শেহতীয়াকৈ বলীউডৰ বিখ্যাত নেপথ্য গায়ক জুবিন নৌতিয়ালৰ দুৰ্ঘটনাক কেন্দ্ৰ কৰি সৃষ্টি হৈছে তীব্ৰ চাঞ্চল্যৰ ৷ তেওঁৰ দুৰ্ঘটনাৰ খবৰ পোহৰলৈ অহাৰ পিছৰ পৰাই তেওঁৰ স্বাস্থ্যৰ বুজ ল’বৰ বাবে উৎকণ্ঠিত হৈ আছে জনপ্ৰিয় গায়কগৰাকীৰ অনুৰাগী সকল ৷ ভয়াবহ দুৰ্ঘটনা সংঘটিত হোৱাৰ পিছতে তেওঁক চিকিৎসালয়ত ভৰ্তি কৰিব লগা হৈছে বুলি শুনি উত্তেজিত হৈ পৰিছে অনুৰাগীসকল ।
জানিবপৰা মতে চিৰিৰ পৰা পৰি গভীৰ আঘাতপ্ৰাপ্ত হোৱা জনপ্ৰিয় গায়ক জুবিন নৌতিয়ালে কঁকাল আৰু মূৰতো গভীৰ আঘাত পাইছিল ।সেয়েহে অকণো পলম নকৰাকৈ তেওঁক মুম্বাইৰ চিকিৎসালয়ত ভৰ্তি কৰোৱা হয় আৰু খবৰ অনুসৰি এই দুৰ্ঘটনাৰ পিছতে জুবিনৰ সোঁহাতখনৰ অস্ত্ৰোপচাৰ কৰা হয়।
কিন্তু কণ্ঠশিল্পী গৰাকীৰ অনুৰাগীসকলৰ বাবে সুখবৰ যে এতিয়া জুবিনৰ স্বাস্থ্যৰ যথেষ্ট উন্নতি ঘটিছে। শেহতীয়কৈ গায়ক গৰাকীয়ে হাস্পতালৰ বিচনাৰ পৰা দিয়া তেওঁৰ প্ৰথমখন ছবি ইতিমধ্যে যথেষ্ট চৰ্চালৈ আহিছে।
ইমান কষ্টৰ মাজতো হাঁহি থকা জনপ্ৰিয় গায়ক জুবিন নৌটিয়ালে নিজেই নিজৰ ইনষ্টাগ্ৰাম একাউণ্টৰ পৰা এই ফটোখন শ্বেয়াৰ কৰি নিজৰ অনুৰাগীসকলক তেওঁৰ স্বাস্থ্যৰ অৱস্থাৰ বিষয়ে অৱগত কৰিছে।
ফটোখনত চিকিৎসালয়ৰ বিচনাত বহি খাদ্য খোৱা দেখা পোৱা গৈছে তেওঁক । ফটোখন আপলোড কৰি তেওঁ কেপচনত লিখিছে যে সকলোকে ধন্যবাদ। ভগৱানে তেওঁক চাই আছিল আৰু এই ভয়ংকৰ দুৰ্ঘটনাত ৰক্ষা কৰিছিল। তেওঁক ডিচচাৰ্জ দিয়া হৈছে আৰু তেওঁ বৰ্তমান সুস্থ হৈ উঠিছে। আনহাতে অনুৰাগীসকলৰ অপৰিসীম মৰম আৰু প্ৰাৰ্থনাৰ বাবে ধন্যবাদ জনাইছে গায়ক গৰাকীয়ে ।
অৱশ্যে সামাজিক মাধ্যমত তেওঁৰ এই প’ষ্টটোৱে অনুৰাগী সকলক যথেষ্ট সকাহ দিছে ৷ ইফালে তেওঁৰ এই পোষ্টটোত প্ৰায়ভাগ চেলিব্ৰিটি আৰু অনুৰাগীয়ে প্ৰতিক্ৰিয়া প্ৰকাশ কৰি তেওঁ শীঘ্ৰে আৰোগ্য হোৱাৰ বাবে প্ৰাৰ্থনা কৰা দেখা গৈছে।
