এক বৃহৎ সফলতা লাভ কৰিছে ইন্দোৰৰ এদল চিকিৎসকে ৷ এজন ৰোগীৰ শৰীৰৰ পৰা ১৫ কেজি ওজনৰ টিউমাৰ আঁতৰাই পেলাবলৈ সক্ষম হৈছে চিকিৎসকৰ দলটো । ৰোগীগৰাকী অষ্টাৰ আৰু পেটৰ বিষৰ অভিযোগত মহানগৰীখনৰ ইনডেক্স হাস্পতাললৈ আহিছিল। এক ডজনৰো অধিক চিকিৎসক আৰু সহায়ক কৰ্মচাৰীৰ সৈতে জড়িত এটা দলে দুঘণ্টাৰ অস্ত্ৰোপচাৰ কৰি ৪১ বছৰীয়া মহিলাগৰাকীৰ পেটৰ পৰা এই বৃহৎ টিউমাৰটো সফলতাৰে আঁতৰাই পেলায়। অস্ত্ৰোপচাৰ বিশেষজ্ঞৰ দলটোৰ অংশ হিচাপে থকা ডাঃ অতুল ব্যাসে কয় যে যিহেতু টিউমাৰটো বিশাল আৰু খাদ্য খোৱাৰ সময়ত আনকি খোজ কঢ়াৰ সময়তো ৰোগীক অসুবিধাৰ সৃষ্টি কৰাৰ বাবে শীঘ্ৰে অস্ত্ৰোপচাৰ সম্পন্ন কৰাৰ সিদ্ধান্ত লোৱা হয় ৷
তেওঁ কয় যে অস্ত্ৰোপচাৰ কৰাৰ সময়ত দলটোৱে অত্যন্ত সাৱধান হ’বলগীয়া হৈছিল। টিউমাৰটোৱে বহু স্নায়ু আবৰি ধৰিছিল আৰু চিকিৎসকে পৰিস্থিতি সুক্ষ্মভাৱে চম্ভালিবলগীয়া হৈছিল।
মহিলাগৰাকীৰ ওজন ৪৯ কেজি আৰু তেওঁ ১৫ কেজি ওজনৰ টিউমাৰ কঢ়িয়াই লৈ ফুৰিছিল বুলি চিকিৎসকে জানিবলৈ দিয়ে। ইয়াৰ ফলত মহিলা গৰাকীৰ পেটটো ফুলি উঠিছিল। টিউমাৰটো ফাটি গ’লেযিটো ৰোগীৰ জীৱনৰ বাবে বিপদজনক হ’ব পাৰিলেহেঁতেন বুলিও তেওঁলোকে লগতে কয়। ৰোগী এতিয়া বিপদমুক্ত ৷
ৰোগীজনৰ পৰিয়ালৰ এজন সদস্যই জনোৱা মতে, ইনডেক্স হাস্পতাললৈ অহাৰ পূৰ্বে তেওঁলোকে মহিলাগৰাকীক কেইবাখনো চিকিৎসালয়লৈ লৈ যায়। যেতিয়া ডিম্বাশয়ৰ টিউমাৰ আৱিষ্কাৰ হয় তেতিয়া চিকিৎসকে পৰিয়ালটোক কয় যে অস্ত্ৰোপচাৰৰ প্ৰয়োজন হ’ব । চিকিৎসালয়ৰ অধ্যক্ষ সুৰেশসিং ভদৌৰিয়া আৰু উপাধ্যক্ষ মায়ংকৰজ সিং ভদৌৰিয়াই চিকিৎসকৰ এই প্ৰচেষ্টাক প্ৰশংসা কৰে।
