেইসময়ত বাহনত থকা আৰোহী সহিতে চালকক স্থানীয় আৰক্ষী থানাত চমজাই দিবলৈ পৰিবহণ বিভাগক আহ্বান জনায় ৷ কিয়নো মদ্যপান কৰি গাড়ী চলোৱা চালকক জৰিমণা বিহি এৰি দিলে সেই চালকে গৈ ক’ৰবাত দুৰ্ঘটনা সংঘটিত কৰিব পাৰে ৷ জিলা পথ সুৰক্ষা সমিতিৰ সভাখনত উপস্থিত থাকি সহকাৰী পৰিবহণ আয়ুক্ত গৌতম দাসে আগন্তুক দিনত মহানগৰখনত সুৰক্ষিত যাতায়াত ব্যৱস্থা গঢ়ি তুলি দুৰ্ঘটনামুক্ত কৰাৰ ক্ষেত্ৰত বিভিন্ন বিভাগসমূহৰ সক্ৰিয় আৰু স্বতঃস্ফূৰ্ত সহযোগিতা কামনা কৰে৷ আগন্তুক এসপ্তাহৰ ভিতৰত মহানগৰীৰ ‘ব্লেকস্পট’ সমূহ চিনাক্ত কৰি এই স্থানসমূহত ল’বলগীয়া সাৱধানতাৰ ক্ষেত্ৰত আঁচনি যুগুত কৰিবলৈ আহ্বান জনাই অতিৰিক্ত উপায়ুক্ত গৰাকীয়ে আজিৰ গুৰুত্বপূৰ্ণ সভাখনৰ সামৰণি পেলায়।